17.46C Vancouver 17.46C VancouverFeb 2, 2021 4:36 PM -
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਔਟਵਾ ਵਿੱਚ ਆਪਣੇ ਸੰਬੋਧਨ ਦੌਰਾਨ ਇਹ ਐਲਾਨ ਕੀਤਾ ਕਿ ਫੈਡਰਲ ਸਰਕਾਰ ਅਤੇ ਨੋਵਾਵੈਕਸ ਵਿਚਕਾਰ ਹੋਏ ਸਮਝੌਤੇ ਅਧੀਨ ਕੋਵਿਡ-19 ਦੇ ਵੈਕਸੀਨ ਦਾ ਉਤਪਾਦਨ ਹੁਣ ਕੈਨੇਡਾ ਵਿੱਚ ਕੀਤਾ ਜਾਵੇਗਾ।
ਇਹ ਟੀਕੇ ਮੌਂਟਰੀਅਲ ਦੀ ਨੈਸ਼ਨਲ ਰਿਸਰਚ ਕਾਉਂਸਿਲ ਫ਼ਸੀਲਿਟੀ ਵਿਖੇ ਤਿਆਰ ਕੀਤੇ ਜਾਣਗੇ।
ਕੈਨੇਡਾ ਵਿੱਚ ਨੋਵਾਵੈਕਸ ਦੇ ਟੀਕਿਆਂ ਨੂੰ ਮਨਜ਼ੂਰੀ ਮਿਲਣ ਵਿੱਚ ਘੱਟੋ ਘੱਟ ਦੋ ਮਹੀਨੇ ਦਾ ਸਮਾਂ ਲੱਗ ਸਕਦਾ ਹੈ।
ਨੈਸ਼ਨਲ ਰਿਸਰਚ ਕਾਉਂਸਿਲ ਫ਼ਸੀਲਿਟੀ ਦੀ ਉਸਾਰੀ ਫਿਲਹਾਲ ਚੱਲ ਰਹੀ ਹੈ ਅਤੇ ਤਿਆਰ ਹੋਣ ’ਤੇ ਇਥੇ ਇੱਕ ਮਹੀਨੇ ਵਿੱਚ ਟੀਕਿਆਂ ਦੀਆਂ ਤਕਰੀਬਨ ਦੋ ਮਿਲੀਅਨ ਖੁਰਾਕਾਂ ਦਾ ਉਤਪਾਦਨ ਹੀ ਕੀਤਾ ਜਾ ਸਕੇਗਾ।
ਕੈਨੇਡਾ ਦਾ ਨੋਵਾਵੈਕਸ ਨਾਲ 52 ਮਿਲੀਅਨ ਖੁਰਾਕਾਂ ਖਰੀਦਣ ਦਾ ਕਰਾਰ ਹੈ।
ਟਰੂਡੋ ਮੁਤਾਬਕ ਸਸਕੈਚਵਨ ਅਤੇ ਵੈਨਕੂਵਰ ਵਿਖੇ ਵੀ ਟੀਕਿਆਂ ਦਾ ਉਤਪਾਦਨ ਕਰਨ ਦੀ ਯੋਜਨਾ ਹੈ ਪਰ ਇਸ ਸੰਬੰਧ ਵਿੱਚ ਫਿਲਹਾਲ ਕੋਈ ਕਰਾਰ ਨਹੀਂ ਹੋਇਆ।
ਹੁਣ ਤੱਕ ਕੈਨੇਡਾ ਵਿੱਚ ਟੀਕਿਆਂ ਦਾ ਉਤਪਾਦਨ ਕਰਨ ਦੀ ਅਸਮਰਥਾ ਸਦਕਾ, ਕਨੇਡੀਅਨ ਸਰਕਾਰ ਨੂੰ ਵਿਦੇਸ਼ੀ ਸਰਕਾਰਾਂ ’ਤੇ ਨਿਰਭਰ ਹੋਣਾ ਪੈ ਰਿਹਾ ਸੀ।
ਹੈਲਥ ਕੈਨੇਡਾ ਵਲੋਂ ਮਨਜ਼ੂਰ ਕੀਤੇ ਗਏ ਫਾਈਜ਼ਰ-ਬਾਇਓਐਨਟੈਕ ਅਤੇ ਮੋਡਰਨਾ ਦੇ ਟੀਕੇ ਯੂਰੋਪ ਵਿੱਚ ਤਿਆਰ ਕੀਤੇ ਜਾਂਦੇ ਹਨ।
