24.24C Vancouver 24.24C VancouverDec 18, 2023 5:48 PM - Connect News
ਕੈਨੇਡਾ ਵਿੱਚ 2035 ਤੋਂ ਵਿਕਣ ਵਾਲੀ ਹਰ ਨਵੀਂ ਕਾਰ ਇਲੈਕਟ੍ਰਿਕ ਜਾਂ ਜ਼ੀਰੋ ਨਿਕਾਸ ਹੋਵੇਗੀ। ਫੈਡਰਲ ਸਰਕਾਰ ਇਸ ਸਬੰਧੀ ਨਵੇਂ ਨਿਯਮਾਂ ਦਾ ਐਲਾਨ ਕਰਨ ਜਾ ਰਹੀ ਹੈ।
ਸੂਤਰਾਂ ਮੁਤਾਬਕ ਇਲੈਕਟ੍ਰਿਕ ਵਾਹਨ ਉਪਲਬਧਤਾ ਸਟੈਂਡਰਡ ਨਾਮ ਨਾਲ ਜਾਣੇ ਜਾਂਦੇ ਨਵੇਂ ਨਿਯਮ ਬਾਰੇ ਇਸੇ ਹਫ਼ਤੇ ਐਲਾਨ ਕੀਤਾ ਜਾ ਸਕਦਾ ਹੈ। ਇਨ੍ਹਾਂ ਨਿਯਮਾਂ ਤਹਿਤ ਖਰੀਦਦਾਰਾਂ ਲਈ ਉਡੀਕ ਸਮੇਂ ਨੂੰ ਵੀ ਘਟਾਇਆ ਜਾ ਰਿਹਾ ਹੈ। ਜ਼ੀਰੋ-ਨਿਕਾਸੀ ਵਾਹਨ ਦਾ ਮਤਲਬ ਬੈਟਰੀ ਨਾਲ ਚੱਲਣ ਵਾਲੀਆਂ ਇਲੈਕਟ੍ਰਿਕ ਕਾਰਾਂ, ਪਲੱਗ-ਇਨ ਕਾਰਾਂ ਅਤੇ ਹਾਈਡ੍ਰੋਜਨ ਮਾਡਲ ਦੀ ਵਿਕਰੀ ਨੂੰ ਲਾਜ਼ਮੀ ਤੌਰ 'ਤੇ ਵਧਾਉਣਾ ਹੈ।
ਸੂਤਰਾਂ ਮੁਤਾਬਕ ਸਰਕਾਰ ਦਾ ਇਰਾਦਾ 2026 ਤੋਂ ਕਾਰਾਂ ਦੀ ਕੁੱਲ ਵਿਕਰੀ ਵਿੱਚ ਜ਼ੀਰੋ-ਨਿਕਾਸੀ ਵਾਹਨ ਦੀ ਹਿੱਸੇਦਾਰੀ ਨੂੰ 20 ਫੀਸਦੀ ਤੱਕ ਪਹੁੰਚਾਉਣਾ ਅਤੇ 2030 ਤੋਂ ਇਸ ਨੂੰ 60 ਫੀਸਦੀ ਤੱਕ ਲਿਜਾਣਾ ਹੈ ਅਤੇ 2035 ਤੋਂ 100 ਫੀਸਦੀ ਜ਼ੀਰੋ-ਨਿਕਾਸ ਪੇਸੈਂਜਰ ਕਾਰਾਂ ਦੀ ਵਿਕਰੀ ਨੂੰ ਯਕੀਨੀ ਬਣਾਉਣਾ ਹੈ। ਇਹ ਨਵੇਂ ਨਿਯਮ ਵਾਹਨ ਨਿਰਮਾਤਾ 'ਤੇ ਲਾਗੂ ਹੋਣਗੇ।
ਸੂਤਰਾਂ ਨੇ ਕਿਹਾ ਕਿ ਕੈਨੇਡੀਅਨ ਐਨਵਾਇਰਮੈਂਟਲ ਪ੍ਰੋਟੈਕਸ਼ਨ ਐਕਟ ਤਹਿਤ ਲਾਗੂ ਕੀਤੇ ਜਾਣ ਵਾਲੇ ਨਿਯਮਾਂ ਦੇ ਹੋਰ ਵੇਰਵਿਆਂ ਦਾ ਖੁਲਾਸਾ ਮੰਗਲਵਾਰ ਨੂੰ ਕੀਤਾ ਜਾਵੇਗਾ।
