18.69C Vancouver 18.69C VancouverJan 29, 2021 6:40 PM -
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਐਲਾਨ ਕੀਤਾ ਹੈ ਕਿ ਕੈਨੇਡਾ ਪਹੁੰਚ ਰਹੇ ਕਿਸੇ ਵੀ ਵਿਦੇਸ਼ੀ ਯਾਤਰਾ ਕਰ ਰਹੇ ਵਿਅਕਤੀ ਨੂੰ ਹਵਾਈ ਅੱਡੇ 'ਤੇ ਕੋਵਿਡ-19 ਪੀ.ਸੀ.ਆਰ. ਟੈਸਟ ਲੈਣਾ ਹੋਵੇਗਾ।
ਇਸ ਟੈਸਟ ਦੇ ਨਤੀਜੇ ਆਉਣ 'ਚ 3 ਦਿਨ ਤੱਕ ਦਾ ਸਮਾਂ ਲੱਗ ਸਕਦਾ ਹੈ ਅਤੇ ਉਸ ਸਮੇਂ ਦਰਮਿਆਨ ਯਾਤਰੀਆਂ ਨੂੰ ਆਪਣੇ ਖਰਚੇ 'ਤੇ ਹੋਟਲ 'ਚ ਕੁਆਰੰਟੀਨ ਕਰਨਾ ਪਵੇਗਾ।
ਇਸ ਤੋਂ ਬਾਅਦ ਜਿਹੜੇ ਲੋਕਾਂ ਦੇ ਟੈਸਟ ਨਤੀਜੇ ਨੈਗੇਟਿਵ ਆਉਂਦੇ ਹਨ, ਉਹ ਕਿਸੇ ਘਰ ਜਾਂ ਆਪਣੀ ਲੋੜ ਅਨੁਸਾਰ ਜਗ੍ਹਾ 'ਤੇ 14 ਦਿਨ ਲਈ ਕੁਆਰੰਟੀਨ ਕਰ ਸਕਣਗੇ।
ਹਾਲਾਂਕਿ ਜੇਕਰ ਇਹ ਨਤੀਜੇ ਪਾਜ਼ਿਟਿਵ ਆਉਂਦੇ ਹਨ ਤਾਂ ਸਰਕਾਰ ਦੀ ਚੁਣੀ ਜਗ੍ਹਾ 'ਤੇ ਕੁਆਰੰਟੀਨ ਕਰਨਾ ਲਾਜ਼ਮੀ ਹੋਵੇਗਾ।
ਕਰੈਬੀਅਨ ਅਤੇ ਮੈਕਸੀਕੋ ਦੀਆਂ ਹਵਾਈ ਸੇਵਾਵਾਂ ਹੋ ਰਹੀਆਂ ਰੱਦ
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਦੱਸਿਆ ਹੈ ਕਿ ਕੈਨੇਡਾ ਦੇ ਏਅਰ ਕੈਰੀਅਰਸ ਨੇ ਮਨਜ਼ੂਰ ਕਰ ਲਿਆ ਹੈ ਕਿ ਇਸ ਐਤਵਾਰ ਤੋਂ ਕਰੈਬੀਅਨ ਅਤੇ ਮੈਕਸੀਕੋ ਦੀਆਂ ਸੇਵਾਵਾਂ ਰੱਦ ਕਰ ਦਿੱਤੀਆਂ ਜਾਣ।
ਇਹ ਪਬੰਦੀ 30 ਅਪ੍ਰੈਲ ਤੱਕ ਜਾਰੀ ਰਹੇਗੀ।
ਔਟਵਾ 'ਚ ਗਲਬਾਤ ਕਰਦਿਆਂ ਟਰੂਡੋ ਨੇ ਦੱਸਿਆ ਕਿ ਇਸ ਪਬੰਦੀ 'ਚ ਏਅਰ ਕੈਨੇਡਾ, ਵੈਸਟਜੈਟ, ਸਨਵਿੰਗ ਅਤੇ ਏਅਰ ਟਰਾਂਜ਼ੈਟ ਦੀਆਂ ਫਲਾਈਟਸ ਸ਼ਾਮਿਲ ਹਨ।
ਟਰੂਡੋ ਨੇ ਕਿਹਾ ਕਿ ਸਾਰੀਆਂ ਅੰਤਰਰਾਸ਼ਟਰੀ ਫਲਾਈਟਸ ਨੂੰ 4 ਹਵਾਈ ਅੱਡਿਆਂ 'ਤੇ ਹੀ ਉਤਰਨ ਦੀ ਇਜਾਜ਼ਤ ਹੋਵੇਗੀ।
ਇਸ 'ਚ ਵੈਨਕੂਵਰ, ਟੋਰੌਂਟੋ, ਕੈਲਗਰੀ ਅਤੇ ਮੌਂਟਰੀਅਲ ਦੇ ਹਵਾਈ ਅੱਡੇ ਸ਼ਾਮਿਲ ਹਨ।
