15.02C Vancouver 15.02C VancouverDec 2, 2024 5:22 PM - Connect Newsroom
ਕੈਨੇਡਾ ਆਪਣੇ ਬਾਰਡਰ ’ਤੇ ਡਰੋਨ, ਹੈਲੀਕਾਪਟਰ ਨਾਲ ਸਖ਼ਤ ਨਿਗਰਾਨੀ ਵਧਾਉਣ ਜਾ ਰਿਹਾ ਹੈ, ਨਾਲ ਹੀ ਬਾਰਡਰ ਸਕਿਓਰਟੀ ਏਜੰਟਸ ਦੀ ਤਾਇਨਾਤੀ ਵੀ ਵਧਾਈ ਜਾਵੇਗੀ। ਪੀਐੱਮ ਜਸਟਿਨ ਟਰੂਡੋ ਨੇ ਅਮਰੀਕਾ ਦੇ ਆਗਾਮੀ ਰਾਸ਼ਟਰਪਤੀ ਡੋਨਲਡ ਟਰੰਪ ਨਾਲ ਮੁਲਾਕਾਤ ਦੌਰਾਨ ਇਹ ਵਾਅਦਾ ਕੀਤਾ ਹੈ।
ਉਹ ਟੈਰਿਫ ਦੇ ਮੁੱਦੇ ਨੂੰ ਸੁਲਝਾਉਣ ਲਈ ਸ਼ੁੱਕਰਵਾਰ ਰਾਤ ਅਚਾਨਕ ਫਲੋਰੀਡਾ ਗਏ ਸਨ, ਜਿੱਥੇ ਉਨ੍ਹਾਂ ਨੇ ਟਰੰਪ ਨਾਲ ਉਨ੍ਹਾਂ ਦੇ ਮਾਰਏਲਾਗੋ ਰਿਜੋਰਟ ਵਿਚ ਮੁਲਾਕਾਤ ਕੀਤੀ। ਇਹ ਮੁਲਾਕਾਤ ਕਰੀਬ ਤਿੰਨ ਘੰਟੇ ਚੱਲੀ।
ਹਾਲਾਂਕਿ, ਪਬਲਿਕ ਸੇਫਟੀ ਮਿਨਿਸਟਰ ਡੋਮਿਨਿਕ ਲੇਬਲੈਂਕ ਨੇ ਮੰਨਿਆ ਕਿ ਕੈਨੇਡਾ ਨੂੰ ਹੁਣ ਤੱਕ ਇਹ ਭਰੋਸਾ ਨਹੀਂ ਮਿਲਿਆ ਕਿ ਟਰੰਪ ਟੈਰਿਫ ਤੋਂ ਪਿੱਛੇ ਹਟਣਗੇ ਜਾਂ ਨਹੀਂ ਪਰ ਮਿਨਿਸਟਰ ਨੇ ਕਿਹਾ ਕਿ ਉਨ੍ਹਾਂ ਦਾ ਮੰਨਣਾ ਹੈ ਕਿ ਕੈਨੇਡਾ ਕੋਲ ਅਜੇ ਵੀ ਆਪਣਾ ਪੱਖ ਰੱਖਣ ਲਈ ਸਮਾਂ ਹੈ ਅਤੇ ਟਰੰਪ ਅਖੀਰ ਇਸ ਗੱਲ ਨੂੰ ਮੰਨਣਗੇ ਕਿ ਟੈਰਿਫ ਲਗਾਉਣ ਦਾ ਕਦਮ ਸਹੀ ਨਹੀਂ ਹੈ।
ਗੌਰਤਲਬ ਹੈ ਕਿ ਕੈਨੇਡਾ ਲਈ ਅਮਰੀਕਾ ਵੱਡਾ ਵਪਾਰਕ ਭਾਈਵਾਲ ਹੈ ਅਤੇ ਟਰੰਪ ਦੇ ਪ੍ਰਸਤਾਵਿਤ 25 ਫੀਸਦੀ ਟੈਰਿਫ ਨਾਲ ਕੈਨੇਡਾ ਦੀ ਆਰਥਕਿਤਾ ਨੂੰ ਭਾਰੀ ਨੁਕਸਾਨ ਦਾ ਖ਼ਤਰਾ ਮੰਡਰਾ ਰਿਹਾ ਹੈ।
ਲੇਬਲੈਂਕ ਨੇ ਕਿਹਾ ਕਿ ਉਨ੍ਹਾਂ ਦੀ ਟੀਮ ਟਰੰਪ ਪ੍ਰਸ਼ਾਸਨ ਨਾਲ ਗੱਲਬਾਤ ਜਾਰੀ ਰੱਖੇਗੀ ਅਤੇ ਉਨ੍ਹਾਂ ਨੂੰ ਭਰੋਸੇ ਵਿਚ ਲਵੇਗੀ ਕਿ ਇਸ ਤਰ੍ਹਾਂ ਦਾ ਕਦਮ ਨਾ ਤਾਂ ਉਨ੍ਹਾਂ ਦੇ ਹਿੱਤ ਵਿਚ ਹੈ ਅਤੇ ਨਾ ਹੀ ਕੈਨੇਡਾ ਦੇ ਹਿੱਤ ਵਿਚ ਹੈ।
