14.08C Vancouver 14.08C VancouverSep 29, 2021 9:34 AM -
ਪੰਜਾਬ ਪ੍ਰਦੇਸ਼ ਕਾਂਗਰਸ ਕਮੇਟੀ ਦੇ ਮੁਖੀ ਨਵਜੋਤ ਸਿੰਘ ਸਿੱਧੂ ਨੇ ਅਸਤੀਫ਼ੇ ਤੋਂ ਬਾਅਦ ਅੱਜ ਬੁੱਧਵਾਰ ਨੂੰ ਬਿਆਨ ਦਿੱਤਾ ਹੈ ਕਿ ਉਹ ਆਪਣੀਆਂ ਨੈਤਿਕ ਕਦਰਾਂ-ਕੀਮਤਾਂ ਤੇ ਨੈਤਿਕ ਅਧਿਕਾਰਾਂ ਨਾਲ ਕੋਈ ਸਮਝੌਤਾ ਨਹੀਂ ਕਰ ਸਕਦੇ ਅਤੇ ਇਸ ਗੱਲ ਵੱਲ ਵੀ ਇਸ਼ਾਰਾ ਕੀਤਾ ਕਿ ਉਹ ਸੂਬੇ ਦੀ ਸਾਰੀ ਪ੍ਰਣਾਲੀ ਵਿੱਚ ਦਾਗ਼ੀ ਨੇਤਾ ਅਤੇ ਅਫਸਰਾਂ ਨੂੰ ਮੁੜ ਨਹੀਂ ਚਾਹੁੰਦੇ।
ਟਵਿੱਟਰ 'ਤੇ ਵੀਡੀਓ ਸਾਂਝੀ ਕਰਦਿਆਂ ਸਿੱਧੂ ਨੇ ਆਖਿਆ,"ਮੇਰੀ ਕਿਸੇ ਨਾਲ ਵੀ ਕੋਈ ਨਿੱਜੀ ਦੁਸ਼ਮਣੀ ਨਹੀਂ ਹੈ। ਮੇਰੇ 17 ਸਾਲਾਂ ਦੇ ਸਿਆਸੀ ਪੇਸ਼ੇ ਦਾ ਕੋਈ ਮਕਸਦ ਹੈ, ਬਦਲਾਅ ਲਿਆਉਣਾ, ਆਪਣੇ ਕਹੇ 'ਤੇ ਖੜਨਾ ਅਤੇ ਲੋਕਾਂ ਦੀਆਂ ਜ਼ਿੰਦਗੀਆਂ ਨੂੰ ਹੋਰ ਬਿਹਤਰ ਕਰਨਾ। ਇਹੀ ਮੇਰਾ ਧਰਮ ਹੈ।"
"ਮੈਂ ਆਪਣੀਆਂ ਨੈਤਿਕ ਕਦਰਾਂ-ਕੀਮਤਾਂ ਅਤੇ ਨੈਤਿਕ ਅਧਿਕਾਰਾਂ ਨਾਲ ਕੋਈ ਸਮਝੌਤਾ ਨਹੀਂ ਕਰ ਸਕਦਾ। ਜੋ ਮੈਂ ਵੇਖਿਆ, ਉਹ ਹੈ ਮੁੱਦਿਆਂ ਨਾਲ ਸਮਝੌਤਾ ਅਤੇ ਪੰਜਾਬ ਵਿੱਚ ਏਜੰਡਾ । ਮੈਂ ਹਾਈ ਕਮਾਂਡ ਨੂੰ ਗੁਮਰਾਹ ਨਹੀਂ ਕਰ ਸਕਦਾ ਅਤੇ ਨਾ ਹੀ ਉਹਨਾਂ ਨੂੰ ਗੁਮਰਾਹ ਹੋਣ ਦੇ ਸਕਦਾ ਹਾਂ," ਉਨ੍ਹਾਂ ਆਖਿਆ।
ਕਾਂਗਰਸ ਨੇਤਾ ਨੇ ਅੱਗੇ ਆਖਿਆ ਕਿ ਸੂਬੇ ਵਿੱਚ ਦਾਗ਼ੀ ਨੇਤਾਵਾਂ ਅਤੇ ਅਫਸਰਾਂ ਦੀ ਇੱਕ ਪੂਰੀ ਪ੍ਰਣਾਲੀ ਹੈ।
"ਮੈਂ ਲੰਮੇ ਸਮੇਂ ਤੋਂ ਪੰਜਾਬ ਨਾਲ ਜੁੜੇ ਮੁੱਦਿਆਂ ਲਈ ਲੜਿਆ ਹਾਂ... ਇੱਥੇ ਦਾਗ਼ੀ ਨੇਤਾਵਾਂ, ਅਫ਼ਸਰਾਂ ਦਾ ਇੱਕ ਸਿਸਟਮ ਸੀ, ਹੁਣ ਤੁਸੀਂ ਉਸੇ ਨੂੰ ਦੁਹਰਾਅ ਨਹੀਂ ਸਕਦੇ... ਮੈਂ ਆਪਣੇ ਸਿਧਾਂਤਾਂ 'ਤੇ ਖੜਾਂਗਾ,"ਉਨ੍ਹਾਂ ਆਖਿਆ।
