ਕੈਨੇਡਾ ਭਰ ਵਿੱਚ ਅਕਤੂਬਰ ਮਹੀਨੇ ਘਰਾਂ ਦੀ ਵਿਕਰੀ ਵਿੱਚ ਹੋਇਆ ਵਾਧਾ

ਕੈਨੇਡਾ ਵਿਚ ਅਕਤੂਬਰ ਦੌਰਾਨ ਰਾਸ਼ਟਰੀ ਪੱਧਰ 'ਤੇ 40,000 ਤੋਂ ਵੱਧ ਘਰਾਂ ਦੀ ਵਿਕਰੀ ਹੋਈ ਹੈ, ਜੋ ਸਤੰਬਰ ਤੋਂ 0.9 ਫੀਸਦੀ ਦਾ ਵਾਧਾ ਹੈ। ਇਹ ਪਿਛਲੇ ਸੱਤ ਮਹੀਨਿਆਂ ਵਿਚ ਵੀ 6ਵਾਂ ਮਹੀਨਾਵਾਰ ਵਾਧਾ ਹੈ। ਕੈਨੇਡੀਅਨ ਰੀਅਲ ਅਸਟੇਟ ਐਸੋਸੀਏਸ਼ਨ ਦੇ ਸੀਨੀਅਰ ਅਰਥਸ਼ਾਸਤਰੀ ਸ਼ੌਨ ਕੈਥਕਾਰਟ ਨੇ ਕਿਹਾ ਕਿ ਵਿਆਜ ਦਰਾਂ ਘੱਟ ਪੱਧਰ 'ਤੇ ਬਣੇ ਰਹਿਣ ਨਾਲ 2026 ਵਿਚ ਹਾਊਸਿੰਗ ਮਾਰਕੀਟ ਹੋਰ ਅੱਗੇ ਵਧ ਸਕਦੀ ਹੈ ਪਰ ਅਮਰੀਕਾ ਨਾਲ ਵਪਾਰ ਸਬੰਧੀ ਕੋਈ ਵੀ ਖ਼ਬਰ ਸੇਲਸ ਟ੍ਰੈਡ ਵਿਚ ਕਿਸੇ ਵੱਡੇ ਫੇਰਬਦਲ ਦਾ ਕਾਰਨ ਹੋਵੇਗੀ।

ਸੀ.ਆਰ.ਈ.ਏ. ਦੀ ਰਿਪੋਰਟ ਮੁਤਾਬਕ, ਵਿਕਰੀ ਗਤੀਵਿਧੀ ਵਿਚ 15.7 ਫੀਸਦੀ ਵਾਧੇ ਨਾਲ ਕਿਊਬੈਕ ਸਿਟੀ ਪਿਛਲੇ ਮਹੀਨੇ ਕੈਨੇਡਾ ਵਿਚ ਸਭ ਤੋਂ ਪ੍ਰਮੁੱਖ ਮਾਰਕੀਟ ਰਹੀ। ਉਥੇ ਹੀ,ਮੈਟਰੋ ਵੈਨਕੂਵਰ ਖੇਤਰ ਵਿਚ ਪਿਛਲੇ ਮਹੀਨੇ ਘਰਾਂ ਦੀ ਵਿਕਰੀ ਵਿਚ ਮਹੀਨੇ ਦਰ ਮਹੀਨੇ 4.2 ਫੀਸਦੀ ਦਾ ਵਾਧਾ ਹੋਇਆ, ਜਦੋਂ ਕਿ ਗ੍ਰੇਟਰ ਟੋਰਾਂਟੋ ਖੇਤਰ ਵਿਚ ਮਹੀਨਾ-ਦਰ-ਮਹੀਨਾ 2.3 ਫੀਸਦੀ ਗਿਰਾਵਟ ਦਰਜ ਕੀਤੀ ਗਈ।