ਕੈਨੇਡਾ ਅਮਰੀਕਾ ਨੂੰ ਡੇਅਰੀ ਮਾਰਕੀਟ ਦੀ ਸਪਲਾਈ ਲਈ ਨਹੀਂ ਦੇਵੇਗਾ ਰਿਆਇਤ

ਕੈਨੇਡਾ ਦੀ ਅੰਤਰਰਾਸ਼ਟਰੀ ਵਪਾਰ ਅਤੇ ਆਰਥਿਕ ਵਿਕਾਸ ਮੰਤਰੀ ਮੇਰੀ ਇੰਗ ਨੇ ਸਾਫ ਕੀਤਾ ਹੈ ਕਿ ਟਰੰਪ ਦੇ ਟੈਰਿਫ ਦੀਆਂ ਧਮਕੀਆਂ ਦੇ ਬਾਵਜੂਦ ਕੈਨੇਡਾ ਅਮਰੀਕਾ ਨੂੰ ਔਟਵਾ ਦੀ ਡੇਅਰੀ ਮਾਰਕੀਟ ਵਿਚ ਵਧੇਰੇ ਪਹੁੰਚ ਲਈ ਸਪਲਾਈ ਪ੍ਰਬੰਧਨ ਵਿਚ ਰਿਆਇਤ ਨਹੀਂ ਦੇਵੇਗਾ।

ਕੈਨੇਡਾ ਦਾ ਸਪਲਾਈ ਪ੍ਰਬੰਧਨ ਸਿਸਟਮ ਕਿਸਾਨਾਂ ਅਤੇ ਖਪਤਕਾਰਾਂ ਦੋਵਾਂ ਲਈ ਸਥਿਰ ਕੀਮਤਾਂ ਬਣਾਈ ਰੱਖਣ ਲਈ ਡੇਅਰੀ, ਪੋਲਟਰੀ ਅਤੇ ਆਂਡਿਆਂ ਲਈ ਇੰਪੋਰਟ ਨੂੰ ਕੰਟਰੋਲ ਕਰਦਾ ਹੈ। ਮੇਰੀ ਇੰਗ ਨੂੰ ਜਦੋਂ ਇਹ ਪੁੱਛਿਆ ਗਿਆ ਕਿ ਕੀ ਕੈਨੇਡਾ ਨੂੰ ਅਗਲੇ ਮਹੀਨੇ ਟੈਰਿਫ ਤੋਂ ਬਚਣ ਲਈ ਕੋਈ ਵਪਾਰ ਸਮਝੌਤੇ ਕਰਨਾ ਪਵੇਗਾ ਤਾਂ ਐਨਜੀ ਨੇ ਕਿਹਾ ਕਿ ਉਨ੍ਹਾਂ ਨੂੰ ਅਜਿਹਾ ਨਹੀਂ ਲੱਗਦਾ।

ਉਥੇ ਹੀ ਮੇਰੀ ਇੰਗ ਨੇ ਦੱਸਿਆ ਕਿ ਕੈਨੇਡਾ ਵਪਾਰ ਲਈ ਹੋਰ ਬਾਜ਼ਾਰ ਤਲਾਸ਼ ਰਿਹਾ ਹੈ ਅਤੇ ਹਾਲ ਹੀ ਵਿਚ ਇਕਵਾਡੋਰ ਨਾਲ ਮੁਫਤ ਵਪਾਰ ਸਮਝੌਤਾ ਕੀਤਾ ਹੈ, ਜੋ ਸਾਉਥ ਅਮਰੀਕਾ ਦੀ 6ਵੀਂ ਵੱਡੀ ਅਰਥਵਿਵਸਥਾ ਹੈ।

ਮੇਰੀ ਇੰਗ ਨੇ ਕਿਹਾ ਕਿ ਉਹ ਵਪਾਰ ਵਾਰਤਾ ਵਿਚ ਯੂ.ਕੇ. ਦੀ ਵਾਪਸੀ ਦਾ ਵੀ ਸਵਾਗਤ ਕਰਨਗੇ ਪਰ ਇਸ ਸਮੇਂ ਉਨ੍ਹਾਂ ਦਾ ਫੋਕਸ ਹੋਰ ਮੁਲਕਾਂ ਨਾਲ ਵਪਾਰ ਵਧਾਉਣ ’ਤੇ ਹੈ। ਯੂ.ਕੇ. ਨਾਲ ਵਪਾਰ ਗੱਲਬਾਤ ਪਿਛਲੇ ਸਾਲ ਟੁੱਟ ਗਈ ਸੀ। ਉਸ ਨੇ ਕੈਨੇਡਾ ਦੀ ਚੀਸ ਬਾਜ਼ਾਰ ਵਿਚ ਡਿਊਟੀ ਫਰੀ ਪਹੁੰਚ ਦੀ ਮੰਗ ਕੀਤੀ ਸੀ, ਜਿਸ ਤੋਂ ਕੈਨੇਡਾ ਨੇ ਨਾਂਹ ਕਰ ਦਿੱਤੀ ਸੀ।