18.13C Vancouver 18.13C VancouverMar 4, 2026 6:31 PM - Connect Newsroom - Ramandeep Kaur with files from The Canadian Press
ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਦੇਸ਼ ਦੇ ਅੰਤਰਰਾਸ਼ਟਰੀ ਵਪਾਰ ਨੂੰ ਨਵੀਂ ਦਿਸ਼ਾ ਦੇਣ ਲਈ ਦੁਨੀਆ ਦੀ ਸਭ ਤੋਂ ਵੱਡੀ ਇਨਵੈਸਟਮੈਂਟ ਕੰਪਨੀ ਬਲੈਕ ਰੌਕ ਦੇ ਅਰਥਸ਼ਾਸਤਰੀ ਗਲੇਨ ਪਰਵਸ ਨੂੰ ਕੈਨੇਡਾ ਦੇ ਨਵੇਂ ਡਿਪਟੀ ਮਨਿਸਟਰ ਔਫ ਇੰਟਰਨੈਸ਼ਨਲ ਟਰੇਡ ਨਿਯੁਕਤ ਕੀਤਾ ਹੈ।
ਇਹ ਨਿਯੁਕਤੀ ਕੈਨੇਡਾ ਦੇ ਐਕਸਪੋਰਟ ਨੂੰ ਅਮਰੀਕਾ ਤੋਂ ਇਲਾਵਾ ਹੋਰ ਗਲੋਬਲ ਬਾਜ਼ਾਰਾਂ ਵਿਚ ਵਧਾਉਣ ਦੇ ਉਦੇਸ਼ ਨਾਲ ਕੀਤੀ ਗਈ ਹੈ। ਪਰਵਸ ਜਨਵਰੀ 2025 ਤੋਂ ਨਿਊਯਾਰਕ ਵਿਚ ਬਲੈਕਰੌਕ ਇਨਵੈਸਟਮੈਂਟ ਇੰਸਟੀਚਿਊਟ ਦੇ ਮੈਕਰੋ ਰਿਸਰਚ ਵਿਭਾਗ ਦੇ ਗਲੋਬਲ ਹੈੱਡ ਵਜੋਂ ਸੇਵਾਵਾਂ ਨਿਭਾ ਰਹੇ ਸਨ। ਉਨ੍ਹਾਂ ਕੋਲ ਕੈਨੇਡਾ ਸਰਕਾਰ ਵਿਚ 12 ਸਾਲ ਕੰਮ ਕਰਨ ਦਾ ਵੀ ਤਜ਼ਰਬਾ ਹੈ,ਜਿਸ ਵਿਚ ਵਿੱਤੀ ਡਿਪਾਰਟਮੈਂਟ ਦੇ ਸਹਾਇਕ ਡਿਪਟੀ ਮਿਨਿਸਟਰ ਦੀ ਭੂਮਿਕਾ ਸ਼ਾਮਲ ਹੈ। ਪਰਵਸ ਨੇ ਆਈ.ਐਮ.ਐਫ.ਵਿਚ ਵੀ ਕੰਮ ਕੀਤਾ ਹੈ।
ਗੌਰਤਲਬ ਹੈ ਕਿ ਪ੍ਰਧਾਨ ਮੰਤਰੀ ਨੇ ਪ੍ਰਾਈਵੇਟ ਸੈਕਟਰ ਵਿਚ ਵਿੱਤੀ ਤਜਰਬੇ ਵਾਲੇ ਕਈ ਲੋਕਾਂ ਨੂੰ ਅਹਿਮ ਸਰਕਾਰੀ ਅਹੁਦਿਆਂ 'ਤੇ ਨਿਯੁਕਤ ਕੀਤਾ ਹੈ, ਜਿਸ ਵਿਚ ਰੌਇਲ ਬੈਂਕ ਔਫ ਕੈਨੇਡਾ ਦੇ ਡੱਗ ਗੁਜ਼ਮੈਨ ਨੂੰ ਨਵੀਂ ਬਣਾਈ ਡਿਫੈਂਸ ਇਨਵੈਸਟਮੈਂਟ ਏਜੰਸੀ ਦਾ ਹੈੱਡ ਬਣਾਉਣਾ ਸ਼ਾਮਲ ਹੈ।
ਕਾਰਨੀ ਨੇ ਇਸ ਦੇ ਨਾਲ ਹੀ ਐਕਸਟੋਸ਼ਨ ਮਨੀ ਨੂੰ ਟ੍ਰੈਕ ਕਰਨ ਲਈ ਨਵੀਂ ਵਿੱਤੀ ਅਪਰਾਧ ਏਜੰਸੀ ਦੀ ਕਮਾਨ ਰੌਬ ਸਟੀਵਰਟ ਨੂੰ ਸੌਂਪੀ ਹੈ, ਜੋ ਹੁਣ ਤੱਕ ਅੰਤਰਰਾਸ਼ਟਰੀ ਵਪਾਰ ਵਿਭਾਗ ਦੇ ਡਿਪਟੀ ਮੰਤਰੀ ਵਜੋਂ ਕੰਮ ਕਰ ਰਹੇ ਸਨ।
