12.2C Vancouver 12.2C VancouverApr 16, 2025 12:55 PM - The Canadian Press
ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਬਣਨ ਦੀ ਦੌੜ ਵਿਚ ਮੁੱਖ ਮੁਕਾਬਲੇ ਵਿਚ ਚੱਲ ਰਹੇ ਲਿਬਰਲ ਲੀਡਰ ਮਾਰਕ ਕਾਰਨੀ ਅਤੇ ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਸਮੇਤ ਹੋਰ ਪ੍ਰਮੁੱਖ ਪਾਰਟੀਆਂ ਦੇ ਲੀਡਰ ਅੱਜ ਸ਼ਾਮ 6 ਵਜੇ ਮਾਂਟਰੀਅਲ ਵਿਚ ਪਹਿਲੀ ਫ੍ਰੈਂਚ ਭਾਸ਼ਾ ਦੀ ਬਹਿਸ ਵਿਚ ਆਹਮੋ-ਸਾਹਮਣੇ ਹੋਣਗੇ। ਇਹ ਡਿਬੇਟ ਪਹਿਲਾਂ 8 ਵਜੇ ਸ਼ੁਰੂ ਹੋਣੀ ਸੀ, ਜਿਸ ਦਾ ਬਾਅਦ ਵਿਚ ਸਮਾਂ ਬਦਲ ਦਿੱਤਾ ਗਿਆ। ਕਿਊਬੈਕ -ਓਨਟਾਰੀਓ ਤੋਂ ਬਾਅਦ 78 ਸੰਸਦੀ ਸੀਟਾਂ ਨਾਲ ਦੂਜਾ ਪ੍ਰਮੁੱਖ ਸੂਬਾ ਹੈ, ਜਿੱਥੇ ਇਹ ਡਿਬੇਟ ਹੋ ਰਹੀ ਹੈ।
ਕਾਰਨੀ ਲਈ ਇਹ ਡਿਬੇਟ ਉਨ੍ਹਾਂ ਦੀ ਫ੍ਰੈਂਚ ਭਾਸ਼ਾ 'ਤੇ ਪਕੜ ਦੀ ਪਰਖ ਹੋਵੇਗੀ, ਜਦੋਂ ਕਿ ਪੌਲੀਐਵ ਇਸ ਡਿਬੇਟ ਰਾਹੀਂ ਆਪਣੀ ਸਥਿਤੀ ਨੂੰ ਸੁਧਾਰਨ ਦੀ ਕੋਸ਼ਿਸ਼ ਕਰਨਗੇ। ਕੈਨੇਡੀਅਨ ਸਰਕਾਰ ਲਈ ਅੰਗਰੇਜ਼ੀ ਅਤੇ ਫ੍ਰੈਂਚ ਦੋਵੇਂ ਮੁੱਖ ਭਾਸ਼ਾਵਾਂ ਹਨ, ਜਿਨ੍ਹਾਂ ਨੂੰ ਸੰਸਦ ਤੇ ਸਰਕਾਰ ਦੇ ਸਾਰੇ ਅਦਾਰਿਆਂ ਵਿਚ ਬਰਾਬਰ ਦਾ ਦਰਜਾ ਪ੍ਰਾਪਤ ਹੈ।
ਐਨ.ਡੀ.ਪੀ ਲੀਡਰ ਜਗਮੀਤ ਸਿੰਘ ਤੇ ਬਲਾਕ ਕਿਊਬੈਕਵਾ ਲੀਡਰ ਈਵ-ਫ੍ਰਾਂਸੋਆ ਬਲੈਂਚੇਟ ਮੌਜੂਦਾ ਸਮੇਂ ਅਜਿਹੇ ਦੋ ਹੀ ਨੇਤਾ ਹਨ ਜਿਨ੍ਹਾਂ ਨੂੰ ਪ੍ਰਧਾਨ ਮੰਤਰੀ ਦੀ ਰੇਸ ਵਿਚ ਪਹਿਲਾਂ ਤੋਂ ਡਿਬੇਟ ਦਾ ਤਜਰਬਾ ਹੈ ਪਰ ਹਾਲ ਹੀ ਦੇ ਸਰਵੇ ਦੱਸਦੇ ਹਨ ਕਿ ਕਿਊਬੈਕ ਵਿਚ ਦੋਹਾਂ ਦੀ ਸਪੋਰਟ ਘਟੀ ਹੈ, ਜੋ ਕਿ ਕਿਸੇ ਵੀ ਪਾਰਟੀ ਲਈ ਸਰਕਾਰ ਬਣਾਉਣ ਲਈ ਪ੍ਰਮੁੱਖ ਸੂਬਾ ਹੈ। ਉਥੇ ਹੀ, ਪਾਰਟੀ ਲੀਡਰਾਂ ਵਿਚਕਾਰ ਇੰਗਲਿਸ਼ ਡਿਬੇਟ ਕੱਲ੍ਹ ਸ਼ਾਮ 7 ਵਜੇ ਹੋਵੇਗੀ।
