9.74C Vancouver 9.74C VancouverJan 20, 2026 5:35 PM - Connect Newsroom - Ramandeep Kaur with files from The Canadian Press
ਕੈਨੇਡਾ ਦੀ ਇੱਕ 19 ਸਾਲਾ ਕੁੜੀ ਦੀ ਆਸਟ੍ਰੇਲੀਆ ਦੇ ਇੱਕ ਪ੍ਰਸਿੱਧ ਬੀਚ 'ਤੇ ਮੌਤ ਹੋਣ ਦੀ ਦੁਖਦਾਈ ਖ਼ਬਰ ਸਾਹਮਣੇ ਆਈ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ, ਉਸ ਦੀ ਲਾਸ਼ ਆਸਟ੍ਰੇਲੀਆ ਦੇ K’gari ਆਈਲੈਂਡ, ਜਿਸ ਨੂੰ ਫਰੇਜ਼ਰ ਆਈਲੈਂਡ ਵੀ ਕਿਹਾ ਜਾਂਦਾ ਹੈ, ਦੇ ਇੱਕ ਬੀਚ 'ਤੇ ਸੋਮਵਾਰ ਨੂੰ ਮਿਲੀ, ਜਿਸ ਨੂੰ ਲਗਭਗ 10 ਜੰਗਲੀ ਕੁੱਤਿਆਂ ਦੇ ਇੱਕ ਝੁੰਡ ਨੇ ਘੇਰਿਆ ਹੋਇਆ ਸੀ।
ਆਸਟ੍ਰੇਲੀਅਨ ਮੀਡੀਆ ਰਿਪੋਰਟਸ ਅਨੁਸਾਰ ਮ੍ਰਿਤਕ ਦੀ ਪਛਾਣ ਪਾਈਪਰ ਜੇਮਜ਼ ਵਜੋਂ ਹੋਈ ਹੈ, ਹਾਲਾਂਕਿ ਪੁਲਿਸ ਨੇ ਅਜੇ ਅਧਿਕਾਰਤ ਤੌਰ 'ਤੇ ਨਾਮ ਦੀ ਪੁਸ਼ਟੀ ਨਹੀਂ ਕੀਤੀ। ਬ੍ਰਿਟਿਸ਼ ਕੋਲੰਬੀਆ ਦੇ ਕੈਂਪਬੈਲ ਰਿਵਰ ਦੀ ਰਹਿਣ ਵਾਲੀ ਪਾਈਪਰ ਦੀ ਕਰੀਬੀ ਦੋਸਤ ਬ੍ਰਿਆਨਾ ਫਾਲਕ ਨੇ ਦੱਸਿਆ ਕਿ ਜਦੋਂ ਉਸ ਨੇ ਖ਼ਬਰਾਂ ਸੁਣੀਆਂ ਤਾਂ ਉਸ ਦਾ ਦਿਲ ਬੈਠ ਗਿਆ, ਬਾਅਦ ਵਿਚ ਪਰਿਵਾਰ ਤੋਂ ਉਸ ਦੀ ਮੌਤ ਦੀ ਪੁਸ਼ਟੀ ਹੋਈ।
ਬ੍ਰਿਆਨਾ ਮੁਤਾਬਕ, ਉਹ ਦੋਵੇਂ ਤਿੰਨ ਸਾਲ ਪਹਿਲਾਂ ਹਾਈ ਸਕੂਲ ਵਿਚ ਮਿਲੀਆਂ ਸਨ। ਉਸ ਨੇ ਕਿਹਾ ਕਿ ਪਾਈਪਰ ਨੂੰ ਕੁਦਰਤ ਨਾਲ ਬਹੁਤ ਪਿਆਰ ਸੀ ਅਤੇ ਉਹ ਜ਼ਿੰਦਗੀ ਨੂੰ ਖੁੱਲ੍ਹ ਕੇ ਜਿਉਣ ਵਾਲੀ ਕੁੜੀ ਸੀ। ਕੁਇੰਜ਼ਲੈਂਡ ਪੁਲਿਸ ਦਾ ਕਹਿਣਾ ਹੈ ਕਿ ਮੌਤ ਦੇ ਅਸਲ ਕਾਰਨਾਂ ਦਾ ਪਤਾ ਲਗਾਉਣ ਲਈ ਜਾਂਚ ਕੀਤੀ ਜਾ ਰਹੀ ਹੈ ਕਿ ਕੀ ਮੌਤ ਡਿੰਗੋ ਦੇ ਹਮਲੇ ਕਾਰਨ ਹੋਈ ਜਾਂ ਕੋਈ ਹੋਰ ਕਾਰਨ ਸੀ।
ਰਿਪੋਰਟਸ ਮੁਤਾਬਕ, ਜਿਸ ਜਗ੍ਹਾ ਲਾਸ਼ ਮਿਲੀ ਉਹ ਇਲਾਕਾ ਡਿੰਗੋ ਦੀ ਆਬਾਦੀ ਲਈ ਜਾਣਿਆ ਜਾਂਦਾ ਹੈ, ਇਹ ਕੁੱਤਿਆਂ ਦੀ ਇੱਕ ਜੰਗਲੀ ਪ੍ਰਜਾਤੀ ਹੈ ਅਤੇ ਇਹ ਇਲਾਕਾ ਮੂਲ ਪ੍ਰਜਾਤੀਆਂ ਲਈ ਕੁਇੰਜ਼ਲੈਂਡ ਦੀਆਂ ਸੁਰੱਖਿਅਤ ਰਾਸ਼ਟਰੀ ਪਾਰਕਾਂ ਵਿਚੋਂ ਇੱਕ ਹੈ।
