ਹਰ ਤਰ੍ਹਾਂ ਦੀ ਘਰੇਲੂ ਹੀਟਿੰਗ ਤੇਲ 'ਤੇ ਕਾਰਬਨ ਟੈਕਸ ਤੋਂ ਛੋਟ ਚਾਹੁੰਦੇ ਹਨ ਕੈਨੇਡੀਅਨਜ਼ :ਸਰਵੇ

ਕੈਨੇਡਾ ਦੀ ਮੁੱਖ ਵਿਰੋਧੀ ਪਾਰਟੀ ਦੇ ਲੀਡਰ ਪੀਅਰ ਪੋਲੀਐਵ ਨੇ ਜਿੱਥੇ ਲਿਬਰਲਸ ਨੂੰ ਕਾਰਬਨ ਟੈਕਸ 'ਤੇ ਇਲੈਕਸ਼ਨ ਲੜਨ ਦੀ ਚੁਣੌਤੀ ਦਿੱਤੀ ਹੈ, ਉੱਥੇ ਹੀ ਇੱਕ ਨਵੇਂ ਸਰਵੇ ਵਿੱਚ ਵੀ ਸਾਹਮਣੇ ਆਇਆ ਹੈ ਕਿ ਵੱਡੀ ਗਿਣਤੀ ਵਿੱਚ ਕੈਨੇਡੀਅਨਜ਼ ਸਾਰੇ ਤਰ੍ਹਾਂ ਦੇ ਘਰੇਲੂ ਹੀਟਿੰਗ ਤੇਲ 'ਤੇ ਕਾਰਬਨ ਟੈਕਸ ਤੋਂ ਛੋਟ ਚਾਹੁੰਦੇ ਹਨ।

ਪੀ. ਐੱਮ. ਟਰੂਡੋ ਨੇ ਪਿਛਲੇ ਮਹੀਨੇ ਲੋਕਾਂ ਨੂੰ ਇਲੈਕਟ੍ਰਿਕ ਹੀਟ ਪੰਪ 'ਤੇ ਸਵਿਚ ਕਰਨ ਵਿੱਚ ਮਦਦ ਲਈ ਫੰਡਿੰਗ ਦੇ ਨਾਲ-ਨਾਲ ਘਰੇਲੂ ਹੀਟਿੰਗ ਤੇਲ ਨੂੰ ਕਾਰਬਨ ਟੈਕਸ ਤੋਂ ਤਿੰਨ ਸਾਲ ਲਈ ਛੋਟ ਦੇਣ ਦਾ ਐਲਾਨ ਕੀਤਾ ਸੀ। ਲੈਜਰ ਦੇ ਸਰਵੇ ਦਾ ਕਹਿਣਾ ਹੈ ਕਿ ਕਰੀਬ 70 ਫੀਸਦੀ ਲੋਕਾਂ ਨੇ ਕਿਹਾ ਕਿ ਉਹ ਸਾਰੇ ਤਰ੍ਹਾਂ ਦੇ ਘਰੇਲੂ ਹੀਟਿੰਗ ਤੇਲ ਲਈ ਛੋਟ ਦੇ ਪੱਖ ਵਿੱਚ ਹਨ।

ਕੁਦਰਤੀ ਸਰੋਤ ਕੈਨੇਡਾ ਮੁਤਾਬਕ, 1.2ਮਿਲੀਅਨ ਤੋਂ ਵੱਧ ਕੈਨੇਡੀਅਨਜ਼ ਘਰੇਲੂ ਹੀਟਿੰਗ ਤੇਲ ਦਾ ਇਸਤੇਮਾਲ ਕਰਦੇ ਹਨ ਅਤੇ ਉਹਨਾਂ ਵਿੱਚੋਂ ਲਗਭਗ ਇੱਕ ਚੌਥਾਈ ਐਟਲਾਂਟਿਕ ਕੈਨੇਡਾ ਵਿੱਚ ਹਨ। ਵਿਰੋਧੀ ਧਿਰਾਂ ਦਾ ਇਲਜ਼ਾਮ ਹੈ ਕਿ ਲਿਬਰਲਸ ਨੇ ਐਟਲਾਂਟਿਕ ਕੈਨੇਡਾ ਵਿੱਚ ਵੋਟਾਂ ਹਾਸਲ ਕਰਨ ਦੇ ਮਕਸਦ ਨਾਲ ਹੀ ਹੋਮ ਹੀਟਿੰਗ ਤੇਲ ਨੂੰ ਕਾਰਬਨ ਟੈਕਸ ਤੋਂ ਛੋਟ ਦਿੱਤੀ ਹੈ। ਸਰਵੇ ਵਿੱਚ ਹਿੱਸਾ ਲੈਣ ਵਾਲੇ ਲਗਭਗ 78 ਫੀਸਦੀ ਐਟਲਾਂਟਿਕ ਕੈਨੇਡੀਅਨ ਨੇ ਕਿਹਾ ਕਿ ਉਹ ਇਸ ਕਦਮ ਤੋਂ ਖੁਸ਼ ਹਨ। ਉਥੇ ਹੀ ਇਸ ਛੋਟ ਨੂੰ ਵਧਾਉਣ ਦੇ ਪੱਖ ਵਿੱਚ ਸਭ ਤੋਂ ਵੱਧ ਅਲਬਰਟਾ ਵਾਸੀ ਹਨ, ਜਿਨ੍ਹਾਂ ਵਿੱਚੋਂ 78 ਫੀਸਦੀ ਨੇ ਇਸ ਦੇ ਵਿਸਥਾਰ ਦੀ ਮੰਗ ਕੀਤੀ।