ਨੈਟੋ ਮੁਲਕਾਂ ਦੇ ਪ੍ਰਤੀਨਿਧੀ ਅਗਲੇ ਮਹੀਨੇ ਹੇਗ 'ਚ ਕਰਨਗੇ ਮੁਲਾਕਾਤ

ਕੈਨੇਡਾ ਲਈ ਨੈਟੋ ਦੇ ਡਿਫੈਂਸ ਟਾਰਗੇਟ ਨੂੰ ਪੂਰਾ ਕਰਨ ਲਈ ਵੱਡੀ ਚੁਣੌਤੀ ਪੈਦਾ ਹੋਣ ਵਾਲੀ ਹੈ। ਜਾਣਕਾਰੀ ਮੁਤਾਬਕ, ਨੈਟੋ ਮੁਲਕਾਂ ਦੇ ਪ੍ਰਤੀਨਿਧੀ ਅਗਲੇ ਮਹੀਨੇ ਦੇ ਅਖੀਰ ਵਿਚ ਜਦੋਂ ਹੇਗ ਵਿਚ ਮਿਲਣਗੇ ਤਾਂ ਡਿਫੈਂਸ ਟਾਰਗੇਟ ਨੂੰ ਜੀਡੀਪੀ ਦੇ 5 ਫੀਸਦੀ ਤੱਕ ਕੀਤਾ ਜਾ ਸਕਦਾ ਹੈ, ਜਦੋਂ ਕਿ ਕੈਨੇਡਾ ਹੁਣ ਤੱਕ 2 ਫੀਸਦੀ ਟਾਰਗੇਟ ਨੂੰ ਵੀ ਪੂਰਾ ਕਰਨ ਵਿਚ ਫੇਲ੍ਹ ਰਿਹਾ ਹੈ।

ਮਾਹਰ ਦਾ ਕਹਿਣਾ ਹੈ ਕਿ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਜਦੋਂ ਅਗਲੇ ਮਹੀਨੇ ਨੈਟੋ ਸੰਮੇਲਨ ਵਿਚ ਸ਼ਾਮਲ ਹੋਣਗੇ ਤਾਂ ਉਨ੍ਹਾਂ 'ਤੇ ਕੈਨੇਡਾ ਦੀ ਜੀਡੀਪੀ ਦੇ 5 ਫੀਸਦੀ ਨਵੇਂ ਡਿਫੈਂਸ ਖਰਚ ਦੇ ਟਾਰਗੇਟ ਪ੍ਰਤੀ ਵਚਨਬੱਧਤਾ ਜਿਤਾਉਣ ਦਾ ਭਾਰ ਹੋਵੇਗਾ। ਨੈਟੋ ਮੁਲਕਾਂ ਦੀ ਬੈਠਕ 24 ਅਤੇ 25 ਜੂਨ ਨੂੰ ਹੇਗ ਵਿਚ ਹੋਣੀ ਹੈ।

ਪਿਛਲੇ ਸਾਲ ਵਾਸ਼ਿੰਗਟਨ ਵਿਚ ਹੋਏ ਨੈਟੋ ਸੰਮੇਲਨ ਵਿਚ ਕੈਨੇਡਾ ਨੂੰ ਆਪਣੀ ਜੀਡੀਪੀ ਦੇ ਦੋ ਫੀਸਦੀ ਖ਼ਰਚ ਦੇ ਟਾਰਗੇਟ ਨੂੰ ਪੂਰਾ ਨਾ ਕਰਨ ਲਈ ਸਹਿਯੋਗੀ ਦੇਸ਼ਾਂ ਤੋਂ ਆਲੋਚਨਾ ਦਾ ਸਾਹਮਣਾ ਕਰਨਾ ਪਿਆ ਸੀ। ਨੈਟੋ ਦੇ ਸਕੱਤਰ ਜਨਰਲ ਮਾਰਕ ਰੁਟੇ ਨੇ ਉਮੀਦ ਜਤਾਈ ਹੈ ਕਿ ਮੈਂਬਰ ਦੇਸ਼ ਅਗਲੇ ਮਹੀਨੇ ਹੋਣ ਵਾਲੇ ਇਕੱਠ ਵਿਚ ਪੰਜ ਫੀਸਦੀ ਦੇ ਨਵੇਂ ਟੀਚੇ 'ਤੇ ਸਹਿਮਤ ਹੋਣਗੇ। ਇਹ ਉਦੋਂ ਹੈ ਜਦੋਂ ਕੈਨੇਡਾ ਡਿਫੈਂਸ ਖਰਚ ਦੇ ਮਾਮਲੇ ਵਿਚ 2024 ਵਿਚ ਜੀਡੀਪੀ ਦੇ ਮਹਿਜ 1.3 ਫੀਸਦੀ ਹੀ ਪਹੁੰਚ ਸਕਿਆ ਹੈ।