ਕੈਨੇਡਾ ਦੀ ਸਵੀਮਰ ਸਮਰ ਮੈਕਿੰਟੋਸ਼ ਨੇ ਪੈਰਿਸ ਓਲੰਪਿਕ ਵਿਚ ਰਚਿਆ ਇਤਿਹਾਸ

ਕੈਨੇਡਾ ਦੀ ਸਵੀਮਰ ਸਮਰ ਮੈਕਿੰਟੋਸ਼ ਨੇ ਪੈਰਿਸ ਓਲੰਪਿਕ ਵਿਚ ਇਤਿਹਾਸ ਰਚ ਦਿੱਤਾ ਹੈ। ਟੋਰਾਂਟੋ ਦੀ ਇਸ 17 ਸਾਲਾ ਖਿਡਾਰੀ ਨੇ ਅੱਜ 200 ਮੀਟਰ ਬਟਰਫਲਾਈ ਤੈਰਾਕੀ ਮੁਕਾਬਲੇ ਵਿਚ 2 ਮਿੰਟ 3.03 ਸੈਕਿੰਡ ਦੇ ਸਮੇਂ ਨਾਲ ਓਲੰਪਿਕ ਰਿਕਾਰਡ ਕਾਇਮ ਕਰਦੇ ਹੋਏ ਇੱਕ ਹੋਰ ਗੋਲਡ ਮੈਡਲ ਕੈਨੇਡਾ ਦੇ ਨਾਮ ਕਰ ਦਿੱਤਾ।

ਉਥੇ ਹੀ, ਅਮਰੀਕਨ ਖਿਡਾਰੀ ਰੀਗਨ ਸਮਿਥ ਨੇ ਇਸ ਵਿਚ ਸਿਲਵਰ ਅਤੇ ਚੀਨ ਦੀ ਖਿਡਾਰੀ ਨੇ ਕਾਂਸੀ ਮੈਡਲ ਪ੍ਰਾਪਤ ਕੀਤਾ। ਸਮਰ ਮੈਕਿੰਟੋਸ਼ ਦੇ ਪੈਰਿਸ ਓਲਿੰਪਕ ਵਿਚ ਤਿੰਨ ਮੈਡਲ ਹੋ ਗਏ ਹਨ।

ਸਮਰ ਮੈਕਿੰਟੋਸ਼ ਨੇ ਸ਼ਨੀਵਾਰ 400 ਮੀਟਰ ਫਰੀਸਟਾਈਲ ਮੁਕਾਬਲੇ ਵਿਚ ਕੈਨੇਡਾ ਲਈ ਪਹਿਲਾ ਸਿਲਵਰ ਮੈਡਲ ਜਿੱਤ ਕੇ ਪੈਰਿਸ ਓਲਿੰਪਕ ਸਫਰ ਦੀ ਸ਼ੁਰੂਆਤ ਕੀਤੀ ਸੀ।

ਇਸ ਤੋਂ ਬਾਅਦ ਉਸ ਨੇ ਮੰਗਲਵਾਰ 400-ਮੀਟਰ ਵਿਅਕਤੀਗਤ ਮੈਡਲੇ ਵਿਚ ਗੋਲਡ ਜਿੱਤਿਆ ਅਤੇ ਹੁਣ ਇੱਕ ਹੋਰ ਗੋਲਡ ਜਿੱਤ ਕੇ ਕੈਨੇਡਾ ਦਾ ਨਾਮ ਰੁਸ਼ਨਾ ਦਿੱਤਾ ਹੈ।ਜਿਵੇਂ ਹੀ ਉਸ ਨੇ ਵਾਲ ਨੂੰ ਟੱਚ ਕੀਤਾ ਉਸ ਦੀ ਮਾਂ ਜਿੱਲ ਮੈਕਿੰਟੋਸ਼ ਅਤੇ ਪਿਤਾ ਗ੍ਰੇਗ ਮੈਕਿੰਟੋਸ਼ ਦੀ ਖੁਸ਼ੀ ਦਾ ਟਿਕਾਣਾ ਨਹੀਂ ਰਿਹਾ।

ਸਮਰ ਮੈਕਿੰਟੋਸ਼ ਦੀ ਮਾਂ ਜਿੱਲ ਮੈਕਿੰਟੋਸ਼ ਨੇ ਵੀ 1984 ਦੀਆਂ ਲਾਸ ਏਂਜਲਸ ਓਲੰਪਿਕ ਵਿਚ ਕੈਨੇਡਾ ਲਈ ਤੈਰਾਕੀ ਕੀਤੀ ਸੀ। ਮੈਕਿੰਟੋਸ਼ ਸ਼ਨੀਵਾਰ ਨੂੰ 200-ਮੀਟਰ ਵਿਅਕਤੀਗਤ ਮੈਡਲੇ ਮੁਕਾਬਲੇ ਵਿਚ ਵੀ ਹਿੱਸਾ ਲਵੇਗੀ।