ਕੈਨੇਡਾ 'ਚ ਗੈਸੋਲੀਨ ਅਤੇ ਟਰੈਵਲ ਟੂਰ ਕੀਮਤਾਂ ਵਿਚ ਗਿਰਾਵਟ ਕਾਰਨ ਮਹਿੰਗਾਈ ਦਰ 'ਚ ਆਈ ਕਮੀ

ਕੈਨੇਡਾ ਨੇ ਗੈਸੋਲੀਨ ਅਤੇ ਟਰੈਵਲ ਟੂਰ ਕੀਮਤਾਂ ਵਿਚ ਗਿਰਾਵਟ ਕਾਰਨ ਮਾਰਚ ਵਿਚ ਮਹਿੰਗਾਈ ਦਰ ਵਿਚ ਕਮੀ ਦਰਜ ਕੀਤੀ ਹੈ। ਸਟੈਟਿਸਟਿਕਸ ਕੈਨੇਡਾ ਨੇ ਮੰਗਲਵਾਰ ਨੂੰ ਕਿਹਾ ਕਿ ਪਿਛਲੇ ਮਹੀਨੇ ਸਾਲਾਨਾ ਮਹਿੰਗਾਈ ਦਰ 2.3 ਫੀਸਦੀ ਰਹੀ, ਜੋ ਫਰਵਰੀ ਵਿਚ 2.6 ਫੀਸਦੀ 'ਤੇ ਪਹੁੰਚ ਗਈ ਸੀ।

ਏਜੰਸੀ ਨੇ ਕਿਹਾ ਕਿ ਟਰੰਪ ਦੀਆਂ ਕੈਨੇਡਾ ਖਿਲਾਫ ਟੈਰਿਫ ਧਮਕੀਆਂ ਕਾਰਨ ਕੈਨੇਡੀਅਨਾਂ ਨੇ ਅਮਰੀਕਾ ਦੀਆਂ ਯਾਤਰਾਵਾਂ ਨੂੰ ਘੱਟ ਕੀਤਾ ਹੈ ਜਿਸ ਨਾਲ ਹਵਾਈ ਕਿਰਾਏ ਵਿਚ ਵੀ ਗਿਰਾਵਟ ਆਈ। ਮਹਿੰਗਾਈ ਦੇ ਤਾਜ਼ਾ ਅੰਕੜੇ ਉਦੋਂ ਆਏ ਹਨ ਜਦੋਂ ਬੁੱਧਵਾਰ ਨੂੰ ਬੈਂਕ ਆਫ ਕੈਨੇਡਾ ਵਿਆਜ ਦਰ ਬਾਰੇ ਆਪਣਾ ਫੈਸਲਾ ਜਾਰੀ ਕਰਨ ਵਾਲਾ ਹੈ।

ਮੁਦਰਾ ਬਾਜ਼ਾਰ ਦਾ ਅਨੁਮਾਨ ਹੈ ਕਿ ਸੈਂਟਰਲ ਬੈਂਕ ਵਲੋਂ ਲਗਾਤਾਰ 7 ਵਾਰ ਵਿਆਜ ਦਰਾਂ ਵਿਚ ਕਟੌਤੀ ਕਰਨ ਤੋਂ ਬਾਅਦ ਇਸ ਵਾਰ ਵਿਆਜ ਦਰਾਂ ਵਿਚ ਹੋਰ ਕਟੌਤੀ 'ਤੇ ਵਿਰਾਮ ਲਗਾਏ ਜਾਣ ਦੀ ਸੰਭਾਵਨਾ ਕਰੀਬ 60 ਫੀਸਦੀ ਹੈ।

ਸਟੈਟਿਸਟਿਕਸ ਕੈਨੇਡਾ ਦੀ ਰਿਪੋਰਟ ਮੁਤਾਬਕ, ਮਾਰਚ ਵਿਚ ਬੇਸ਼ੱਕ ਕੁੱਲ ਮਿਲਾ ਕੇ ਮਹਿੰਗਾਈ ਹੋਲੀ ਹੋਈ ਪਰ ਸਾਲਾਨਾ ਆਧਾਰ 'ਤੇ ਖਾਣ-ਪੀਣ ਦੀਆਂ ਕੀਮਤਾਂ ਵਿਚ 3.2 ਫੀਸਦੀ ਅਤੇ ਅਲਕੋਹਲ ਵਾਲੇ ਪੀਣ ਵਾਲੇ ਪਦਾਰਥ ਵਿਚ 2.4 ਫੀਸਦੀ ਦਾ ਵਾਧਾ ਹੋਇਆ ਹੈ।