ਕੈਨੇਡਾ ਨੂੰ ਹਾਊਸਿੰਗ ਸੰਕਟ ਦੂਰ ਕਰਨ ਲਈ ਸਕਿਲਡ ਵਰਕਰਾਂ ਦੀ ਲੋੜ੍ਹ : ਸ਼ੌਨ ਫਰੇਜ਼ਰ

ਕੈਨੇਡਾ ਵਿੱਚ ਹਾਊਸਿੰਗ ਸੰਕਟ ਨੂੰ ਦੂਰ ਕਰਨ ਲਈ ਸਰਕਾਰ ਵੱਲੋਂ ਸਕਿਲਡ ਵਰਕਰਾਂ ਲਈ ਇਮੀਗ੍ਰੇਸ਼ਨ ਵਿੱਚ ਢਿੱਲ ਦਿੱਤੀ ਜਾ ਸਕਦੀ ਹੈ। ਹਾਊਸਿੰਗ ਮਿਨਿਸਟਰ ਸ਼ੌਨ ਫਰੇਜ਼ਰ ਨੇ ਮੰਗਲਵਾਰ ਨੂੰ ਕਿਹਾ ਕਿ ਜੇ ਕੈਨੇਡਾ ਨੇ ਉਸਾਰੀ ਉਦਯੋਗ ਨੂੰ ਪੇਸ਼ ਆ ਰਹੀ ਲੇਬਰ ਦੀ ਭਾਰੀ ਘਾਟ ਨੂੰ ਪੂਰਾ ਨਹੀਂ ਕੀਤਾ ਤਾਂ ਘਰ ਬਣਾਉਣ ਲਈ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਵੇਗਾ।

ਉਨ੍ਹਾਂ ਕਿਹਾ ਕਿ ਇਸ ਸਮੇਂ ਵਧੇਰੇ ਲੋਕਾਂ ਨੂੰ ਸਿਖਲਾਈ ਦੇਣ ਅਤੇ ਵਰਕਰਾਂ ਨੂੰ ਆਕਰਸ਼ਿਤ ਕਰਨ 'ਤੇ ਧਿਆਨ ਦੇਣ ਦੀ ਲੋੜ ਹੈ। ਹਾਊਸਿੰਗ ਮਿਨਿਸਟਰ ਨੇ ਕਿਹਾ ਕਿ ਘਰਾਂ ਦੀ ਉਸਾਰੀ ਲਈ ਜੋ ਸਕਿੱਲਡ ਵਰਕਰਜ਼ ਕੈਨੇਡਾ ਵਿੱਚ ਥੋੜ੍ਹੇ ਸਮੇਂ ਵਿੱਚ ਮਿਲਣੇ ਮੁਸ਼ਕਲ ਹਨ, ਉਨ੍ਹਾਂ ਨੂੰ ਸੱਦਣ ਲਈ ਉਹ ਮਿਨਿਸਟਰ ਮਿੱਲਰ ਨਾਲ ਇਮੀਗ੍ਰੇਸ਼ਨ ਮੌਕੇ 'ਤੇ ਕੰਮ ਕਰ ਰਹੇ ਹਨ।

ਸ਼ੌਨ ਫਰੇਜ਼ਰ ਨੇ ਇਹ ਵੀ ਘੋਸ਼ਣਾ ਕੀਤੀ ਕਿ ਫੈਡਰਲ ਸਰਕਾਰ ਪੂਰੇ ਕੈਨੇਡਾ ਵਿੱਚ 1,660 ਸਹਿਕਾਰੀ ਘਰਾਂ ਨੂੰ ਬਣਾਉਣ ਜਾਂ ਰੀਟਰੋਫਿਟਿੰਗ ਵਿੱਚ $71 ਮਿਲੀਅਨ ਦਾ ਨਿਵੇਸ਼ ਕਰੇਗੀ। ਇਨ੍ਹਾਂ 1,660 ਵਿੱਚੋਂ ਲਗਭਗ 1,200 ਘਰ ਨਵੇਂ ਹੋਣਗੇ।