ਕੈਨੇਡੀਅਨ ਸਵੀਮਰ ਸਮਰ ਮੈਕਿੰਟੋਸ਼ ਨੇ ਪੈਰਿਸ ਓਲਿੰਪਕ ਵਿਚ ਰਚਿਆ ਇਤਿਹਾਸ

ਕੈਨੇਡੀਅਨ ਸਵੀਮਰ ਸਮਰ ਮੈਕਿੰਟੋਸ਼ ਨੇ ਪੈਰਿਸ ਓਲਿੰਪਕ ਵਿਚ ਇਤਿਹਾਸ ਰਚ ਦਿੱਤਾ ਹੈ। ਉਹ ਓਲਿੰਪਕ ਵਿਚ ਤਿੰਨ ਗੋਲਡ ਮੈਡਲ ਜਿੱਤਣ ਵਾਲੀ ਪਹਿਲੀ ਕੈਨੇਡੀਅਨ ਬਣ ਗਈ ਹੈ। ਸ਼ਨੀਵਾਰ ਨੂੰ ਉਸ ਨੇ 200 ਮੀਟਰ ਵਿਅਕਤੀਗਤ ਮੈਡਲੇ ਮੁਕਾਬਲਾ ਦੋ ਮਿੰਟ 06.56 ਸਕਿੰਟ ਦੇ ਓਲਿੰਪਕ ਰਿਕਾਰਡ ਸਮੇਂ ਵਿਚ ਜਿੱਤਿਆ ਅਤੇ ਹੰਗਰੀ ਦੀ ਕਾਟਿੰਕਾ ਹੋਸਜ਼ੂ ਵਲੋਂ ਬਣਾਏ ਗਏ ਦੋ ਮਿੰਟ 06.58 ਦੇ ਰਿਕਾਰਡ ਨੂੰ ਤੋੜ ਦਿੱਤਾ।

ਟੌਰਾਂਟੋ ਦੀ ਇਸ ਸਾਲ 17 ਸਾਲਾ ਤੈਰਾਕ ਨੇ ਪੈਰਿਸ ਓਲਿੰਪਕ ਵਿਚ ਕੈਨੇਡਾ ਲਈ ਕੁੱਲ 4 ਮੈਡਲ ਜਿੱਤੇ ਹਨ। 27 ਜੁਲਾਈ ਨੂੰ ਉਸ ਨੇ 400 ਮੀਟਰ ਫਰੀਸਟਾਈਲ ਸਵੀਮਿੰਗ ਮੁਕਾਬਲੇ ਵਿਚ ਚਾਂਦੀ ਦੇ ਤਮਗੇ ਨਾਲ ਕੈਨੇਡਾ ਲਈ ਪਹਿਲਾ ਮੈਡਲ ਜਿੱਤਿਆ ਸੀ।

ਸਾਲ 2028 ਵਿਚ ਜਦੋਂ ਲਾਸ ਏਂਜਲਸ ਵਿਚ ਸਮਰ ਓਲਿੰਪਰ ਹੋਣਗੀਆਂ ਤਾਂ ਉਸ ਸਮੇਂ ਉਹ 21 ਸਾਲ ਦੀ ਹੋਵੇਗੀ। ਮੈਕਿੰਟੋਸ਼ ਨੇ ਕਿਹਾ ਕਿ ਪਿਛਲਾ ਹਫ਼ਤਾ ਮੇਰੇ ਜੀਵਨ ਲਈ ਸਭ ਤੋਂ ਅਹਿਮ ਰਿਹਾ ਹੈ ਅਤੇ ਅਜਿਹਾ ਪਲ 4 ਸਾਲ ਵਿਚ ਇੱਕ ਵਾਰ ਆਉਂਦਾ ਹੈ ਅਤੇ ਸੱਚ ਕਿਹਾਂ ਤਾਂ ਮੈਂ ਲਾਸ ਏਂਜਲਸ ਓਲਿੰਪਕ ਬਾਰੇ ਵੀ ਹੁਣ ਤੋਂ ਹੀ ਸੋਚ ਰਹੀ ਹਾਂ।

ਗੌਰਤਲਬ ਹੈ ਕਿ ਪੈਰਿਸ ਓਲਿੰਪਕ ਵਿਚ ਕੈਨੇਡਾ ਦੇ ਹੁਣ ਤੱਕ 17 ਮੈਡਲ ਹੋ ਚੁੱਕੇ ਹਨ, ਜਿਨ੍ਹਾਂ ਵਿਚ 5 ਗੋਲਡ, 4 ਸਿਲਵਰ ਅਤੇ 8 ਕਾਂਸੀ ਦੇ ਤਗਮੇ ਹਨ।