ਅਮਰੀਕਾ ਨਾਲ ਵਪਾਰਕ ਗੱਲਬਾਤ ਦੌਰਾਨ ਕੈਨੇਡਾ ਫੈਂਟਾਨਿਲ ਜ਼ਾਰ ਦੀ ਨਿਯੁਕਤੀ ਕਰੇਗਾ

ਕੈਨੇਡਾ ਵਲੋਂ ਟਰੰਪ ਦੇ ਟੈਰਿਫ ਰੋਕੇ ਜਾਣ ਦੀ ਸਮਾਂ-ਸੀਮਾ ਸਮਾਪਤ ਹੋਣ ਤੋਂ ਪਹਿਲਾਂ ’ਫੈਂਟਾਨਾਇਲ ਜ਼ਾਰ’ ਦੀ ਨਿਯੁਕਤੀ ਕਰ ਦਿੱਤੀ ਜਾਵੇਗੀ, ਇਹ ਪੁਸ਼ਟੀ ਜਨਤਕ ਸੁਰੱਖਿਆ ਮੰਤਰੀ ਡੇਵਿਡ ਮੈਕਗਿੰਟੀ ਨੇ ਕੀਤੀ।

ਪੀਐੱਮ ਟਰੂਡੋ ਨੇ ਕੈਨੇਡਾ ਅਤੇ ਅਮਰੀਕਾ ਵਿਚਕਾਰ ਵਪਾਰ ਯੁੱਧ ਨੂੰ ਟਾਲਣ ਲਈ ਟਰੰਪ ਨਾਲ ਸੋਮਵਾਰ ਨੂੰ ਅੰਤਿਮ ਸਮੇਂ ਵਿਚ ਕੀਤੇ ਸਮਝੌਤਿਆਂ ਦੌਰਾਨ ਫੈਂਟਾਨਾਇਲ ਜ਼ਾਰ ਦੀ ਨਿਯੁਕਤੀ ਕਰਨ ਦਾ ਫੈਸਲਾ ਲਿਆ ਸੀ। ਇਸ ਤੋਂ ਬਾਅਦ ਟਰੰਪ ਨੇ 4 ਮਾਰਚ ਤੱਕ ਕੈਨੇਡਾ ’ਤੇ ਟੈਰਿਫ ਨੂੰ ਟਾਲ ਦਿੱਤਾ ਅਤੇ ਕਿਹਾ ਕਿ ਕੈਨੇਡਾ ਨੂੰ ਬਾਰਡਰ ’ਤੇ ਆਪਣੇ ਕੰਮਾਂ ਦੀ ਪ੍ਰਗਤੀ ਦਿਖਾਉਣੀ ਹੋਵੇਗੀ।

ਕੈਨੇਡਾ ਨੇ ਫੈਂਟਾਨਾਇਲ ਜ਼ਾਰ ਦੇ ਨਾਲ ਹੀ ਮੈਕਸੀਕਨ ਡਰੱਗ ਸਰਗਨਾਵਾਂ ਨੂੰ ਅੱਤਵਾਦੀ ਵਜੋਂ ਸੂਚੀਬੱਧ ਕਰਨ ਅਤੇ ਸੰਗਠਿਤ ਅਪਰਾਧ ਤੇ ਮਨੀ ਲਾਂਡਰਿੰਗ ਦਾ ਮੁਕਾਬਲਾ ਕਰਨ ਲਈ ਕੈਨੇਡਾ-ਅਮਰੀਕਾ ਦੀ ਸਾਂਝੀ ਸਟ੍ਰਾਈਕ ਫੋਰਸ ਸਥਾਪਿਤ ਕਰਨ ਲਈ 200 ਮਿਲੀਅਨ ਡਾਲਰ ਦੀ ਫੰਡਿੰਗ ਦੇਣ ਦਾ ਵੀ ਵਾਅਦਾ ਕੀਤਾ ਹੈ।

ਜਨਤਕ ਸੁਰੱਖਿਆ ਮੰਤਰੀ ਨੇ ਕਿਹਾ ਕਿ ਫੈਂਟਾਨਾਇਲ ਜ਼ਾਰ ਦੀ ਨਿਯੁਕਤੀ ਨਿਸ਼ਚਿਤ ਤੌਰ ’ਤੇ 4 ਮਾਰਚ ਤੋਂ ਪਹਿਲਾਂ ਹੋ ਜਾਵੇਗੀ। ਸੂਤਰਾਂ ਮੁਤਾਬਕ, ਸਰਕਾਰ ਇਸ ਅਹੁਦੇ ਲਈ ਸਰਵਿੰਗ ਜਾਂ ਸਾਬਕਾ ਪੁਲਿਸ ਅਧਿਕਾਰੀ ਦੀ ਤਲਾਸ਼ ਕਰ ਰਹੀ ਹੈ।