18.77C Vancouver 18.77C VancouverJun 6, 2024 3:05 PM - The Canadian Press
ਕੈਨੇਡੀਅਨ ਫੋਰਸਿਜ਼ ਵਲੋਂ ਅੱਜ ਦੇ ਦਿਨ ਫਰਾਂਸ ਦੇ ਨੌਰਮੈਂਡੀ ਨੂੰ ਨਾਜ਼ੀ ਫੌਜਾਂ ਤੋਂ ਆਜ਼ਾਦ ਕਰਵਾਉਣ ਵਿਚ ਪਾਏ ਯੋਗਦਾਨ ਨੂੰ ਯਾਦ ਕੀਤਾ ਜਾ ਰਿਹਾ ਹੈ। ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੌਰਮੈਂਡੀ ਦੇ ਜੂਨੋ ਬੀਚ ਵਿਖੇ ਡੀ-ਡੇਅ ਦੀ 80ਵੀਂ ਵਰ੍ਹੇਗੰਢ ਮੌਕੇ ਆਯੋਜਿਤ ਕੀਤੇ ਗਏ ਕੈਨੇਡੀਅਨ ਸਮਾਰੋਹ ਵਿਚ ਸ਼ਾਮਲ ਹੋਏ, ਟਰੂਡੋ ਨੇ ਆਪਣੇ ਸੰਬੋਧਨ ਵਿਚ ਕਿਹਾ ਕਿ ਅੱਜ ਤੋਂ ਅੱਸੀ ਸਾਲ ਪਹਿਲਾਂ 14,000 ਤੋਂ ਵੱਧ ਕੈਨੇਡੀਅਨ ਨੇ ਇਤਿਹਾਸ ਦੇ ਸਭ ਤੋਂ ਵੱਡੇ ਸਾਂਝੇ ਸਮੁੰਦਰੀ, ਹਵਾਈ ਅਤੇ ਜ਼ਮੀਨੀ ਫੌਜੀ ਓਪਰੇਸ਼ਨ ਤਹਿਤ ਨੌਰਮੈਂਡੀ ਵਿਚ ਦਾਖਲ ਹੋ ਕੇ ਨਾਜ਼ੀਆਂ ਦੇ ਕਬਜ਼ੇ ਤੋਂ ਫਰਾਂਸ ਨੂੰ ਛਡਾਉਣ ਲਈ ਯੋਗਦਾਨ ਪਾਇਆ ਅਤੇ ਦੂਜੇ ਵਿਸ਼ਵ ਯੁੱਧ ਦੇ ਖਾਤਮੇ ਦੀ ਨੀਂਹ ਰੱਖੀ।
ਟਰੂਡੋ ਨੇ ਸੰਬੋਧਨ ਵਿਚ ਇਹ ਵੀ ਵਾਰਨਿੰਗ ਦਿੱਤੀ ਕਿ ਲੋਕਤੰਤਰ ਦੀ ਸਥਾਪਨਾ ਕੋਈ ਸੰਯੋਗਵਸ਼ ਨਹੀਂ ਹੋਈ, ਇਸ ਲਈ ਸੰਘਰਸ਼ ਹੁਣ ਵੀ ਜਾਰੀ ਰੱਖਣਾ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਲੋਕਤੰਤਰ ਅੱਜ ਵੀ ਖਤਰੇ ਵਿਚ ਹੈ। ਇਹ ਉਨ੍ਹਾਂ ਹਮਲਾਵਰਾਂ ਤੋਂ ਖਤਰੇ ਵਿਚ ਹੈ ਜੋ ਸਰਹੱਦਾਂ ਨੂੰ ਮੁੜ ਖਿੱਚਣਾ ਚਾਹੁੰਦੇ ਹਨ, ਨਾਲ ਹੀ ਗਲਤ ਜਾਣਕਾਰੀ, ਅਤੇ ਵਿਦੇਸ਼ੀ ਦਖ਼ਲ ਵੀ ਲੋਕਤੰਤਰ ਲਈ ਖ਼ਤਰਾ ਹਨ। ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਵਿਸ਼ਵ ਉਨ੍ਹਾਂ ਸਾਬਕਾ ਸੈਨਿਕ ਦਾ ਰਿਣੀ ਹੈ ਜਿਨ੍ਹਾਂ ਨੇ ਸਾਡੀ ਸਮੂਹਿਕ ਆਜ਼ਾਦੀ ਤੇ ਲੋਕਤੰਤਰ ਦੀ ਸਥਾਪਨਾ ਲਈ ਕੁਰਬਾਨੀਆਂ ਦਿੱਤੀਆਂ।
ਗੌਰਤਲਬ ਹੈ ਕਿ 6 ਜੂਨ, 1944 ਨੂੰ ਅਮਰੀਕਾ, ਬ੍ਰਿਟੇਨ, ਕੈਨੇਡਾ ਅਤੇ ਫਰੀ ਫੈਂਚ ਫੋਰਸਿਜ਼ ਦੇ ਲਗਭਗ 160,000 ਸੈਨਿਕਾਂ ਨੇ ਨੌਰਮੈਂਡੀ ਵਿਚ ਦਾਖ਼ਲ ਹੋ ਕੇ ਨਾਜ਼ੀ ਸੈਨਿਕਾਂ ਖਿਲਾਫ ਲੜਾਈ ਸ਼ੁਰੂ ਕੀਤੀ ਸੀ, ਜਿਸ ਨੇ ਦੂਜੇ ਵਿਸ਼ਵ ਦੀ ਦਿਸ਼ਾ ਬਦਲੀ ਅਤੇ 11 ਮਹੀਨਿਆਂ ਬਾਅਦ ਅਡੌਲਫ ਹਿਟਲਰ ਦੇ ਪਤਨ ਦਾ ਕਾਰਨ ਬਣੀ।
