12.8C Vancouver 12.8C VancouverJun 25, 2025 5:06 PM - Connect Newsroom
ਕੈਨੇਡਾ ਸਣੇ ਨੈਟੋ ਦੇ ਸਾਥੀ ਮੁਲਕਾਂ ਨੇ ਅਗਲੇ 10 ਸਾਲਾਂ ਵਿਚ ਡਿਫੈਂਸ ਖ਼ਰਚ ਨੂੰ ਜੀਡੀਪੀ ਦੇ ਪੰਜ ਫੀਸਦੀ ਤੱਕ ਵਧਾਉਣ ਨੂੰ ਹਰੀ ਝੰਡੀ ਦੇ ਦਿੱਤੀ ਹੈ। ਇਸ ਮਤਲਬ ਹੈ ਕਿ ਔਟਵਾ ਸਮੇਤ ਪੱਛਮੀ ਮੁਲਕ 2035 ਤੱਕ ਡਿਫੈਂਸ ਉੱਤੇ ਵੱਡਾ ਇਨਵੈਸਟ ਕਰਨ ਜਾ ਰਹੇ ਹਨ।
ਨੀਦਰਲੈਂਡ ਵਿਚ ਅੱਜ ਨੈਟੋ ਸੰਮੇਲਨ ਦੌਰਾਨ ਇਸ ਨਵੇਂ ਟਾਰਗੇਟ ਨੂੰ ਮਨਜ਼ੂਰੀ ਦਿੱਤੀ ਗਈ, ਇਸ ਫੈਸਲੇ ਨਾਲ ਰਾਸ਼ਟਰਪਤੀ ਡੋਨਲਡ ਟਰੰਪ ਨੂੰ ਇੱਕ ਮਹੱਤਵਪੂਰਨ ਨੀਤੀਗਤ ਜਿੱਤ ਮਿਲੀ ਹੈ। ਨੈਟੋ ਦੇ ਸਕੱਤਰ ਜਨਰਲ ਮਾਰਕ ਰੂਟੇ ਨੇ ਡਿਫੈਂਸ ਖਰ਼ਚ ਵਧਾਉਣ ਲਈ ਟਰੰਪ ਦੀ ਸ਼ਲਾਘਾ ਕਰਦੇ ਹੋਏ ਬੈਠਕ ਦੀ ਸ਼ੁਰੂਆਤ ਕੀਤੀ।
ਪੰਜ ਫੀਸਦੀ ਟਾਰਗੇਟ ਨੂੰ ਦੋ ਹਿੱਸਿਆਂ ਵਿਚ ਵੰਡਿਆ ਗਿਆ ਹੈ, ਜਿਸ ਵਿਚ ਪਹਿਲਾ 3.5 ਫੀਸਦੀ ਲੜਾਕੂ ਜਹਾਜ਼ਾਂ ਅਤੇ ਹਥਿਆਰਾਂ ਸਮੇਤ ਪ੍ਰਮੁੱਖ ਡਿਫੈਂਸ ਜ਼ਰੂਰਤਾਂ 'ਤੇ ਫੋਕਸ ਹੋਵੇਗਾ ਅਤੇ ਬਾਕੀ 1.5 ਫੀਸਦੀ ਡਿਫੈਂਸ ਨਾਲ ਸਬੰਧਤ ਇਨਫਰਾਸਟਕਚਰ 'ਤੇ ਖ਼ਰਚ ਕੀਤਾ ਜਾਵੇਗਾ।
ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਨਵੇਂ ਨੈਟੋ ਟਾਰਗੇਟ ਦਾ ਸਮਰਥਨ ਕਰਦੇ ਕਿਹਾ ਕਿ ਵਿਸ਼ਵ ਤੇਜ਼ੀ ਨਾਲ ਖ਼ਤਰਨਾਕ ਮੋੜ ਵੱਲ ਵੱਧ ਰਿਹਾ ਹੈ ਅਤੇ ਇਹ ਡਿਵਾਈਡ ਹੋ ਰਿਹਾ ਹੈ, ਅਜਿਹੇ ਵਿਚ ਕੈਨੇਡਾ ਨੂੰ ਆਪਣੀ ਪ੍ਰਭੂਸੱਤਾ, ਆਪਣੇ ਹਿੱਤਾਂ ਅਤੇ ਆਪਣੇ ਸਹਿਯੋਗੀਆਂ ਦੀ ਬਿਹਤਰ ਸੁਰੱਖਿਆ ਲਈ ਡਿਫੈਂਸ ਨੂੰ ਮਜਬੂਤ ਕਰਨਾ ਹੋਵੇਗਾ।
