14.14C Vancouver 14.14C VancouverAug 15, 2023 6:24 PM - Connect News
ਕੈਨੇਡਾ ਵਿਚ ਮੁੜ ਤੋਂ ਮਹਿੰਗਾਈ ਨੇ ਉਛਾਲ ਦਰਜ ਕਰਨਾ ਸ਼ੁਰੂ ਕਰ ਦਿੱਤਾ ਹੈ।
ਸਟੈਟਿਸਟਿਕਸ ਕੈਨੇਡਾ ਵਲੋਂ ਮੰਗਲਵਾਰ ਨੂੰ ਜਾਰੀ ਕੀਤੀ ਗਈ ਰਿਪੋਰਟ ਮੁਤਾਬਕ, ਜੁਲਾਈ ਵਿਚ ਮਹਿੰਗਾਈ 3.3 ਫੀਸਦੀ 'ਤੇ ਪਹੁੰਚ ਗਈ, ਜੋ ਜੂਨ ਵਿਚ ਮਾਰਚ 2021 ਤੋਂ ਬਾਅਦ ਪਹਿਲੀ ਵਾਰ 2.8 ਫੀਸਦੀ 'ਤੇ ਆਈ ਸੀ।
StatCan ਮੁਤਾਬਕ, ਉੱਚ ਗੈਸ ਦੀਆਂ ਕੀਮਤਾਂ ਨੇ ਮਹਿੰਗਾਈ ਨੂੰ ਵਧਾਉਣ ਵਿਚ ਯੋਗਦਾਨ ਪਾਇਆ।
ਇਸ ਦੌਰਾਨ ਗ੍ਰੋਸਰੀ ਸਟੋਰਾਂ 'ਤੇ ਭੋਜਨ ਦੀਆਂ ਕੀਮਤਾਂ ਵਿਚ 8.5 ਫੀਸਦੀ ਦਾ ਵਾਧਾ ਦਰਜ ਕੀਤਾ ਗਿਆ, ਪਰ ਜੂਨ ਵਿਚ ਵੇਖੇ ਗਏ 9.1 ਫੀਸਦੀ ਉਛਾਲ ਨਾਲੋਂ ਜੁਲਾਈ ਵਿਚ ਭੋਜਨ ਦੀਆਂ ਕੀਮਤਾਂ ਮੱਧਮ ਰਫ਼ਤਾਰ ਨਾਲ ਵਧੀਆਂ ਹਨ।
ਇਕੌਨੋਮਿਸਟਾਂ ਨੇ ਪਹਿਲਾਂ ਹੀ ਅਨੁਮਾਨ ਲਗਾਇਆ ਸੀ ਕਿ ਜੁਲਾਈ ਮਹੀਨੇ ਵਿਚ ਮਹਿੰਗਾਈ ਦਰ ਵਿਚ ਉਛਾਲ ਦੇਖਣ ਨੂੰ ਮਿਲ ਸਕਦਾ ਹੈ।
BMO ਅਤੇ CIBC ਨੇ ਉੱਚ ਗੈਸੋਲੀਨ ਕੀਮਤਾਂ ਕਾਰਨ ਜੁਲਾਈ ਵਿਚ ਮਹਿੰਗਾਈ 3.1 'ਤੇ ਪਹੁੰਚਣ ਦਾ ਅਨੁਮਾਨ ਲਗਾਇਆ ਸੀ ਅਤੇ ਕਿਹਾ ਸੀ ਕਿ ਇਸ ਦੇ ਬਾਵਜੂਦ ਬੈਂਕ ਔਫ ਕੈਨੇਡਾ ਵਲੋਂ ਵਿਆਜ ਦਰਾਂ ਵਿਚ ਹੋਰ ਵਾਧਾ ਕਰਨ ਦੀ ਉਮੀਦ ਨਹੀਂ ਕਿਉਂਕਿ ਬੇਰੁਜ਼ਗਾਰੀ ਵਿਚ ਵਾਧਾ ਜਾਰੀ ਰਹਿਣ ਦੀ ਸੰਭਾਵਨਾ ਹੈ, ਜੋ ਤਿੰਨ ਮਹੀਨਿਆਂ ਦੌਰਾਨ 5 ਤੋਂ ਵਧ ਕੇ 5.5 ਫੀਸਦੀ ਹੋ ਚੁੱਕੀ ਹੈ।
ਗੌਰਤਲਬ ਹੈ ਕਿ ਸੈਂਟ੍ਰਲ ਬੈਂਕ ਵਲੋਂ ਅਗਲਾ ਵਿਆਜ ਦਰ ਦਾ ਫੈਸਲਾ 6 ਸਤੰਬਰ ਨੂੰ ਲਿਆ ਜਾਣਾ ਹੈ ਅਤੇ ਉਸ ਤੋਂ ਪਹਿਲਾਂ ਜੌਬਸ ਦੇ ਅੰਕੜੇ ਵੀ ਮਹੱਤਵਪੂਰਨ ਹੋਣਗੇ।
