ਕੈਨੇਡਾ ਇਸ ਮਹੀਨੇ ਯੂਰਪੀਅਨ ਯੂਨੀਅਨ ਨਾਲ ਮਿਲਟਰੀ ਲਈ ਕਰ ਸਕਦਾ ਹੈ ਡਿਫੈਂਸ ਖਰੀਦ ਸਮਝੌਤਾ

ਕੈਨੇਡਾ ਇਸ ਮਹੀਨੇ ਯੂਰਪੀਅਨ ਯੂਨੀਅਨ ਨਾਲ ਮਿਲਟਰੀ ਲਈ ਡਿਫੈਂਸ ਖਰੀਦ ਸਮਝੌਤਾ ਕਰ ਸਕਦਾ ਹੈ। ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਵਲੋਂ ਬ੍ਰਸੇਲਜ਼ ਦੌਰੇ ਦੌਰਾਨ ਇਸ ਸਮਝੌਤੇ 'ਤੇ ਦਸਤਖਤ ਕਰਨ ਦੀ ਸੰਭਾਵਨਾ ਹੈ। ਕਾਰਨੀ 23 ਜੂਨ ਨੂੰ ਕੈਨੇਡਾ-ਈਯੂ ਸੰਮੇਲਨ ਲਈ ਬ੍ਰਸੇਲਜ਼ ਜਾਣਗੇ, ਜਿਥੇ ਉਹ ਯੂਰਪੀਅਨ ਕਮਿਸ਼ਨ ਦੀ ਪ੍ਰਧਾਨ ਉਰਸੁਲਾ ਵਾਨ ਡੇਰ ਲੇਅਨ ਤੇ ਯੂਰਪੀਅਨ ਕੌਂਸਲ ਦੇ ਪ੍ਰਧਾਨ ਐਂਟੋਨੀਓ ਕੋਸਟਾ ਨਾਲ ਮੁਲਾਕਾਤ ਕਰਨਗੇ।

ਐਲਬਰਟਾ ਵਿਚ ਅੱਜ ਜੀ 7 ਬੈਠਕ ਵਿਚ ਸ਼ਾਮਲ ਹੋਣ ਲਈ ਜਾਂਦੇ ਸਮੇਂ ਦੋਵੇਂ ਯੂਰਪੀਅਨ ਨੇਤਾਵਾਂ ਨੇ ਕੈਨੇਡਾ ਨਾਲ ਡਿਫੈਂਸ ਡੀਲ ਹੋਣ ਬਾਰੇ ਸੰਕੇਤ ਦਿੱਤਾ। ਵਾਨ ਡੇਰ ਲੇਅਨ ਨੇ ਕਿਹਾ ਕਿ ਕੈਨੇਡਾ ਯੂਰਪੀਅਨ ਯੂਨੀਅਨ ਨਾਲ ਸਕਿਓਰਿਟੀ ਅਤੇ ਡਿਫੈਂਸ ਪਾਰਟਨਰਸ਼ਿਪ ਲਈ ਸਮਝੌਤੇ 'ਤੇ ਦਸਤਖ਼ਤ ਕਰੇਗਾ, ਜਿਸ ਨਾਲ ਕੈਨੇਡਾ ਨੂੰ ਸੰਯੁਕਤ ਰੱਖਿਆ ਪ੍ਰੋਜੈਕਟ ਲਈ ਯੂਰਪੀਅਨ ਲੋਨ ਪ੍ਰੋਗਰਾਮ ਵਿਚ ਸ਼ਾਮਲ ਹੋਣ ਦਾ ਮੌਕਾ ਮਿਲੇਗਾ।

ਗੌਰਤਲਬ ਹੈ ਕਿ ਯੂਰਪੀਅਨ ਯੂਨੀਅਨ ਨੇ ਡਿਫੈਂਸ ਸਮੱਰਥਾਵਾਂ ਨੂੰ ਵਧਾਉਣ ਲਈ 150-ਬਿਲੀਅਨ ਯੂਰੋ ਦਾ ਯੂਰਪ ਲਈ ਸੁਰੱਖਿਆ ਐਕਸ਼ਨ ਪ੍ਰੋਗਰਾਮ ਸ਼ੁਰੂ ਕੀਤਾ ਹੈ। ਵਾਨ ਡੇਰ ਲੇਅਨ ਦਾ ਕਹਿਣਾ ਹੈ ਕਿ ਇਸ ਪ੍ਰੋਗਰਾਮ ਨੂੰ ਕੈਨੇਡਾ ਦੇ ਨਜ਼ਦੀਕੀ ਸਾਥੀ ਹੀ ਜੁਆਇੰਨ ਕਰ ਸਕਦੇ ਹਨ।