ਕੈਨੇਡਾ ਪੋਸਟ ਨੇ ਵਿੱਤੀ ਘਾਟੇ ਕਾਰਨ ਕਈਆਂ ਨੂੰ ਨੌਕਰੀ ਤੋਂ ਕੱਢਿਆ

ਕੈਨੇਡਾ ਪੋਸਟ ਵਲੋਂ ਕਈ ਸਾਲਾਂ ਦੇ ਗੰਭੀਰ ਵਿੱਤੀ ਨੁਕਸਾਨ ਤੋਂ ਉਭਰਨ ਦੀ ਕੋਸ਼ਿਸ਼ ਵਿਚ ਦਰਜਨਾਂ ਮੈਨੇਜਰ ਨੂੰ ਨੌਕਰੀਓਂ ਕੱਢਿਆ ਜਾ ਰਿਹਾ ਹੈ। ਕੈਨੇਡਾ ਪੋਸਟ ਨੇ ਕਿਹਾ ਕਿ ਸੀਨੀਅਰ ਪੱਧਰ ਦੇ ਦੋ ਖਾਲੀ ਅਹੁਦਿਆਂ ਨੂੰ ਵੀ ਖਤਮ ਕਰ ਦਿੱਤਾ ਗਿਆ ਹੈ, ਜਿਸ ਨਾਲ ਓਵਰਆਲ ਸੀਨੀਅਰ ਪ੍ਰਬੰਧਨ ਵਿਚ 20 ਫੀਸਦੀ ਦੀ ਕਟੌਤੀ ਕੀਤੀ ਜਾ ਰਹੀ ਹੈ।

ਕੈਨੇਡਾ ਪੋਸਟ ਦੇ ਬੁਲਾਰੇ ਜੌਨ ਹੈਮਿਲਟਨ ਨੇ ਪੁਸ਼ਟੀ ਕੀਤੀ ਕਿ ਇਸ ਹਫ਼ਤੇ ਲਗਭਗ 50 ਮੈਨੇਜਰਾਂ ਨੂੰ ਛਾਂਟੀ ਦੇ ਨੋਟਿਸ ਭੇਜੇ ਜਾ ਰਹੇ ਹਨ। ਇਨ੍ਹਾਂ ਵਿਚੋਂ ਅੱਧੀਆਂ ਨੌਕਰੀਆਂ ਔਟਵਾ ਵਿਚ ਹਨ, ਇਸ ਵਿਚ ਟੋਰਾਂਟੋ, ਮਾਂਟਰੀਅਲ ਅਤੇ ਹੋਰ ਖੇਤਰਾਂ ਦੇ ਕਰਮਚਾਰੀ ਵੀ ਸ਼ਾਮਲ ਹਨ।

ਬੁਲਾਰੇ ਨੇ ਹਾਲਾਂਕਿ, ਇਹ ਵੇਰਵੇ ਨਹੀਂ ਦਿੱਤੇ ਕਿ ਨੌਕਰੀਆਂ ਵਿਚ ਕਟੌਤੀ ਨਾਲ ਕਿੰਨੇ ਪੈਸੇ ਦੀ ਬਚਤ ਹੋਣ ਦੀ ਉਮੀਦ ਹੈ ਜਾਂ ਕਿਹੜੇ ਅਹੁਦਿਆਂ ਨੂੰ ਖਤਮ ਕੀਤਾ ਗਿਆ ਹੈ ਪਰ ਉਨ੍ਹਾਂ ਕਿਹਾ ਕਿ ਛਾਂਟੀ ਵਿਚ ਸਾਰੇ ਅੰਦਰੂਨੀ ਪ੍ਰਬੰਧਨ ਸਟਾਫ ਸ਼ਾਮਲ ਹਨ ਜੋ ਰੋਜ਼ਾਨਾ ਦੇ ਕੰਮਾਂ ਵਿਚ ਸ਼ਾਮਲ ਨਹੀਂ ਸਨ।

ਹੈਮਿਲਟਨ ਨੇ ਕਿਹਾ ਕਿ ਇਸ ਦਾ ਡਾਕ ਸੇਵਾ ’ਤੇ ਕੋਈ ਅਸਰ ਨਹੀਂ ਪਵੇਗਾ। ਗੌਰਤਲਬ ਹੈ ਕਿ ਕੈਨੇਡਾ ਪੋਸਟ ਵੱਡੇ ਘਾਟੇ ਵਿਚ ਹੈ, ਪਿਛਲੇ ਮਹੀਨੇ ਸਰਕਾਰ ਇਸ ਨੂੰ 2025-26 ਦੇ ਵਿੱਤੀ ਸਾਲ ਵਿਚ ਖਰਚ ਉਠਾਉਣ ਲਈ $1 ਬਿਲੀਅਨ ਦਾ ਲੋਨ ਦੇਣ ਲਈ ਸਹਿਮਤ ਹੋਈ ਹੈ।