ਕੈਨੇਡਾ ਨੇ ਫਲਸਤੀਨੀਆਂ ’ਤੇ ਹਮਲਾ ਕਰਨ ਦੇ ਦੋਸ਼ ’ਚ ਚਾਰ ਇਜ਼ਰਾਈਲੀ ‘ਕੱਟੜਪੰਥੀ ਵਸਨੀਕਾਂ’ ’ਤੇ ਲਗਾਈ ਪਾਬੰਦੀ

ਕੈਨੇਡਾ ਨੇ ਇਜ਼ਰਾਇਲ ਦੇ ਕਬਜ਼ੇ ਵਾਲੇ ਪੱਛਮੀ ਬੈਂਕ ਵਿਚ ਫਲਸੀਨੀ ਲੋਕਾਂ ’ਤੇ ਹਿੰਸਕ ਹਮਲਾ ਕਰਨ ਵਾਲੇ ਇਜ਼ਰਾਇਲੀ ਕੱਟੜਪੰਥੀਆਂ ਖਿਲਾਫ਼ ਪਾਬੰਦੀਆਂ ਲਗਾਉਣ ਦੀ ਘੋਸ਼ਣਾ ਕੀਤੀ ਹੈ। ਵਿਦੇਸ਼ੀ ਮਾਮਲਿਆਂ ਦੀ ਮੰਤਰੀ ਮੇਲਾਨੀ ਜੋਲੀ ਨੇ ਅੱਜ ਇੱਕ ਪ੍ਰੈਸ ਰਿਲੀਜ਼ ਵਿਚ ਕਿਹਾ ਕਿ ਕੈਨੇਡਾ ਵਿਸ਼ੇਸ਼ ਆਰਥਿਕ ਉਪਾਅ ਐਕਟ ਤਹਿਤ ਇਹ ਨਵੀਂ ਪਾਬੰਦੀ ਲਗਾ ਦਿੱਤੀ ਹੈ। ਇਜ਼ਰਾਇਲੀ ਕੱਟੜਪੰਥੀਆਂ ਖਿਲਾਫ ਇਹ ਇਸ ਤਰ੍ਹਾਂ ਦੀ ਪਹਿਲੀ ਕਾਰਵਾਈ ਹੈ।

ਵਿਦੇਸ਼ੀ ਮਾਮਲਿਆਂ ਦੀ ਮੰਤਰੀ ਨੇ ਕਿਹਾ ਕਿ ਪੱਛਮੀ ਬੈਂਕ ਵਿਚ ਫਲਸੀਨੀ ਲੋਕਾਂ ’ਤੇ ਹਮਲਿਆਂ ਨੂੰ ਲੈ ਕੇ ਕੈਨੇਡਾ ਚਿੰਤਤ ਹੈ ਅਤੇ ਅੱਗੇ ਹੋਰ ਕਾਰਵਾਈ ਕਰੇਗਾ। ਜੋਲੀ ਨੇ ਕਿਹਾ ਕਿ ਇਸ ਤਰ੍ਹਾਂ ਦੇ ਹਮਲੇ ਫਲਸਤੀਨੀ ਲੋਕਾਂ ਦੇ ਮਨੁੱਖੀ ਅਧਿਕਾਰਾਂ ਨੂੰ ਕਮਜ਼ੋਰ ਕਰਦੇ ਹਨ ਅਤੇ ਨਾਲ ਹੀ ਦੋ ਵੱਖ-ਵੱਖ ਮੁਲਕਾਂ ਦੀਆਂ ਸੰਭਾਵਨਾ ਵਿਚ ਅੜਿਕਾ ਪਾਉਂਦੇ ਹਨ। ਮਿਨਿਸਟਰ ਨੇ ਕਿਹਾ ਕਿ ਪੱਛਮੀ ਬੈਂਕ ਵਿਚ ਕੱਟੜਪੰਥੀ ਇਜ਼ਰਾਈਲੀ ਸਮੂਹਾਂ ਵਲੋਂ ਹਮਲਿਆਂ ਵਿਚ ਹਾਲ ਹੀ ਦੇ ਮਹੀਨਿਆਂ ਵਿਚ ਚਿੰਤਾਜਨਕ ਵਾਧਾ ਹੋਇਆ ਹੈ।

ਸੰਯੁਕਤ ਰਾਸ਼ਟਰ ਦੀ ਰਿਪੋਰਟ ਮੁਤਾਬਕ 7 ਅਕਤੂਬਰ, 2023 ਤੋਂ ਬਾਅਦ ਫਲਸਤੀਨੀਆਂ ਖਿਲਾਫ ਘੱਟੋ-ਘੱਟ 800 ਹਮਲੇ ਹੋਏ ਹਨ। ਇਨ੍ਹਾਂ ਹਮਲਿਆਂ ਦੇ ਨਤੀਜੇ ਵਜੋਂ ਫਲਸਤੀਨੀ ਲੋਕਾਂ ਦੇ ਜ਼ਬਰੀ ਉਜਾੜੇ ਵਿਚ ਵਾਧਾ ਹੋਇਆ ਅਤੇ ਖੇਤਰੀ ਸੁਰੱਖਿਆ ਖਤਰੇ ਵਿਚ ਪਈ ਹੈ। ਕੈਨੇਡਾ ਨੇ ਸਿੱਧੇ ਜਾਂ ਅਸਿੱਧੇ ਤੌਰ ’ਤੇ ਫਲਸਤੀਨੀ ਨਾਗਰਿਕਾਂ ਅਤੇ ਉਨ੍ਹਾਂ ਦੀ ਜਾਇਦਾਦ ਵਿਰੁੱਧ ਹਿੰਸਕ ਕਾਰਵਾਈਆਂ ਵਿਚ ਸ਼ਾਮਲ 4 ਇਜ਼ਰਾਇਲੀ ਵਸਨੀਕਾਂ ਨੂੰ ਬੈਨ ਕੀਤਾ ਹੈ। ਜੋਲੀ ਨੇ ਕਿਹਾ ਕਿ ਕੈਨੇਡਾ ਪੱਛਮੀ ਬੈਂਕ ਅਤੇ ਪੂਰਬੀ ਯਰੂਸ਼ਲਮ ਵਿਚ ਗੈਰ-ਕਾਨੂੰਨੀ ਬਸਤੀਆਂ ਦੇ ਵਿਸਥਾਰ ਦਾ ਵਿਰੋਧ ਕਰਦਾ ਹੈ।