22.17C Vancouver 22.17C VancouverJun 19, 2026 1:28 PM - Connect Newsroom - Ramandeep Kaur with files from The Canadian Press
ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਮੰਨਿਆ ਹੈ ਕਿ ਰਾਸ਼ਟਰਪਤੀ ਡੌਨਲਡ ਟਰੰਪ CUSMA ਵਪਾਰਕ ਸਮਝੌਤੇ ਨੂੰ ਅੱਗੇ ਵਧਾਉਣ ਨੂੰ ਲੈ ਕੇ ਹਾਂ-ਪੱਖੀ ਨਹੀਂ ਹਨ, ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਇਹ ਗੱਲ ਕਿਸੇ ਤੋਂ ਲੁਕੀ ਹੋਈ ਨਹੀਂ ਹੈ, ਹਾਲਾਂਕਿ, ਪੀ. ਐੱਮ. ਕਾਰਨੀ ਨੇ ਭਰੋਸਾ ਦਿੱਤਾ ਕਿ ਇਹ ਸਮਝੌਤਾ ਘੱਟੋ-ਘੱਟ ਆਉਣ ਵਾਲੇ ਕੁਝ ਸਮੇਂ ਤੱਕ ਤਾਂ ਲਾਗੂ ਰਹੇਗਾ।
ਉਨ੍ਹਾਂ ਬੀਤੀ ਸ਼ਾਮ ਵੈਨਕੂਵਰ ਵਿਚ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਇਹ ਟਿੱਪਣੀ ਟਰੰਪ ਦੇ ਉਸ ਬਿਆਨ ਤੋਂ ਬਾਅਦ ਕੀਤੀ, ਜਿਸ ਵਿਚ ਉਨ੍ਹਾਂ ਇਸ ਵਪਾਰਕ ਸਮਝੌਤੇ ਨੂੰ ਅੱਗੇ ਵਧਾਉਣ ਦੀ ਬਜਾਏ ਇਸ ਨੂੰ ਖ਼ਤਮ ਕਰਨ ਦੀ ਇੱਛਾ ਜ਼ਾਹਰ ਕੀਤੀ ਸੀ। ਕਾਰਨੀ ਨੇ ਕਿਹਾ ਕਿ ਅਮਰੀਕਾ, ਕੈਨੇਡਾ ਅਤੇ ਮੈਕਸੀਕੋ ਵਿਚੋਂ ਕਿਸੇ ਵੀ ਦੇਸ਼ ਕੋਲ ਛੇ ਮਹੀਨੇ ਦਾ ਨੋਟਿਸ ਦੇ ਕੇ ਇਸ ਸਮਝੌਤੇ ਤੋਂ ਬਾਹਰ ਹੋਣ ਦਾ ਅਧਿਕਾਰ ਹੈ ਪਰ ਔਟਵਾ ਅਤੇ ਵਾਸ਼ਿੰਗਟਨ ਅਜੇ ਵੀ ਕਈ ਅਹਿਮ ਮੁੱਦਿਆਂ, ਜਿਵੇਂ ਕਿ ਕੈਨੇਡਾ ਦੇ ਜੰਗਲਾਤ ਖੇਤਰ 'ਤੇ ਲੱਗੇ ਟੈਰਿਫਸ ਨੂੰ ਘੱਟ ਕਰਨ ਲਈ ਮਿਲ ਕੇ ਕੰਮ ਕਰ ਸਕਦੇ ਹਨ।
ਗੌਰਤਲਬ ਹੈ ਕਿ CUSMA ਨੂੰ ਲੈ ਕੇ ਇਹ ਅਨਿਸ਼ਚਿਤਤਾ ਉਦੋਂ ਹੈ ਜਦੋਂ ਆਉਣ ਵਾਲੀ 1 ਜੁਲਾਈ ਤੋਂ ਤਿੰਨੋਂ ਦੇਸ਼ਾਂ ਵਿਚਾਲੇ ਇਸ ਸਮਝੌਤੇ ਦੇ ਭਵਿੱਖ ਨੂੰ ਲੈ ਕੇ ਰਸਮੀ ਗੱਲਬਾਤ ਸ਼ੁਰੂ ਹੋਣ ਜਾ ਰਹੀ ਹੈ, ਜਿਸ ਵਿਚ ਅਮਰੀਕਾ ਵੱਲੋਂ ਨਵੇਂ ਨਿਯਮਾਂ ਨੂੰ ਲੈ ਕੇ ਸਖ਼ਤ ਰੁਖ਼ ਅਪਣਾਏ ਜਾਣ ਦੇ ਸੰਕੇਤ ਹਨ।
