11.97C Vancouver 11.97C VancouverJan 16, 2024 7:06 PM - The Connect News
ਕੈਨੇਡਾ ਨੇ ਦਸੰਬਰ ਦੌਰਾਨ ਸਾਲਾਨਾ ਮਹਿੰਗਾਈ ਦਰ ਵਿਚ 3.4 ਫੀਸਦੀ ਦਾ ਵਾਧਾ ਦਰਜ ਕੀਤਾ ਹੈ, ਜੋ ਨਵੰਬਰ ਵਿਚ 3.1 ਫੀਸਦੀ ਸੀ। ਇਹ ਅੰਕੜੇ ਉਸ ਸਮੇਂ ਜਾਰੀ ਹੋਏ ਹਨ ਜਦੋਂ ਬੈਂਕ ਆਫ਼ ਕੈਨੇਡਾ ਅਗਲੇ ਹਫ਼ਤੇ ਵਿਆਜ਼ ਦਰ ਬਾਰੇ ਫੈਸਲਾ ਲੈਣ ਵਾਲਾ ਹੈ।
ਸਟੈਟਿਸਟਿਕਸ ਕੈਨੇਡਾ ਦਾ ਕਹਿਣਾ ਹੈ ਕਿ ਬੀਤੇ ਮਹੀਨੇ ਗੈਸ ਅਤੇ ਕਰਿਆਨੇ ਦੀਆਂ ਕੀਮਤਾਂ ਵਿਚ ਵਾਧੇ ਕਾਰਨ ਮਹਿੰਗਾਈ ਵਿਚ ਤੇਜ਼ੀ ਦਰਜ ਹੋਈ। ਕਰਿਆਨੇ ਦੀਆਂ ਦੁਕਾਨਾਂ ’ਤੇ ਕੀਮਤਾਂ ਪਿਛਲੇ ਮਹੀਨੇ 4.7 ਫੀਸਦੀ ਵਧੀਆਂ, ਨਵੰਬਰ ਵਿਚ ਵੀ ਇਹੀ ਤੇਜ਼ੀ ਦੇਖੀ ਗਈ ਸੀ। ਹਾਲਾਂਕਿ, ਏਜੰਸੀ ਨੇ ਕਿਹਾ ਕਿ ਗੈਸੋਲੀਨ ਨੂੰ ਛੱਡ ਦੇਈਏ ਤਾਂ ਮਹਿੰਗਾਈ ਸਾਲ ਦਰ ਸਾਲ ਘੱਟ ਹੋਈ ਹੈ।
ਅਰਥ ਸ਼ਾਸਤਰੀਆਂ ਨੇ ਕਿਹਾ ਕਿ ਦਸੰਬਰ ਦੇ ਮਹਿੰਗਾਈ ਅੰਕੜੇ ਉਨ੍ਹਾਂ ਦੇ ਅਨੁਮਾਨਾਂ ਨਾਲ ਮੇਲ ਖਾਂਦੇ ਹਨ ਅਤੇ ਉਮੀਦ ਹੈ ਕਿ ਸੈਂਟਰਲ ਬੈਂਕ 24 ਜਨਵਰੀ ਨੂੰ ਕੀਤੀ ਜਾਣ ਵਾਲੀ ਵਿਆਜ਼ ਦਰ ਦੀ ਘੋਸ਼ਣਾ ਵਿਚ ਨੀਤੀ ਦਰ ਨੂੰ 5 ਫੀਸਦੀ ’ਤੇ ਬਰਕਰਾਰ ਰੱਖ ਸਕਦਾ ਹੈ।
ਇਸ ਦੇ ਨਾਲ ਹੀ ਮਨੀ ਮਾਰਕਿਟ ਅਤੇ ਅਰਥ ਸ਼ਾਸਤਰੀ ਉਮੀਦ ਕਰਦੇ ਹਨ ਕਿ ਬੈਂਕ ਆਫ਼ ਕੈਨੇਡਾ 2024 ਦੇ ਪਹਿਲੇ ਅੱਧ ਵਿਚ ਦਰਾਂ ਵਿਚ ਕਟੌਤੀ ਕਰਨਾ ਸ਼ੁਰੂ ਕਰ ਸਕਦਾ ਹੈ। ਅਪ੍ਰੈਲ ਵਿਚ 25 ਆਧਾਰ ਪੁਆਇੰਟ ਯਾਨੀ 0.25 ਫੀਸਦੀ ਦੀ ਕਟੌਤੀ ਹੋ ਸਕਦੀ ਹੈ। ਹਾਲਾਂਕਿ, ਮਹਿੰਗਾਈ ਵਧਣ ਦੀ ਸੂਰਤ ਵਿਚ ਸੈਂਟਰਲ ਬੈਂਕ ਨੇ ਰੇਟਾਂ ਵਿਚ ਹੋਰ ਵਾਧੇ ਕਰਨ ਦੇ ਰਸਤੇ ਵੀ ਖੁੱਲ੍ਹੇ ਰੱਖੇ ਹਨ।
