ਕੈਨੇਡੀਅਨਾਂ ਨੂੰ ਵਿਆਜ ਦਰਾਂ ਵਿਚ ਮਿਲ ਸਕਦੀ ਹੈ ਰਾਹਤ

ਕੈਨੇਡੀਅਨਾਂ ਨੂੰ ਵਿਆਜ ਦਰਾਂ ਵਿਚ ਰਾਹਤ ਮਿਲ ਸਕਦੀ ਹੈ। ਬੈਂਕ ਆਫ ਕੈਨੇਡਾ ਵਲੋਂ ਬੁੱਧਵਾਰ ਨੂੰ ਦਰ ’ਚ ਕਟੌਤੀ ਦੀ ਉਮੀਦ ਕੀਤੀ ਜਾ ਰਹੀ ਹੈ। ਹਾਲਾਂਕਿ, ਮਾਹਰਾਂ ਨੇ ਚਿਤਾਵਨੀ ਦਿੱਤੀ ਹੈ ਕਿ ਜੇ ਸੈਂਟਰਲ ਬੈਂਕ ਬਾਜ਼ਾਰ ਦੀਆਂ ਉਮੀਦਾਂ ਮੁਤਾਬਕ ਵੱਡੀ ਕਟੌਤੀ ਕਰਦਾ ਹੈ ਤਾਂ ਕਮਜ਼ੋਰ ਪੈ ਰਹੇ ਕੈਨੇਡੀਅਨ ਡਾਲਰ ਵਿਚ ਹੋਰ ਗਿਰਾਵਟ ਆ ਸਕਦੀ ਹੈ।

ਬੈਂਕ ਆਫ ਕੈਨੇਡਾ ਵਲੋਂ ਭਲਕੇ ਲਗਾਤਾਰ ਪੰਜਵੇਂ ਫੈਸਲੇ ਵਿਚ ਆਪਣੀ ਬੈਂਚਮਾਰਕ ਵਿਆਜ ਦਰ ਨੂੰ ਘਟਾਉਣ ਦੀ ਵਿਆਪਕ ਤੌਰ ’ਤੇ ਉਮੀਦ ਕੀਤੀ ਜਾ ਰਹੀ ਹੈ, ਜੋ ਇਸ ਸਮੇਂ 3.75 ਫੀਸਦੀ ਹੈ। ਬਜ਼ਾਰ ਅਤੇ ਕਈ ਅਰਥਸ਼ਾਸਤਰੀ 50-ਆਧਾਰ-ਬਿੰਦੂ ਯਾਨੀ ਅੱਧਾ ਫੀਸਦੀ ਕਟੌਤੀ ਦੀ ਸੰਭਾਵਨਾ ਜਤਾ ਰਹੇ ਹਨ।

ਇੰਟਰਸਟ ਰੇਟ ਵਿਚ ਵੱਡੀ ਕਟੌਤੀ ਦੀ ਇਹ ਉਮੀਦ ਪਿਛਲੇ ਮਹੀਨੇ ਦੀ ਬੇਰਜ਼ੁਗਾਰੀ ਦਰ 6.8 ਫੀਸਦੀ ’ਤੇ ਪਹੁੰਚ ਜਾਣ ਮਗਰੋਂ ਵਧੀ ਹੈ। ਇਸ ਦਾ ਕੈਨੇਡਾ ਦੇ ਡਾਲਰ ’ਤੇ ਵੀ ਨਾਕਾਰਾਤਮਕ ਅਸਰ ਪਿਆ ਹੈ।

ਸ਼ੁੱਕਰਵਾਰ ਨੂੰ ਕੈਨੇਡੀਅਨ ਡਾਲਰ ਵਿਚ ਅਮਰੀਕਨ ਕਰੰਸੀ ਦੇ ਮੁਕਾਬਲੇ ਕਰੀਬ ਅੱਧਾ ਸੈਂਟ ਦੀ ਗਿਰਾਵਟ ਆਈ, ਉੱਥੇ ਹੀ ਸੋਮਵਾਰ ਨੂੰ ਇਹ ਅਮਰੀਕਨ ਡਾਲਰ ਦੇ ਮੁਕਾਬਲੇ 70.5 ਸੈਂਟ ’ਤੇ ਰਿਹਾ ਜੋ ਸਤੰਬਰ ਦੇ ਪੱਧਰ ਤੋਂ ਕਰੀਬ 4 ਸੈਂਟ ਘੱਟ ਸੀ।