ਨੇਤਨਯਾਹੂ ਦੇ ਭਾਸ਼ਣ ਦੌਰਾਨ ਕੈਨੇ਼ਡੀਅਨ ਔਫੀਸਰਜ਼ ਨੇ ਨਹੀਂ ਛੱਡਿਆ ਹਾਲ

ਕੈਨੇਡਾ ਦੇ ਸੰਯੁਕਤ ਰਾਸ਼ਟਰ ਲਈ ਰਾਜਦੂਤ ਬੌਬ ਰੇਅ ਦੇ ਦਫ਼ਤਰ ਨੇ ਇਸ ਗੱਲ ਦੀ ਪੁਸ਼ਟੀ ਕੀਤੀ ਹੈ ਕਿ ਅੱਜ ਸਵੇਰ ਇਜ਼ਰਾਇਲ ਦੇ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਦੇ ਭਾਸ਼ਣ ਦੌਰਾਨ ਜਨਰਲ ਅਸੈਂਬਲੀ ਹਾਲ ਵਿਚੋਂ ਵਾਕ ਆਊਟ ਕਰਨ ਵਾਲੇ ਗਰੁੱਪ ਦਾ ਕੈਨੇਡਾ ਹਿੱਸਾ ਨਹੀਂ ਸੀ। ਬੌਬ ਰੇਅ ਆਪਣੀ ਸੀਟ 'ਤੇ ਹੀ ਮੌਜੂਦ ਸਨ।

ਗੌਰਤਲਬ ਹੈ ਕਿ ਜਦੋਂ ਨੇਤਨਯਾਹੂ ਨੇ ਸੰਯੁਕਤ ਰਾਸ਼ਟਰ ਮਹਾਸਭਾ ਵਿਚ ਆਪਣਾ ਭਾਸ਼ਣ ਸ਼ੁਰੂ ਕੀਤਾ ਤਾਂ ਦੁਨੀਆ ਭਰ ਦੇ ਕਈ ਡੈਲੀਗੇਟਸ ਗਾਜ਼ਾ ਵਿਚ ਇਜ਼ਰਾਈਲ ਦੀਆਂ ਫ਼ੌਜੀ ਕਾਰਵਾਈਆਂ ਦੇ ਵਿਰੋਧ ਵਿਚ ਬਾਹਰ ਚਲੇ ਗਏ ਸਨ। ਇਸ ਦੌਰਾਨ ਪ੍ਰਧਾਨ ਅਧਿਕਾਰੀ ਨੂੰ ਕਈ ਵਾਰ ਮੈਂਬਰਸ ਨੂੰ ਸ਼ਾਂਤੀ ਬਣਾਈ ਰੱਖਣ ਲਈ ਅਪੀਲ ਕਰਨੀ ਪਈ।

ਨੇਤਨਯਾਹੂ ਨੇ ਆਪਣੇ ਸੰਬੋਧਨ ਵਿਚ ਫਲਸਤੀਨ ਨੂੰ ਮੁਲਕ ਦੀ ਮਾਨਤਾ ਦੇਣ ਲਈ ਕੈਨੇਡਾ ਸਮੇਤ ਪੱਛਮੀ ਦੇਸ਼ਾਂ ਦੀ ਨਿੰਦਾ ਕੀਤੀ ਅਤੇ ਇਸ ਨੂੰ ਸ਼ਰਮਨਾਕ ਫੈਸਲਾ ਕਿਹਾ। ਉਨ੍ਹਾਂ ਕਿਹਾ ਕਿ ਇਹ ਕਦਮ ਅੱਤਵਾਦ ਨੂੰ ਉਤਸ਼ਾਹਿਤ ਕਰੇਗਾ। ਕੈਨੇਡੀਅਨ ਰਾਜਦੂਤ ਬੌਬ ਰੇਅ ਨੇ ਪੁਸ਼ਟੀ ਕੀਤੀ ਕਿ ਉਹ ਨੇਤਨਯਾਹੂ ਦੇ ਪੂਰੇ ਭਾਸ਼ਣ ਤੱਕ ਉਥੇ ਸਨ।