ਕੈਨੇਡਾ ਸਰਕਾਰ ਨੇ ਪਲਾਸਟਿਕ ਪ੍ਰਦੂਸ਼ਣ ਨਾਲ ਨਜਿੱਠਣ ਲਈ ਇਕ ਨਵਾਂ ਟੂਲ ਸ਼ੁਰੂ ਕਰਨ ਦੀ ਕੀਤੀ ਘੋਸ਼ਣਾ

ਕੈਨੇਡਾ ਸਰਕਾਰ ਨੇ ਪਲਾਸਟਿਕ ਪ੍ਰਦੂਸ਼ਣ ਨਾਲ ਨਜਿੱਠਣ ਦੇ ਕਦਮ ਵਜੋਂ ਉਤਪਾਦਕ ਅਤੇ ਇਸ ਨਾਲ ਸਬੰਧਤ ਹੋਰ ਕੰਪਨੀਆਂ ਲਈ ਫੈਡਰਲ ਪਲਾਸਟਿਕ ਰਜਿਸਟਰੀ ਨਾਮ ਦਾ ਇੱਕ ਨਵਾਂ ਟੂਲ ਸ਼ੁਰੂ ਕਰਨ ਦੀ ਘੋਸ਼ਣਾ ਕੀਤੀ ਹੈ, ਜਿਸ ਤਹਿਤ ਉਨ੍ਹਾਂ ਨੂੰ ਪਲਾਸਟਿਕ ਦੇ ਉਤਪਾਦਨ ਦੇ ਸਮੇਂ ਤੋਂ ਇਸ ਦੇ ਜੀਵਨ ਦੇ ਅੰਤ ਤੱਕ ਯਾਨੀ ਪੂਰੇ ਜੀਵਨ ਚੱਕਰ ਨੂੰ ਟਰੈਕ ਕਰਨਾ ਹੋਵੇਗਾ।

ਸਰਕਾਰ ਦਾ ਕਹਿਣਾ ਹੈ ਕਿ ਇਸ ਕਦਮ ਨਾਲ ਪਲਾਸਟਿਕ ਦੀ ਰਹਿੰਦ ਅਤੇ ਪ੍ਰਦੂਸ਼ਣ ਨੂੰ ਬਿਹਤਰ ਢੰਗ ਨਾਲ ਹੱਲ ਕਰਨ ਵਿਚ ਮਦਦ ਮਿਲੇਗੀ। ਓਟਵਾ ਵਿਖੇ ਪਲਾਸਟਿਕ ਪ੍ਰਦੂਸ਼ਣ ਨਾਲ ਸਬੰਧਤ ਇੱਕ ਸੈਸ਼ਨ ਵਿਚ ਵਾਤਾਵਰਣ ਮੰਤਰੀ ਸਟੀਵਨ ਗਿਲਬੌਲਟ ਨੇ ਕਿਹਾ ਕਿ ਪਲਾਸਟਿਕ ਉਤਪਾਦਕ ਨੂੰ ਹੁਣ ਤੋਂ ਹਰ ਸਾਲ ਬਾਜ਼ਾਰ ਵਿਚ ਭੇਜੇ ਜਾਣ ਵਾਲੇ ਪਲਾਸਟਿਕ ਦੀ ਮਾਤਰਾ ਅਤੇ ਕਿਸਮ ਬਾਰੇ ਰਿਪੋਰਟ ਦੇਣੀ ਹੋਵੇਗੀ ਅਤੇ ਇਨ੍ਹਾਂ ਦੀ ਆਰਥਿਕਤਾ ਵਿਚ ਮੂਵਮੈਂਟ ਬਾਰੇ ਤੇ ਨਾਲ ਇਹ ਵੀ ਦੱਸਣਾ ਹੋਵੇਗਾ ਕਿ ਲਾਈਫ ਖ਼ਤਮ ਹੋਣ ’ਤੇ ਇਨ੍ਹਾਂ ਨੂੰ ਕਿਵੇਂ ਮੈਨੇਜ ਕੀਤਾ।

ਸਰਕਾਰ ਦਾ ਕਹਿਣਾ ਹੈ ਕਿ 2019 ਵਿਚ ਕੈਨੇਡੀਅਨਾਂ ਨੇ 4.4 ਮਿਲੀਅਨ ਟਨ ਪਲਾਸਟਿਕ ਕੂੜਾ ਸੁੱਟਿਆ, ਜਿਸ ਵਿਚੋਂ ਸਿਰਫ 9 ਫੀਸਦੀ ਦੀ ਹੀ ਰੀਸਾਈਕਲ ਵਿਚ ਵਰਤੋਂ ਹੋਈ। ਇਸ ਲਈ ਕੈਨੇਡਾ ਸਰਕਾਰ ਪਲਾਸਟਿਕ ਦੇ ਕਚਰੇ ਅਤੇ ਪ੍ਰਦੂਸ਼ਣ ਨੂੰ ਘਟਾਉਣ ਲਈ ਕਾਰਵਾਈ ਕਰ ਰਹੀ ਹੈ।