13.07C Vancouver 13.07C VancouverAug 2, 2024 3:39 PM - The Canadian Press
ਕੈਨੇਡਾ ਸਰਕਾਰ ਵਲੋਂ ਇਜ਼ਰਾਈਲ ਅਤੇ ਹਿਜ਼ਬੁੱਲਾ ਦਰਮਿਆਨ ਵੱਧ ਰਹੇ ਤਣਾਅ ਕਾਰਨ ਕੈਨੇਡੀਅਨਾਂ ਨੂੰ ਵਾਰ-ਵਾਰ ਲੇਬਨਾਨ ਛੱਡਣ ਦੀ ਕੀਤੀ ਜਾ ਰਹੀ ਬੇਨਤੀ ਵਿਚਕਾਰ ਸੈਂਕੜੇ ਕੈਨੇਡੀਅਨ ਫਲਾਈਟਸ ਰੱਦ ਹੋਣ ਦਾ ਸਾਹਮਣਾ ਕਰ ਰਹੇ ਹਨ। ਰਿਪੋਰਟਸ ਮੁਤਾਬਕ, 21,399 ਕੈਨੇਡੀਅਨਾਂ ਨੇ ਔਟਵਾ ਨੂੰ ਲੇਬਨਾਨ ਵਿਚ ਹੋਣ ਦੀ ਜਾਣਕਾਰੀ ਦਿੱਤੀ ਹੈ।
ਇਨ੍ਹਾਂ ਵਿਚੋਂ ਇੱਕ ਲਾਰਾ ਸਲਾਮੇਹ ਨੇ ਦੱਸਿਆ ਕਿ ਉਨ੍ਹਾਂ ਨੇ ਵੀਰਵਾਰ ਨੂੰ ਬੇਰੂਤ ਤੋਂ ਆਪਣੇ ਪਤੀ ਤੇ ਦੋ ਧੀਆਂ ਨਾਲ ਮਾਂਟਰੀਅਲ ਲਈ ਉਡਾਣ ਭਰਨੀ ਸੀ ਪਰ ਇੱਕ ਰਾਤ ਪਹਿਲਾਂ ਹੀ ਉਨ੍ਹਾਂ ਦੀ ਫਲਾਈਟ ਰੱਦ ਹੋ ਗਈ।
ਸਲਾਮੇਹ ਨੇ ਕਿਹਾ ਕਿ ਏਅਰ ਫਰਾਂਸ ਨੇ ਉਨ੍ਹਾਂ ਨੂੰ ਦੱਸਿਆ ਕਿ ਅਣਸੁਖਾਵੇਂ ਮਾਹੌਲ ਕਾਰਨ ਫਲਾਈਟ ਰੱਦ ਕਰ ਦਿੱਤੀ ਗਈ ਹੈ। ਗਲੋਬਲ ਅਫੇਅਰਜ਼ ਕੈਨੇਡਾ ਨੇ ਪਹਿਲਾਂ ਹੀ ਚਿਤਾਵਨੀ ਦਿੱਤੀ ਹੈ ਕਿ ਕੈਨੇਡੀਅਨ ਇਸ ਭਰੋਸੇ ਨਾ ਰਹਿਣ ਕਿ ਜੇ ਯੁੱਧ ਛਿੜ ਜਾਂਦਾ ਹੈ ਤਾਂ ਸਰਕਾਰ ਉਨ੍ਹਾਂ ਨੂੰ ਉੱਥੋਂ ਕੱਢਣ ਲਈ ਫਲਾਈਟਸ ਚਲਾਵੇਗੀ।
ਡਿਪਾਰਟਮੈਂਟ ਦਾ ਕਹਿਣਾ ਹੈ ਕਿ ਅਜਿਹਾ ਸੰਭਵ ਨਹੀਂ ਹੋਵੇਗਾ। ਵਿਦੇਸ਼ ਮੰਤਰੀ ਮੇਲਾਨੀ ਜੌਲੀ ਨੇ ਕਿਹਾ ਕਿ ਜੋ ਫਲਾਈਟਸ ਉਪਲਬਧ ਹਨ ਉਨ੍ਹਾਂ ਦਾ ਮੌਕਾ ਉਠਾਉਂਦੇ ਕੈਨੇਡੀਅਨਾਂ ਨੂੰ ਲੇਬਨਾਨ ਤੋਂ ਤੁਰੰਤ ਨਿਕਲਣਾ ਚਾਹੀਦਾ ਹੈ। ਗੌਰਤਲਬ ਹੈ ਕਿ ਹਿਜ਼ਬੁੱਲਾ ਨੇ ਚਿਤਾਵਨੀ ਦਿੱਤੀ ਹੈ ਕਿ ਇਜ਼ਰਾਇਲ ਨਾਲ ਉਸ ਦਾ ਟਕਰਾਅ ਇੱਕ ਨਵੇਂ ਪੜਾਅ ਵਿਚ ਦਾਖਲ ਹੋ ਗਿਆ ਹੈ।
