ਕੈਨੇਡਾ ਨੇ ਮਾਪਿਆਂ, ਦਾਦਾ-ਦਾਦੀ ਲਈ ਸਥਾਈ ਨਿਵਾਸ ਸਪਾਂਸਰਸ਼ਿਪ ਅਰਜ਼ੀਆਂ ’ਤੇ ਲਾਈ ਰੋਕ

ਕੈਨੇਡਾ ਵਲੋਂ ਮਾਤਾ-ਪਿਤਾ, ਦਾਦਾ-ਦਾਦੀ ਅਤੇ ਨਾਨਾ-ਨਾਨੀ ਨੂੰ ਪੱਕੇ ਤੌਰ ’ਤੇ ਸੱਦਣ ਲਈ ਸਪਾਂਸਰਸ਼ਿਪ ਅਰਜ਼ੀਆਂ ’ਤੇ ਰੋਕ ਲਗਾ ਦਿੱਤੀ ਗਈ ਹੈ। ਸਰਕਾਰ ਦੇ ਨਿਰਦੇਸ਼ ਅਨੁਸਾਰ, ਕੈਨੇਡਾ ਅਗਲੇ ਨੋਟਿਸ ਤੱਕ ਮਾਤਾ-ਪਿਤਾ ਅਤੇ ਦਾਦਾ-ਦਾਦੀ ਦੀ ਪੀ. ਆਰ. ਨਾਲ ਜੁੜੀਆਂ ਨਵੀਆਂ ਸਪਾਂਸਰਸ਼ਿਪ ਅਰਜ਼ੀਆਂ ਸਵੀਕਾਰ ਨਹੀਂ ਕਰੇਗਾ।

ਕੈਨੇਡਾ ਗਜ਼ਟ ਵਿਚ ਛਪੇ ਦਿਸ਼ਾ-ਨਿਰਦੇਸ਼ਾਂ ਵਿਚ ਕਿਹਾ ਗਿਆ ਹੈ ਕਿ ਸਰਕਾਰ ਪਰਿਵਾਰ ਪੁਨਰ ਏਕੀਕਰਨ ਲਈ ਵਚਨਬੱਧ ਹੈ ਪਰ ਮੌਜੂਦਾ ਸਮੇਂ ਪਿਛਲੇ ਸਾਲ ਦੀਆਂ ਅਰਜ਼ੀਆਂ ’ਤੇ ਫੋਕਸ ਕੀਤਾ ਜਾ ਰਿਹਾ ਹੈ। ਸਰਕਾਰ ਮੁਤਾਬਕ, 2024 ਵਿਚ ਪਰਿਵਾਰ ਪੁਨਰ ਏਕੀਕਰਨ ਪ੍ਰੋਗਰਾਮ ਰਾਹੀਂ ਪ੍ਰਾਪਤ ਹੋਈਆਂ ਕਰੀਬ 15,000 ਅਰਜ਼ੀਆਂ ਦਾ ਨਿਬੇੜਾ ਕੀਤਾ ਜਾਣਾ ਬਾਕੀ ਹੈ।

ਗੌਰਤਲਬ ਹੈ ਕਿ ਸਰਕਾਰ ਦਾ ਇਹ ਤਾਜ਼ਾ ਫੈਸਲਾ ਉਦੋਂ ਆਇਆ ਹੈ ਜਦੋਂ ਇਮੀਗ੍ਰੇਸ਼ਨ ਪੱਧਰ ਅਤੇ ਪਿਛਲੇ ਬੈਕਲਾਗ ਨੂੰ ਮੈਨੇਜ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ। ਹਾਲਾਂਕਿ ਇਹ ਕਦਮ ਬਹੁਤ ਸਾਰੇ ਸੰਭਾਵੀ ਸਪਾਂਸਰ ਨੂੰ ਨਿਰਾਸ਼ ਕਰ ਸਕਦਾ ਹੈ ਪਰ ਪਰਿਵਾਰ ਪੁਨਰ ਏਕੀਕਰਨ ਲਈ ਸੁਪਰ ਵੀਜ਼ਾ ਵਰਗੇ ਵਿਕਲਪ ਅਜੇ ਵੀ ਮੌਜੂਦ ਹਨ।