15.86C Vancouver 15.86C VancouverApr 22, 2025 6:48 PM - Connect Newsroom
ਕੈਨੇਡਾ ਵਿਚ ਫੈਡਰਲ ਚੋਣ ਮੁਹਿੰਮ ਆਖਰੀ ਹਫ਼ਤੇ ਵਿਚ ਦਾਖ਼ਲ ਹੋਣ ਵਿਚਕਾਰ ਦੋ ਪ੍ਰਮੁੱਖ ਪਾਰਟੀਆਂ ਵਿਚ ਅਗਲੀ ਸਰਕਾਰ ਬਣਾਉਣ ਦੀ ਦੌੜ ਪਹਿਲਾਂ ਨਾਲੋਂ ਕਿਤੇ ਜ਼ਿਆਦਾ ਸਖ਼ਤ ਹੋ ਗਈ ਹੈ। ਇਪਸੋਸ ਦੇ ਤਾਜ਼ਾ ਸਰਵੇ ਮੁਤਾਬਕ, ਲਿਬਰਲ ਅਜੇ ਵੀ ਲੀਡ ਵਿਚ ਹਨ ਪਰ ਹੁਣ ਉਹ ਕੰਜ਼ਰਵੇਟਿਵ ਤੋਂ ਸਿਰਫ਼ ਤਿੰਨ ਅੰਕ ਅੱਗੇ ਹਨ।
ਇਪਸੋਸ ਨੇ ਇਹ ਸਰਵੇ ਪਿਛਲੇ ਹਫ਼ਤੇ 4 ਪ੍ਰਮੁੱਖ ਪਾਰਟੀਆਂ ਦੇ ਪ੍ਰਧਾਨ ਵਿਚਕਾਰ ਹੋਈ ਟੈਲੀਵਿਜ਼ਨ ਬਹਿਸ ਤੋਂ ਬਾਅਦ ਕੀਤਾ, ਜਿਸ ਵਿਚ 41 ਫੀਸਦੀ ਕੈਨੇਡੀਅਨਾਂ ਨੇ ਲਿਬਰਲਸ ਨੂੰ ਵੋਟ ਦੇਣ ਦੀ ਗੱਲ ਆਖੀ, ਜਦੋਂ ਕਿ 38 ਫੀਸਦੀ ਨੇ ਕਿਹਾ ਕਿ ਉਹ ਕੰਜ਼ਰਵੇਟਿਵ ਨੂੰ ਚੁਣਨਗੇ। ਉਥੇ ਹੀ, ਨਿਊ ਡੈਮੋਕਰੇਟ ਦੀ ਸਪੋਰਟ 12 ਫੀਸਦੀ ਦਰਜ ਕੀਤੀ ਗਈ। ਦੋ ਹਫ਼ਤੇ ਪਹਿਲਾਂ ਤੱਕ ਲਿਬਰਲ ਕੰਜ਼ਰਵੇਟਿਵ 'ਤੇ 12 ਅੰਕ ਦੀ ਲੀਡ ਬਣਾਏ ਹੋਏ ਸਨ।
ਉਥੇ ਹੀ ਪ੍ਰਧਾਨ ਮੰਤਰੀ ਦੇ ਰੂਪ ਵਿਚ ਪਸੰਦੀਦਾ ਉਮੀਦਵਾਰ ਵਜੋਂ ਕਾਰਨੀ- ਪੋਲੀਐਵ ਤੋਂ ਅੱਗੇ ਚੱਲ ਰਹੇ ਹਨ। ਇਪਸੋਸ ਮੁਤਾਬਕ, ਪ੍ਰਧਾਨ ਮੰਤਰੀ ਦੇ ਰੂਪ ਵਿਚ ਕਾਰਨੀ ਨੂੰ 41 ਫੀਸਦੀ ਨੇ ਸਪੋਰਟ ਕੀਤਾ ਹੈ ਜਦੋਂ ਕਿ ਪੋਲੀਐਵ ਨੂੰ 36 ਫੀਸਦੀ ਨੇ ਸਮਰਥਨ ਦਿੱਤਾ ਹੈ ਅਤੇ ਪਿਛਲੇ ਹਫ਼ਤੇ ਤੋਂ ਇਸੇ ਤਰ੍ਹਾਂ ਬਰਕਰਾਰ ਹੈ।
