ਕੈਨੇਡੀਅਨ ਅਰਥਵਿਵਸਥਾ ਨੂੰ ਇਸ ਸਾਲ ਕਰਨਾ ਪੈ ਸਕਦੈ ਮੰਦੀ ਦਾ ਸਾਹਮਣਾ

ਕੈਨੇਡੀਅਨ ਅਰਥਵਿਵਸਥਾ ਨੂੰ ਇਸ ਸਾਲ ਮੰਦੀ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।ਅਰਥਸ਼ਾਸਤਰੀ ਨੇ ਇਹ ਚਿਤਾਵਨੀ ਦਿੱਤੀ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਮੰਗਲਵਾਰ ਤੋਂ ਲਾਗੂ ਹੋਇਆ ਅਮਰੀਕੀ ਟੈਰਿਫ ਜੇ ਇਸੇ ਤਰ੍ਹਾਂ ਲਾਗੂ ਰਿਹਾ ਤਾਂ ਕੈਨੇਡਾ ਦੀ ਅਰਥਵਿਵਸਥਾ ਇਸ ਸਾਲ ਮੰਦੀ ਵਿੱਚ ਡੁੱਬ ਸਕਦੀ ਹੈ। ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਆਦੇਸ਼ ਤਹਿਤ ਕੈਨੇਡਾ ਅਤੇ ਮੈਕਸੀਕੋ ਦੇ ਸਾਰੇ ਮਾਲ 'ਤੇ 25 ਫੀਸਦੀ ਟੈਰਿਫ ਲਗਾਇਆ ਗਿਆ ਹੈ, ਜਿਸ ਵਿੱਚ ਕੈਨੇਡੀਅਨ ਤੇਲ, ਗੈਸ 'ਤੇ 10 ਟੈਰਿਫ ਸ਼ਾਮਲ ਹੈ, ਇਹ ਟੈਰਿਫ ਅੱਧੀ ਰਾਤ ਤੋਂ ਲਾਗੂ ਹੋਏ ਹਨ। ਇਸ ਦੇ ਜਵਾਬ ਵਿਚ ਕੈਨੇਡਾ ਨੇ ਵੀ 21 ਦਿਨਾਂ ਦੇ ਅੰਦਰ-ਅੰਦਰ $155 ਬਿਲੀਅਨ ਦੇ ਅਮਰੀਕੀ ਸਮਾਨ 'ਤੇ ਟੈਰਿਫ ਲਗਾਉਣ ਦਾ ਐਲਾਨ ਕੀਤਾ ਹੈ।

ਆਰ.ਐਸ.ਐਮ. ਕੈਨੇਡਾ ਦੀ ਅਰਥਸ਼ਾਸਤਰੀ ਟੂ ਨਗੁਏਨ ਨੇ ਕਿਹਾ ਕਿ ਕੈਨੇਡਾ ਦਾ ਆਰਥਿਕ ਦ੍ਰਿਸ਼ ਨਾਟਕੀ ਰੂਪ ਵਿੱਚ ਬਦਲਣ ਵਾਲਾ ਹੈ ਕਿਉਂਕਿ ਟਰੇਡ ਵਾਰ ਨਾਲ ਕੀਮਤਾਂ ਵਿੱਚ ਵਾਧਾ ਹੋਵੇਗਾ, ਬੇਰੁਜ਼ਗਾਰੀ ਵਧੇਗੀ ਅਤੇ ਖਪਤਕਾਰ ਖਰੀਦਦਾਰੀ ਤੋਂ ਪਿੱਛੇ ਹਟਣਾ ਸ਼ੁਰੂ ਕਰ ਦੇਣਗੇ। ਉਨ੍ਹਾਂ ਕਿਹਾ ਕਿ ਟੈਰਿਫ ਨਾਲ ਸਭ ਤੋਂ ਵੱਧ ਪ੍ਰਭਾਵਿਤ ਉਤਪਾਦਨ, ਊਰਜਾ ਅਤੇ ਭੋਜਨ ਸੈਕਟਰ ਹੋਣਗੇ ਪਰ ਕੋਈ ਵੀ ਕਾਰੋਬਾਰ ਇਸ ਦੇ ਪ੍ਰਭਾਵ ਤੋਂ ਬਚਿਆ ਨਹੀਂ ਰਹੇਗਾ ਅਤੇ ਕਾਰੋਬਾਰਾਂ ਨੂੰ ਨੌਕਰੀਆਂ ਵਿਚ ਕਟੌਤੀ ਕਰਨੀ ਪਵੇਗੀ।