17.7C Vancouver 17.7C VancouverNov 20, 2023 5:49 PM - connect News
ਕੈਨੇਡੀਅਨ ਮੈਂਬਰ ਪਾਰਲੀਮੈਂਟ ਨੇ 2023 ਦੇ ਪਹਿਲੇ 6 ਮਹੀਨਿਆਂ ਵਿੱਚ ਯਾਤਰਾ 'ਤੇ ਟੈਕਸਦਾਤਾਵਾਂ ਦੇ $14.6 ਮਿਲੀਅਨ ਤੋਂ ਵੱਧ ਖ਼ਰਚ ਕੀਤੇ ਹਨ, ਜੋ ਪਿਛਲੇ ਛੇ ਮਹੀਨਿਆਂ ਨਾਲੋਂ ਲਗਭਗ 10 ਫੀਸਦੀ ਵੱਧ ਹੈ। ਇਹ ਰਕਮ ਹਰ ਰੋਜ਼ ਦੇ ਹਿਸਾਬ ਨਾਲ ਕਰੀਬ $80,000 ਬਣਦੀ ਹੈ।
ਟੈਕਸਦਾਤਾਵਾਂ ਦੇ ਇਹ ਪੈਸੇ ਮੈਂਬਰ ਪਾਰਲੀਮੈਂਟ ਅਤੇ ਉਨ੍ਹਾਂ ਦੇ ਪਰਿਵਾਰਾਂ ਤੇ ਸਟਾਫ ਦੇ ਵਪਾਰਕ ਹਵਾਈ ਕਿਰਾਇਆ, ਜ਼ਮੀਨੀ ਆਵਾਜਾਈ, ਰਿਹਾਇਸ਼ ਅਤੇ ਭੋਜਨ ਲਈ ਖ਼ਰਚ ਹੋਏ। ਰਿਪੋਰਟ ਮੁਤਾਬਕ 1 ਜਨਵਰੀ ਤੋਂ 30 ਜੂਨ ਤੱਕ 338 ਐਮ.ਪੀਜ਼ ਨੇ ਕੰਮ ਅਤੇ ਹਲਕੇ ਨਾਲ ਸੰਬੰਧਿਤ ਯਾਤਰਾ ਲਈ ਔਸਤ $43,000 ਜਾਂ ਹਰ ਮਹੀਨੇ $7,200 ਤੋਂ ਵੱਧ ਖਰਚ ਕੀਤੇ।
ਇਸ ਵਿੱਚ ਕੈਨੇਡਾ ਦੇ ਦੋ ਮੁੱਖ ਵਿਰੋਧੀ ਨੇਤਾਵਾਂ ਦਾ ਯਾਤਰਾ ਬਿੱਲ ਸਭ ਤੋਂ ਵੱਡਾ ਸੀ। ਕੰਜ਼ਰਵੇਟਿਵ ਲੀਡਰ ਪੀਅਰ ਪੋਲੀਐਵ ਨੇ 2023 ਦੇ ਪਹਿਲੇ ਛੇ ਮਹੀਨਿਆਂ ਵਿੱਚ ਕਰੀਬ $247,800 ਅਤੇ NDP ਲੀਡਰ ਜਗਮੀਤ ਸਿੰਘ ਨੇ $177,500 ਖਰਚ ਕੀਤੇ। ਇਹ ਦੋਵੇਂ ਲੀਡਰਸ ਅਗਲੇ ਇਲੈਕਸ਼ਨ ਲਈ ਕੈਨੇਡਾ ਭਰ ਵਿੱਚ ਯਾਤਰਾਵਾਂ ਕਰ ਰਹੇ ਹਨ। ਇਸ ਲਿਸਟ ਵਿੱਚ ਪੰਜਵੇਂ ਨੰਬਰ 'ਤੇ ਐਡਮੰਟਨ ਮਿਲ ਵੁਡਸ ਤੋਂ ਕੰਜ਼ਰਵੇਟਿਵ ਐਮ.ਪੀ ਟਿਮ ਉੱਪਲ ਹਨ, ਜਿਨ੍ਹਾਂ ਦਾ ਯਾਤਰਾ ਖ਼ਰਚ ਇਸ ਦੌਰਾਨ $130,000 ਰਿਹਾ। ਉਨ੍ਹਾਂ ਦੇ ਦਫ਼ਤਰ ਨੇ ਇੱਕ ਸਟੇਟਮੈਂਟ ਵਿੱਚ ਕਿਹਾ ਕਿ ਉੱਪਲ ਨੂੰ ਕੰਜ਼ਰਵੇਟਿਵ ਦੇ ਡਿਪਟੀ ਲੀਡਰ ਹੋਣ ਦੇ ਨਾਤੇ ਕਈ ਸ਼ਹਿਰਾਂ ਵਿੱਚ ਮੀਟਿੰਗਸ ਅਤੇ ਸਮਾਗਮਾਂ ਵਿੱਚ ਸ਼ਾਮਲ ਹੋਣਾ ਪੈਂਦਾ ਹੈ।
ਦੱਸ ਦੇਈਏ ਕਿ ਜਨਤਕ ਤੌਰ 'ਤੇ ਉਪਲਬਧ ਡਾਟਾ ਵਿੱਚ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਅਤੇ ਕੈਬਨਿਟ ਮਿਨਿਸਟਰਸ ਦਾ ਖ਼ਰਚ ਸ਼ਾਮਲ ਨਹੀਂ ਹੈ।
