ਕੈਨੇਡਾ ਦੀਆਂ ਵੱਡੀਆਂ ਬੈਂਕਾਂ ਨੇ ਵਿੱਤੀ ਨਤੀਜੇ ਕੀਤੇ ਜਾਰੀ ,ਜਾਣੋ ਕਿਸਨੂੰ ਕਿੰਨਾ ਹੋਇਆ ਮੁਨਾਫ਼ਾ

ਕੈਨੇਡਾ ਦੀਆਂ ਵੱਡੀਆਂ ਬੈਂਕਾਂ ਆਰਬੀਸੀ, ਸੀਆਈਬੀਸੀ ਅਤੇ ਟੋਰਾਂਟੋ-ਡੋਮੀਨੀਅਨ ਬੈਂਕ ਨੇ ਵੀਰਵਾਰ ਨੂੰ ਆਪਣੇ ਵਿੱਤੀ ਨਤੀਜੇ ਜਾਰੀ ਕੀਤੇ। ਚੌਥੀ ਤਿਮਾਹੀ ਵਿੱਚ ਜਿੱਥੇ ਦੋ ਬੈਂਕਾਂ ਨੇ ਪਿਛਲੀ ਵਾਰ ਨਾਲੋਂ ਵਾਧਾ ਦਰਜ ਕੀਤਾ ਹੈ ਉੱਥੇ ਹੀ ਟੋਰਾਂਟੋ-ਡੋਮੀਨੀਅਨ ਬੈਂਕ ਨੇ ਸਾਲ ਪਹਿਲਾਂ ਦੇ ਮੁਕਾਬਲੇ ਗਿਰਾਵਟ ਰਿਪੋਰਟ ਕੀਤੀ ਹੈ।

ਇਸ ਦੇ ਨਾਲ ਹੀ TD ਬੈਂਕ ਨੇ ਆਪਣੀ ਵਰਕ ਫ਼ੋਰਸ ਵਿੱਚ 3 ਫੀਸਦੀ ਕਟੌਤੀ ਕਰਨ ਦਾ ਫੈਸਲਾ ਕੀਤਾ ਹੈ ਅਤੇ ਚੌਥੀ ਤਿਮਾਹੀ ਵਿੱਚ 500 ਤੋਂ ਵੱਧ ਨੌਕਰੀਆਂ ਘਟਾਈਆਂ ਹਨ। ਟੋਰਾਂਟੋ-ਡੋਮੀਨੀਅਨ ਬੈਂਕ ਨੇ ਕਿਹਾ ਕਿ 31 ਅਕਤੂਬਰ ਨੂੰ ਸਮਾਪਤ ਹੋਈ ਤਿਮਾਹੀ ਵਿੱਚ ਉਸ ਦਾ ਲਾਭ $2.89 ਬਿਲੀਅਨ ਰਿਹਾ ਜੋ ਸਾਲ ਪਹਿਲਾਂ ਇਸੇ ਤਿਮਾਹੀ ਵਿੱਚ $6.67 ਬਿਲੀਅਨ ਸੀ।

ਹਾਲਾਂਕਿ ਇਸ ਦੇ ਬਾਵਜੂਦ ਬੈਂਕ ਨੇ ਪ੍ਰਤੀ ਸ਼ੇਅਰ $1.02 ਲਾਭਅੰਸ਼ ਦੇਣ ਦਾ ਫੈਸਲਾ ਕੀਤਾ ਹੈ। ਉੱਥੇ ਹੀ ਰਾਇਲ ਬੈਂਕ ਆਫ ਕੈਨੇਡਾ ਦਾ ਪ੍ਰੋਫਿਟ $4.13 ਬਿਲੀਅਨ ਰਿਹਾ। ਜੋ ਬੀਤੇ ਸਾਲ ਇਸ ਦੌਰਾਨ $3.88 ਬਿਲੀਅਨ ਸੀ। ਆਰਬੀਸੀ ਆਪਣੇ ਸ਼ੇਅਰਧਾਰਕਾਂ ਨੂੰ $1.38 ਪ੍ਰਤੀ ਸ਼ੇਅਰ ਲਾਭਅੰਸ਼ ਦੇਵੇਗਾ।

ਸੀਆਈਬੀਸੀ ਨੇ ਸ਼ੇਅਰਧਾਰਕਾਂ ਨੂੰ 90 ਸੈਂਟ ਪ੍ਰਤੀ ਸ਼ੇਅਰ ਲਾਭਅੰਸ਼ ਦੇਣ ਦਾ ਫੈਸਲਾ ਕੀਤਾ ਹੈ। ਸੀਆਈਬੀਸੀ ਨੇ ਕਿਹਾ ਕਿ 31 ਅਕਤੂਬਰ ਨੂੰ ਖ਼ਤਮ ਹੋਈ ਤਿਮਾਹੀ ਵਿੱਚ ਉਸ ਨੇ $1.48 ਬਿਲੀਅਨ ਲਾਭ ਕਮਾਇਆ, ਜਦੋਂ ਕਿ ਸਾਲ ਪਹਿਲਾਂ ਇਸੇ ਤਿਮਾਹੀ ਵਿੱਚ ਇਹ ਲਗਭਗ $1.19ਬਿਲੀਅਨ ਸੀ।