ਕੈਨੇਡਾ ਪੋਸਟ ਦਾ ਕੰਮ ਮੰਗਲਵਾਰ ਤੋਂ ਮੁੜ ਸ਼ੁਰੂ ਹੋਵੇਗਾ

ਕੈਨੇਡੀਅਨਜ਼ ਲਈ ਰਾਹਤ ਦੀ ਖ਼ਬਰ ਹੈ, ਫੈਡਰਲ ਸਰਕਾਰ ਵਲੋਂ ਦਖ਼ਲ ਦਿੱਤੇ ਜਾਣ ਮਗਰੋਂ ਕੈਨੇਡਾ ਪੋਸਟ ਦੇ ਵਰਕਰਜ਼ ਮੰਗਲਵਾਰ ਤੋਂ ਕੰਮ 'ਤੇ ਵਾਪਸ ਆ ਰਹੇ ਹਨ।

ਲੇਬਰ ਮਿਨਿਸਟਰ ਸਟੀਵਨ ਮੈਕਕਿਨਨ ਨੇ ਸ਼ੁੱਕਰਵਾਰ ਨੂੰ ਕੈਨੇਡਾ ਇੰਡਸਟਰੀਅਲ ਰਿਲੇਸ਼ਨਜ਼ ਬੋਰਡ ਨੂੰ ਨਿਰਦੇਸ਼ ਦਿੱਤਾ ਸੀ ਕਿ ਜੇਕਰ ਟ੍ਰਿਬਿਊਨਲ ਨੂੰ ਲੱਗਦਾ ਹੈ ਕਿ ਸਾਲ ਦੇ ਅੰਤ ਤੋਂ ਪਹਿਲਾਂ ਦੋਹਾਂ ਧਿਰਾਂ ਵਿਚਕਾਰ ਕੋਈ ਸਮਝੌਤਾ ਨਹੀਂ ਹੋ ਸਕਦਾ ਤਾਂ 55,000 ਪੋਸਟਲ ਵਰਕਰਜ਼ ਨੂੰ ਦਿਨਾਂ ਦੇ ਅੰਦਰ ਕੰਮ 'ਤੇ ਵਾਪਸ ਜਾਣ ਦਾ ਆਦੇਸ਼ ਦਿੱਤਾ ਜਾਵੇ। ਇਸ ਨਿਰਦੇਸ਼ ਤਹਿਤ ਬੋਰਡ ਨੇ ਵੀਕਐਂਡ 'ਤੇ ਦੋ ਦਿਨ ਸੁਣਵਾਈ ਕੀਤੀ ਪਰ ਦੋਹਾਂ ਧਿਰਾਂ ਵਿਚ ਗਤੀਰੋਧ ਬਰਕਰਾਰ ਰਿਹਾ। ਗੌਰਤਲਬ ਹੈ ਕਿ ਕੈਨੇਡਾ ਪੋਸਟ ਦੇ ਕਰਮਚਾਰੀ ਤਨਖਾਹਾਂ ਵਿਚ ਵਾਧੇ ਅਤੇ ਹੋਰ ਮੰਗਾਂ ਨੂੰ ਲੈ ਕੇ 15 ਨਵੰਬਰ ਤੋਂ ਹੜਤਾਲ 'ਤੇ ਹਨ।

ਇਸ ਵਿਚਕਾਰ ਕੈਨੇਡਾ ਪੋਸਟ ਨੇ ਕਿਹਾ ਹੈ ਕਿ ਉਸ ਨੇ ਯੂਨੀਅਨ ਨਾਲ 5 ਫੀਸਦੀ ਤਨਖਾਹ ਵਾਧੇ ਨੂੰ ਲਾਗੂ ਕਰਨ 'ਤੇ ਸਹਿਮਤੀ ਪ੍ਰਗਟਾਈ ਹੈ, ਇਹ ਮੌਜੂਦਾ ਸਮਝੌਤੇ ਦੇ ਸਮਾਪਤੀ ਦੇ ਅਗਲੇ ਦਿਨ ਲਾਗੂ ਹੋਵੇਗਾ।