ਉਨ੍ਹਾਂ ਕਾਂਗਰਸ ਦੀ ਅੰਤਰਿਮ ਪ੍ਰਧਾਨ, ਸੋਨੀਆ ਗਾਂਧੀ ਨੂੰ ਮੰਗਲਵਾਰ ਨੂੰ ਭੇਜੇ ਆਪਣੇ ਅਸਤੀਫ਼ੇ 'ਤੇ ਲਿਖੀ ਗੱਲ ਨੂੰ ਦੁਹਰਾਉਂਦਿਆਂ ਆਖਿਆ,"ਸਮਝੌਤੇ ਨਾਲ ਇਨਸਾਨ ਦੇ ਕਿਰਦਾਰ ਵਿੱਚ ਨਿਘਾਰ ਆਉਂਦਾ ਹੈ, ਮੈਂ ਪੰਜਾਬ ਦੇ ਭਵਿੱਖ ਅਤੇ ਪੰਜਾਬ ਦੀ ਭਲਾਈ ਦੇ ਏਜੰਡੇ 'ਤੇ ਕਦੇ ਵੀ ਸਮਝੌਤਾ ਨਹੀਂ ਕਰ ਸਕਦਾ।"
ਦੱਸਣਯੋਗ ਹੈ ਕਿ ਸਿੱਧੂ ਨੇ, ਮੰਗਲਵਾਰ ਨੂੰ ਪੰਜਾਬ ਕਾਂਗਰਸ ਦੇ ਮੁਖੀ ਦੇ ਅਹੁਦੇ ਤੋਂ ਅਸਤੀਫ਼ਾ ਦਿੱਤਾ ਸੀ।
ਦੱਸਿਆ ਜਾ ਰਿਹਾ ਹੈ ਕਿ ਸਿੱਧੂ ਨੌਕਰਸ਼ਾਹੀ ਪ੍ਰਬੰਧ ਅਤੇ ਪੰਜਾਬ ਦੀ ਕੈਬਨਿਟ ਵਿੱਚ ਵਾਧੇ 'ਚ ਉਹਨਾਂ ਦੀਆਂ ਹਦਾਇਤਾਂ ਨੂੰ ਅਣਗੌਲਿਆਂ ਕਰਨ ਕਰਕੇ ਨਿਰਾਸ਼ ਹਨ।
ਜ਼ਿਕਰਯੋਗ ਹੈ ਕਿ ਸਿੱਧੂ ਨੂੰ 23 ਜੁਲਾਈ ਨੂੰ, ਕਾਂਗਰਸ ਦੀ ਪੰਜਾਬ ਇਕਾਈ ਵਿੱਚ ਕਈ ਮਹੀਨਿਆਂ ਤੋਂ ਚੱਲਦੀ ਗੜਬੜ ਤੋਂ ਬਾਅਦ, ਪੰਜਾਬ ਪ੍ਰਦੇਸ਼ ਕਾਂਗਰਸ ਕਮੇਟੀ ਦਾ ਪ੍ਰਧਾਨ ਥਾਪਿਆ ਗਿਆ ਸੀ।
ਸਿੱਧੂ ਦੇ ਪਾਰਟੀ ਦੇ ਸੂਬਾਈ ਮੁਖੀ ਦੇ ਅਹੁਦੇ ਤੋਂ ਅਸਤੀਫ਼ੇ ਨੇ ਪੰਜਾਬ ਕਾਂਗਰਸ ਵਿਚਲੀ ਮੁਸੀਬਤ ਨੂੰ ਹੋਰ ਗੰਭੀਰ ਕਰ ਦਿੱਤਾ ਹੈ ਅਤੇ ਪਾਰਟੀ ਵਿੱਚ ਚਰਚਾਵਾਂ ਤੇ ਵਿਚਾਰ-ਵਟਾਂਦਰਿਆਂ ਦੇ ਦੌਰ ਨੂੰ ਵੀ ਵਧਾ ਦਿੱਤਾ ਹੈ।
ਉਹਨਾਂ ਦੇ ਨੇੜਲੇ ਇੱਕ ਮੰਤਰੀ ਅਤੇ ਤਿੰਨ ਕਾਂਗਰਸ ਨੇਤਾਵਾਂ ਨੇ ਆਪਣੇ ਅਹੁਦਿਆਂ ਤੋਂ ਅਸਤੀਫ਼ਾ ਦੇ ਦਿੱਤਾ ਹੈ।
ਪੰਜਾਬ ਵਿੱਚ ਅਗਲੇ ਸਾਲ ਹੋਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ, ਕਾਂਗਰਸ ਹਾਈ ਕਮਾਂਡ ਲਈ ਇਹ ਇੱਕ ਕਰਾਰੇ ਝਟਕੇ ਦੀ ਤਰਾਂ ਹੈ, ਜੋ ਪੰਜਾਬ ਇਕਾਈ ਵਿਚਲੀ ਗੜਬੜ ਨੂੰ ਸੁਲਝਾਉਣ ਦੀ ਆਸ ਲਾਈ ਬੈਠੀ ਸੀ।
ਗ਼ੌਰਤਲਬ ਹੈ ਕਿ ਪੰਜਾਬ ਕਾਂਗਰਸ ਵਿੱਚ ਸਿੱਧੂ ਅਤੇ ਕੈਪਟਨ ਅਮਰਿੰਦਰ ਸਿੰਘ ਵਿਚਾਲੇ, ਅਗਸਤ ਮਹੀਨੇ ਵਿੱਚ ਤਕਰਾਰ ਵਧਣ ਤੋਂ ਬਾਅਦ, ਪਾਰਟੀ ਨੇ ਸਿੱਧੂ ਨੂੰ, ਮੁੱਖ ਮੰਤਰੀ ਦੀ ਇੱਛਾ ਖ਼ਿਲਾਫ਼ ਕਾਂਗਰਸ ਦਾ ਪ੍ਰਧਾਨ ਬਣਾਇਆ ਸੀ।
