17.63C Vancouver 17.63C VancouverJul 31, 2026 1:50 PM - Connect Newsroom - Ramanpreet kaur with files from The Canadian Press
ਕੈਨੇਡੀਅਨ ਅਰਥਵਿਵਸਥਾ ਵਿਚ ਪਿਛਲੇ ਤਿੰਨ ਸਾਲਾਂ ਦਾ ਸਭ ਤੋਂ ਮਜ਼ਬੂਤ ਉਛਾਲ ਦੇਖਣ ਨੂੰ ਮਿਲ ਰਿਹਾ ਹੈ, ਸ਼ੁੱਕਰਵਾਰ ਨੂੰ ਸਟੈਟਿਸਟਿਕਸ ਵਿਭਾਗ ਵਲੋਂ ਜਾਰੀ ਅੰਕੜਿਆਂ ਮੁਤਾਬਕ, ਮਈ ਵਿਚ ਆਰਥਿਕਤਾ 0.1 ਫੀਸਦੀ ਦੀ ਉਮੀਦ ਨਾਲੋਂ 0.3 ਫੀਸਦੀ ਦੀ ਬਿਹਤਰ ਦਰ ਨਾਲ ਵਧੀ ਹੈ, ਜੋ ਅਪ੍ਰੈਲ ਦੇ 0.6 ਫੀਸਦੀ ਦੇ ਵਾਧੇ ਤੋਂ ਬਾਅਦ ਲਗਾਤਾਰ ਦੂਜੀ ਮਹੀਨਾਵਾਰ ਤੇਜ਼ੀ ਹੈ।
ਇਸ ਤਾਜ਼ਾ ਅੰਕੜੇ ਦੇ ਨਾਲ ਹੀ ਦੂਜੇ ਤਿਮਾਹੀ ਵਿਚ ਸਾਲਾਨਾ ਵਿਕਾਸ ਦਰ 3.4 ਫੀਸਦੀ ਤੱਕ ਪਹੁੰਚਣ ਦਾ ਅਨੁਮਾਨ ਲਗਾਇਆ ਗਿਆ ਹੈ। ਸਟੈਟਕੈਨ ਦੇ ਅੰਕੜਿਆਂ ਮੁਤਾਬਕ, ਇਸ ਸ਼ਾਨਦਾਰ ਰਿਕਵਰੀ ਨੂੰ ਮੁੱਖ ਤੌਰ 'ਤੇ ਮਾਈਨਿੰਗ ਅਤੇ ਤੇਲ-ਗੈਸ ਸੈਕਟਰ ਵਿਚ ਆਈ 1.0 ਫੀਸਦੀ ਦੀ ਮਜ਼ਬੂਤੀ, ਕੰਸਟ੍ਰਕਸ਼ਨ ਵਿਚ 0.8 ਫੀਸਦੀ ਅਤੇ ਮੈਨੂਫੈਕਚਰਿੰਗ ਸੈਕਟਰ ਵਿਚ ਹੋਏ 0.3 ਫੀਸਦੀ ਦੇ ਲਗਾਤਾਰ ਸੁਧਾਰ ਨੇ ਵੱਡਾ ਹੁਲਾਰਾ ਦਿੱਤਾ ਹੈ, ਜਿਸ ਨਾਲ ਦੇਸ਼ ਸਿਰੋਂ ਮੰਦੀ ਦੇ ਬੱਦਲ ਪੂਰੀ ਤਰ੍ਹਾਂ ਛੱਟ ਗਏ ਹਨ।
ਇਸ ਗ੍ਰੋਥ ਵਿਚ Real estate ਗਤੀਵਿਧੀਆਂ ਵਿਚ ਆਈ 5.1 ਫੀਸਦੀ ਦੀ ਤੇਜ਼ੀ ਵੀ ਸ਼ਾਮਲ ਹੈ, ਸਟੈਟਕੈਨ ਮੁਤਾਬਕ, ਖਾਸ ਕਰ ਓਨਟਾਰੀਓ ਅਤੇ ਬ੍ਰਿਟਿਸ਼ ਕੋਲੰਬੀਆ ਦੀ ਹਾਊਸਿੰਗ ਮਾਰਕੀਟ ਵਿਚ ਹੋਏ ਵਾਧੇ ਨੇ ਇਸ ਸੈਕਟਰ ਦੀ ਅਗਵਾਈ ਕੀਤੀ ਹੈ। ਏਜੰਸੀ ਦੇ ਮੁੱਢਲੇ ਅਨੁਮਾਨਾਂ ਵਿਚ ਜੂਨ ਵਿਚ ਵੀ GDP ਵਿਚ 0.2 ਫੀਸਦੀ ਵਾਧੇ ਦੀ ਉਮੀਦ ਜਤਾਈ ਗਈ ਹੈ।
