ਕੈਨੇਡੀਅਨ ਗ੍ਰੋਸਰਜ਼ ਨੇ ਕੀਮਤਾਂ ਨੂੰ ਸਥਿਰ ਕਰਨ ਬਾਰੇ ਨਹੀਂ ਦਿੱਤਾ ਕੋਈ ਜਵਾਬ

ਕੈਨੇਡਾ ਵਿੱਚ ਵੱਡੇ ਗ੍ਰੋਸਰਜ਼ ਨੇ ਅਜੇ ਤੱਕ ਇਸ ਗੱਲ ਦੀ ਪੁਸ਼ਟੀ ਨਹੀਂ ਕੀਤੀ ਕਿ ਉਹ ਗਰੌਸਰੀ ਦੀਆਂ ਕੀਮਤਾਂ ਨੂੰ ਸਥਿਰ ਕਰਨ ਲਈ ਵਚਨਬੱਧ ਹੈ।

ਜਿਵੇਂ ਕਿ ਹਾਲ ਵਿੱਚ ਇੰਡਸਟਰੀ ਮਿਨਿਸਟਰ ਫ਼੍ਰੈਂਸੁਆ ਫ਼ਿਲਿਪ ਸ਼ੈਂਪੇਨ ਨੇ ਕਿਹਾ ਸੀ ਕਿ ਦੇਸ਼ ਦੇ ਪੰਜ ਵੱਡੇ ਗ੍ਰੋਸਰਜ਼ ਨੇ ਭੋਜਨ ਦੀਆਂ ਕੀਮਤਾਂ ਵਿੱਚ ਸਥਿਰਤਾ ਲਿਆਉਣ ਲਈ ਫ਼ੈਡਰਲ ਸਰਕਾਰ ਨੂੰ ਆਪਣੀਆਂ ਯੋਜਨਾਵਾਂ ਪੇਸ਼ ਕੀਤੀਆਂ ਹਨ।

ਸ਼ੈਂਪੇਨ ਨੇ ਕਿਹਾ ਕਿ ਗ੍ਰੋਸਰੀ ਚੇਨਜ਼ ਨੇ ਵਧੇਰੇ ਡਿਸਕਾਊਂਟ ਦੇਣ, ਕੀਮਤ ਵਾਧਿਆਂ ’ਤੇ ਰੋਕ ਲਾਉਣ ਅਤੇ ਹੋਰ ਸਸਤੇ ਸਟੋਰਾਂ ਨਾਲ ਕੀਮਤਾਂ-ਮੈਚ ਕਰਨ ਦੀ ਮੁਹਿੰਮ ਚਲਾਉਣ ਦਾ ਵਾਅਦਾ ਕੀਤਾ ਹੈ।

ਕੈਨੇਡੀਅਨ ਪ੍ਰੈੱਸ ਨੇ ਇਹ ਪੁਸ਼ਟੀ ਕਰਨ ਲਈ ਕਿ ਲੌਬਲੌਜ਼, ਮੈਟਰੋ, ਐਮਪਾਇਅਰ ,ਕੌਸਕੋ ਅਤੇ ਵੌਲਮਾਰਟ ਤੱਕ ਪਹੁੰਚ ਕੀਤੀ ਹੈ।ਮੈਟਰੋ ਨੇ ਇਸ 'ਤੇ ਕੋਈ ਵੀ ਟਿੱਪਣੀ ਕਰਨ ਤੋਂ ਇਨਕਾਰ ਕਰ ਦਿੱਤਾ।

ਜਦੋਂ ਕਿ ਲੌਬਲੌਜ਼, ਐਮਪਾਇਅਰ ਅਤੇ ਕੌਸਕੋ ਨੇ ਵੀ ਇਸ ਬਾਰੇ ਕੋਈ ਜਵਾਬ ਨਹੀਂ ਦਿੱਤਾ ਹੈ।

ਵੌਲਮਾਰਟ ਕੈਨੇਡਾ ਦੇ ਇੱਕ ਬੁਲਾਰੇ ਨੇ ਕਿਹਾ ਕਿ ਕੰਪਨੀ ਨੇ ਹਰ ਰੋਜ਼ ਘੱਟ ਕੀਮਤਾਂ ਦੀ ਪੇਸ਼ਕਸ਼ ਜਾਰੀ ਰੱਖਣ ਦੀ ਸਰਕਾਰ ਦੀਆਂ ਯੋਜਨਾਵਾਂ ਨੂੰ ਸਾਂਝਾ ਕੀਤਾ ਹੈ।

ਗੌਰਤਲਬ ਹੈ ਕਿ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਲੌਬਲੌਜ਼ ਵਰਗੇ ਵੱਡੇ ਗਰੌਸਰਸ ਨੂੰ ਥੈਂਕਸਗਿਵੰਗ ਤੱਕ ਕੀਮਤਾਂ ਨੂੰ ਘੱਟ ਕਰਨ ਬਾਰੇ ਪਲੈਨ ਪੇਸ਼ ਕਰਨ ਦਾ ਅਲਟੀਮੇਟਮ ਦਿੱਤਾ ਸੀ ਅਤੇ ਕਿਹਾ ਸੀ ਕਿ ਜੇ ਅਜਿਹਾ ਨਹੀਂ ਹੁੰਦਾ ਤਾਂ ਸਰਕਾਰ ਉਹਨਾਂ ਦੇ ਪ੍ਰੋਫਿਟਸ 'ਤੇ ਟੈਕਸ ਲਗਾਏਗੀ।