ਕੈਨੇਡਾ ਪੋਸਟ ਵਲੋਂ ਰੋਜ਼ਾਨਾ ਡੋਰ-ਟੂ-ਡੋਰ ਮੇਲ ਡਿਲਿਵਰੀ ਕੀਤੀ ਜਾ ਸਕਦੀ ਹੈ ਬੰਦ

ਕੈਨੇਡਾ ਪੋਸਟ ਵਲੋਂ ਰੋਜ਼ਾਨਾ ਡੋਰ-ਟੂ-ਡੋਰ ਮੇਲ ਡਿਲਿਵਰੀ ਬੰਦ ਕੀਤੀ ਜਾ ਸਕਦੀ ਹੈ। ਇਹ ਸਿਫਾਰਸ਼ ਉਦਯੋਗਿਕ ਜਾਂਚ ਕਮਿਸ਼ਨ ਨੇ ਆਪਣੀ ਰਿਪੋਰਟ ਵਿਚ ਕੀਤੀ ਹੈ। ਉਥੇ ਹੀ, ਦੂਜੇ ਪਾਸੇ ਕਾਰੋਬਾਰਾਂ ਲਈ ਰੋਜ਼ਾਨਾ ਡਿਲਿਵਰੀ ਜਾਰੀ ਰੱਖਣ ਲਈ ਕਿਹਾ ਗਿਆ ਹੈ। ਕਮਿਸ਼ਨਰ ਵਿਲੀਅਮ ਕੈਪਲਨ ਨੇ ਕਿਹਾ ਕਿ ਉਨ੍ਹਾਂ ਇਹ ਰਿਪੋਰਟ ਕੈਨੇਡਾ ਪੋਸਟ ਦੇ ਵਧਦੇ ਘਾਟੇ ਨੂੰ ਰੋਕਣ ਅਤੇ ਫਿਰ ਇਸ ਨੂੰ ਉਲਟਾਉਣ ਨੂੰ ਧਿਆਨ ਵਿਚ ਰੱਖ ਕੇ ਬਣਾਈ ਹੈ।

ਉਨ੍ਹਾਂ ਕਿਹਾ ਕਿ ਮੇਰੀਆਂ ਸਿਫਾਰਸ਼ਾਂ ਇਸ ਨਤੀਜਿਆਂ ਦੇ ਆਧਾਰ 'ਤੇ ਹਨ ਕਿ ਕੈਨੇਡਾ ਪੋਸਟ ਇੱਕ ਮੁਨਾਫੇ ਵਾਲੀ ਰਾਸ਼ਟਰੀ ਸੰਸਥਾ ਹੋਣੀ ਚਾਹੀਦੀ ਹੈ। ਗੌਰਤਲਬ ਹੈ ਕਿ ਪਿਛਲੇ ਸਾਲ ਪੋਸਟਲ ਵਰਕਰਜ਼ ਨੂੰ ਹੜਤਾਲ ਖ਼ਤਮ ਕਰਕੇ ਕੰਮ 'ਤੇ ਵਾਪਸ ਜਾਣ ਦੇ ਹੁਕਮ ਦੇਣ ਸਮੇਂ ਸਰਕਾਰ ਨੇ ਕਮਿਸ਼ਨ ਨੂੰ ਸਿਫਾਰਸ਼ਾਂ ਦੇਣ ਲਈ ਕਿਹਾ ਸੀ।

ਰਿਪੋਰਟ ਵਿਚ ਇਹ ਵੀ ਸਿਫਾਰਸ਼ ਕੀਤੀ ਗਈ ਹੈ ਕਿ ਵੀਕਐਂਡ ਅਤੇ ਹਫ਼ਤੇ ਦੌਰਾਨ ਜ਼ਿਆਦਾ ਪਾਰਸਲ ਦੀ ਡਿਲਿਵਰੀ ਵਿਚ ਮਦਦ ਲਈ ਕੈਨੇਡਾ ਪੋਸਟ ਕੋਲ ਪਾਰਟ-ਟਾਈਮ ਕਰਮਚਾਰੀ ਰੱਖਣ ਦੀ ਫਲੈਕਸੇਬਿਲਟੀ ਹੋਣੀ ਚਾਹੀਦੀ ਹੈ।