ਕੈਨੇਡਾ ਪੋਸਟ ਦੀ ਚੱਲ ਰਹੀ ਹੜਤਾਲ ਦਾ ਕਾਰੋਬਾਰਾਂ ’ਤੇ ਪੈ ਰਿਹੈ ਮਹੱਤਵਪੂਰਨ ਪ੍ਰਭਾਵ

ਕੈਨੇਡਾ ਪੋਸਟ ਦੀ ਚੱਲ ਰਹੀ ਹੜਤਾਲ ਦਾ ਕਾਰੋਬਾਰਾਂ ’ਤੇ ਮਹੱਤਵਪੂਰਨ ਪ੍ਰਭਾਵ ਪੈ ਰਿਹਾ ਹੈ, ਜਿਸ ਨਾਲ ਕੰਪਨੀਆਂ ਨੂੰ ਪ੍ਰਤੀ ਦਿਨ ਘੱਟੋ-ਘੱਟ $76.6 ਮਿਲੀਅਨ ਦਾ ਨੁਕਸਾਨ ਹੋ ਰਿਹਾ ਹੈ। ਕੈਨੇਡੀਅਨ ਫੈਡਰੇਸ਼ਨ ਆਫ ਇੰਡੀਪੈਂਡੈਂਟ ਬਿਜ਼ਨਸ ਨੇ ਸੋਮਵਾਰ ਨੂੰ ਇੱਕ ਬਿਆਨ ਵਿਚ ਇਹ ਖੁਲਾਸਾ ਕੀਤਾ।

ਸੰਗਠਨ ਨੇ ਕਿਹਾ ਕਿ ਕੈਨੇਡਾ ਪੋਸਟ ਦੇ ਵਰਕਰਜ਼ ਦੀ 17 ਦਿਨਾਂ ਤੋਂ ਦੇਸ਼ ਪੱਧਰੀ ਹੜਤਾਲ ਕਾਰਨ ਛੋਟੇ ਅਤੇ ਮੱਧਮ ਕਾਰੋਬਾਰਾਂ ਨੂੰ ਹੁਣ ਤੱਕ ਅੰਦਾਜ਼ਨ $765 ਮਿਲੀਅਨ ਦੀ ਕਮਾਈ ਦਾ ਨੁਕਸਾਨ ਹੋ ਚੁੱਕਾ ਹੈ।

ਸੰਗਠਨ ਨੇ ਚਿਤਾਵਨੀ ਦਿੱਤੀ ਕਿ ਜੇ ਹੜਤਾਲ ਜਾਰੀ ਰਹੀ ਤਾਂ ਬੁੱਧਵਾਰ ਤੱਕ ਇਸ ਸੈਕਟਰ ਨੂੰ $1 ਬਿਲੀਅਨ ਤੋਂ ਵੱਧ ਦਾ ਨੁਕਸਾਨ ਹੋਵੇਗਾ। ਕੈਨੇਡਾ ਪੋਸਟ ਦੇ 55,000 ਵਰਕਰ 15 ਨਵੰਬਰ ਤੋਂ ਹੜਤਾਲ ’ਤੇ ਹਨ, ਜਿਸ ਦੇ ਚੱਲਦੇ ਕੈਨੇਡਾ ਭਰ ਵਿਚ ਪਾਰਸਲ ਸਰਵਿਸ ਠੱਪ ਹੋ ਗਈਆਂ ਹਨ ਅਤੇ ਕੁਝ ਪੋਸਟ ਆਫਿਸ ਵੀ ਬੰਦ ਹਨ।

ਸੀਐੱਫਆਈਬੀ ਨੇ ਦੋਸ਼ ਲਗਾਇਆ ਕਿ ਸਰਕਾਰ ਹੱਥ ’ਤੇ ਹੱਥ ਰੱਖ ਕੇ ਬੈਠੀ ਹੈ ਅਤੇ ਛੋਟੇ ਕਾਰੋਬਾਰ ਨੁਕਸਾਨ ਉਠਾ ਰਹੇ ਹਨ। ਸੰਗਠਨ ਨੇ ਕਿਹਾ ਕਿ ਫੈਡਰਲ ਸਰਕਾਰ ਜਾਂ ਤਾਂ ਬਾਈਡਿੰਗ ਆਰਬਿਟਰੇਸ਼ਨ ਲਾਗੂ ਕਰੇ ਜਾਂ ਬੈਕ-ਟੂ-ਵਰਕ ਕਾਨੂੰਨ ਲਿਆਵੇ।