ਨਾਰਵੇ, ਯੂਕੇ ਦੌਰੇ ਤੋਂ ਬਾਅਦ ਕਾਰਨੀ ਯੂ.ਕੇ. ਅਤੇ ਇਟਲੀ ਵਿੱਚ ਮਨਾਉਣਗੇ ਛੁੱਟੀਆਂ

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਆਪਣੇ ਲੇਟਸਟ ਅੰਤਰਰਾਸ਼ਟਰੀ ਦੌਰੇ ਦੀ ਸਮਾਪਤੀ ਤੋਂ ਬਾਅਦ ਯੂ.ਕੇ. ਅਤੇ ਇਟਲੀ ਵਿਚ ਕੁਝ ਦਿਨਾਂ ਦੀਆਂ ਛੁੱਟੀਆਂ ਗੁਜ਼ਾਰਨਗੇ। ਉਨ੍ਹਾਂ ਦਾ ਇਹ ਨਿੱਜੀ ਦੌਰਾ ਉਨ੍ਹਾਂ ਦੀਆਂ ਸਰਕਾਰੀ ਰੁੱਝੇਵਿਆਂ ਤੋਂ ਬਾਅਦ ਸ਼ੁਰੂ ਹੋਵੇਗਾ। ਕਾਰਨੀ 13 ਮਾਰਚ ਤੋਂ ਨਾਰਵੇ ਅਤੇ ਉਸ ਤੋਂ ਬਾਅਦ ਯੂ.ਕੇ. ਦੇ ਅਹਿਮ ਦੌਰੇ 'ਤੇ ਰਵਾਨਾ ਹੋਣਗੇ।

ਰਿਪੋਰਟਸ ਮੁਤਾਬਕ, ਪ੍ਰਧਾਨ ਮੰਤਰੀ ਸਰਕਾਰੀ ਦੌਰੇ ਤੋਂ ਬਾਅਦ 16 ਮਾਰਚ ਨੂੰ ਵਫ਼ਦ ਦੇ ਨਾਲ ਵਾਪਸ ਪਰਤਣ ਦੀ ਬਜਾਏ ਯੂਰਪ ਵਿਚ ਹੀ ਰੁਕਣਗੇ। ਉਹ ਮਾਰਚ ਬ੍ਰੇਕ ਦੌਰਾਨ ਲੰਡਨ ਅਤੇ ਰੋਮ ਵਿਚ ਆਪਣੀਆਂ ਨਿੱਜੀ ਛੁੱਟੀਆਂ ਬਿਤਾਉਣਗੇ। ਇਸ ਤੋਂ ਪਹਿਲਾਂ ਉਹ ਲੰਡਨ ਵਿਚ ਬ੍ਰਿਟਿਸ਼ ਪ੍ਰਧਾਨ ਮੰਤਰੀ ਕੀਰ ਸਟਾਰਮਰ ਨਾਲ ਮੁਲਾਕਾਤ ਕਰਨਗੇ। ਇਸ ਬੈਠਕ ਦੌਰਾਨ ਰੱਖਿਆ ਸਹਿਯੋਗ, ਵਿਸ਼ਵ ਆਰਥਿਕ ਬਦਲਾਅ ਅਤੇ ਮਿਡਲ ਈਸਟ ਦੀ ਮੌਜੂਦਾ ਸਥਿਤੀ ਵਰਗੇ ਗੰਭੀਰ ਮੁੱਦਿਆਂ 'ਤੇ ਵਿਚਾਰ-ਵਟਾਂਦਰਾ ਕੀਤਾ ਜਾਵੇਗਾ।

ਉਥੇ ਹੀ, ਸਾਲ 1980 ਤੋਂ ਬਾਅਦ ਨਾਰਵੇ ਦਾ ਅਧਿਕਾਰਤ ਦੌਰਾ ਕਰਨ ਵਾਲੇ ਕਾਰਨੀ ਪਹਿਲੇ ਕੈਨੇਡੀਅਨ ਪ੍ਰਧਾਨ ਮੰਤਰੀ ਹੋਣਗੇ। ਨਾਰਵੇ ਵਿਚ ਉਹ ਸ਼ੁੱਕਰਵਾਰ ਨੂੰ ਨੈਟੋ ਦੀ ਐਕਸਸਾਈਜ਼ ਕੋਲਡ ਰਿਸਪਾਂਸ ਦੇਖਣ ਲਈ ਸ਼ਿਰਕਤ ਕਰਨਗੇ ਅਤੇ ਓਸਲੋ ਵਿਚ ਉਨ੍ਹਾਂ ਵਲੋਂ ਨਾਰਵੇਜੀਅਨ ਪ੍ਰਧਾਨ ਮੰਤਰੀ ਜੋਨਸ ਗਹਿਰ ਸਟੋਰ ਅਤੇ ਜਰਮਨ ਚਾਂਸਲਰ ਫ੍ਰੈਡਰਿਕ ਮਰਜ਼ ਨਾਲ ਮੁਲਾਕਾਤ ਕੀਤੀ ਜਾਣੀ ਹੈ।