ਕੈਨੇਡੀਅਨ ਸਟੀਲ ਇੰਡਸਟਰੀ ਵਿਚ ਟਰੰਪ ਦੇ ਆਉਣ ਵਾਲੇ ਟੈਰਿਫ ਕਾਰਨ ਵਧੀ ਚਿੰਤਾ

ਕੈਨੇਡੀਅਨ ਸਟੀਲ ਇੰਡਸਟਰੀ ਵਿਚ ਟਰੰਪ ਦੇ ਆਉਣ ਵਾਲੇ ਟੈਰਿਫ ਕਾਰਨ ਚਿੰਤਾ ਵਧ ਗਈ ਹੈ। ਕੈਨੇਡੀਅਨ ਮਾਹਰ ਚਿਤਾਵਨੀ ਦੇ ਰਹੇ ਹਨ ਕਿ ਟੈਰਿਫ ਨਾਲ ਸਰਹੱਦ ਦੇ ਦੋਵੇਂ ਪਾਸੇ ਜਹਾਜ਼ ਨਿਰਮਾਣ ਅਤੇ ਆਟੋਮੇਕਿੰਗ ਸਮੇਤ ਨਿਰਮਾਣ ਉਦਯੋਗ ਦੇ ਵਰਕਰ ਪ੍ਰਭਾਵਿਤ ਹੋਣਗੇ।

ਹੈਮਿਲਟਨ ਨੂੰ ਜ਼ਿਆਦਾ ਮੰਦੀ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ ਕਿਉਂਕਿ ਕੈਨੇਡਾ ਦਾ ਸਭ ਤੋਂ ਵੱਡਾ ਸਟੀਲ ਉਤਪਾਦਕ, ਆਰਸੇਲਰ ਮਿੱਤਲ ਡੋਫਾਸਕੋ ਹੈਮਿਲਟਨ ਵਿਚ ਹੈ ਅਤੇ ਸਟੈਲਕੋ ਵੀ ਹੈਮਿਲਟਨ ਵਿਚ ਸਥਿਤ ਹੈ।

ਮੈਕਮਾਸਟਰ ਯੂਨੀਵਰਸਿਟੀ ਦੇ ਐਸੋਸੀਏਟ ਪ੍ਰੋਫੈਸਰ ਗੋਰਾਨ ਕੈਲਿਕ ਜੋ ਕਿ ਰਣਨੀਤਕ ਪ੍ਰਬੰਧਨ ਦੇ ਮਾਹਰ ਹਨ, ਉਨ੍ਹਾਂ ਦਾ ਕਹਿਣਾ ਹੈ ਕਿ ਸਰਕਾਰ ਥੋੜ੍ਹੇ ਸਮੇਂ ਲਈ ਸਟੀਲ ਉਦਯੋਗ ਨੂੰ ਸਬਸਿਡੀ ਦੇ ਸਕਦੀ ਹੈ ਪਰ ਸਟੀਲ ਇੰਡਸਟਰੀ ਵਿਚ ਇੱਕ ਵਰਕਰ ਦੀ ਨੌਕਰੀ ਪਿੱਛੇ ਆਰਥਿਕਤਾ ਵਿਚ 6 ਹੋਰ ਨੌਕਰੀਆਂ ਜਾ ਸਕਦੀਆਂ ਹਨ।

ਇਹ ਨੌਕਰੀਆਂ ਸਟੀਲ ਟਰਾਂਸਪੋਰਟ ਕਰਨ ਵਾਲੇ ਟਰੱਕ ਡਰਾਈਵਰਾਂ ਤੋਂ ਲੈ ਕੇ ਸਟੀਲ ਦਾ ਇਸਤੇਮਾਲ ਕਰਨ ਵਾਲੀ ਕਾਰ ਕੰਪਨੀ ਦੇ ਇੰਜੀਨੀਅਰ ਤੱਕ ਦੀਆਂ ਹੋ ਸਕਦੀਆਂ ਹਨ। ਉਨ੍ਹਾਂ ਕਿਹਾ ਕਿ ਇਹ ਉਦਯੋਗ ਲਈ ਵਿਨਾਸ਼ਕਾਰੀ ਹੋਵੇਗਾ ਪਰ ਮੈਨੂੰ ਉਮੀਦ ਹੈ ਕਿ ਇੰਡਸਟਰੀ ਨੂੰ ਸਬਸਿਡੀ ਦਿੱਤੀ ਜਾਵੇਗੀ।