ਸੀ. ਬੀ. ਆਈ. ਨੇ ਗੋਲਡੀ ਬਰਾੜ ਖਿਲਾਫ਼ ਰੈੱਡ ਕਾਰਨਰ ਨੋਟਿਸ ਨੂੰ ਲੈ ਕੇ ਪੰਜਾਬ ਪੁਲਿਸ ਨੂੰ ਦਿੱਤਾ ਜਵਾਬ

ਸੀ. ਬੀ. ਆਈ. ਨੇ ਸਿੱਧੂ ਮੂਸੇਵਾਲਾ ਦੇ ਹਾਲ ਹੀ ਵਿਚ ਹੋਏ ਕਤਲ ਦੀ ਜ਼ਿੰਮੇਵਾਰੀ ਲੈਣ ਵਾਲੇ ਗੈਂਗਸਟਰ ਗੋਲਡੀ ਬਰਾੜ ਖਿਲਾਫ਼ ਪੰਜਾਬ ਪੁਲਿਸ ਵੱਲੋਂ ਰੈੱਡ ਕਾਰਨਰ ਨੋਟਿਸ (ਆਰ. ਸੀ. ਐੱਨ.) ਦੀ ਬੇਨਤੀ ਦਸ ਦਿਨ ਪਹਿਲਾਂ ਭੇਜਣ ਨੂੰ ਲੈ ਕੇ ਸਾਹਮਣੇ ਆਈਆਂ ਰਿਪੋਰਟਾਂ 'ਤੇ ਵੀਰਵਾਰ ਨੂੰ ਜਵਾਬ ਜਾਰੀ ਕੀਤਾ ਹੈ।

ਬੁੱਧਵਾਰ ਪੰਜਾਬ ਪੁਲਿਸ ਨੇ ਕਿਹਾ ਸੀ ਕਿ ਸਿੱਧੂ ਮੂਸੇਵਾਲਾ ਦੇ ਕਤਲ ਤੋਂ 10 ਦਿਨ ਪਹਿਲਾਂ 19 ਮਈ, 2022 ਨੂੰ ਉਨ੍ਹਾਂ ਨੇ ਗੋਲਡੀ ਬਰਾੜ ਖਿਲਾਫ਼ ਰੈੱਡ ਕਾਰਨਰ ਨੋਟਿਸ ਜਾਰੀ ਕਰਨ ਲਈ ਸੀ. ਬੀ. ਆਈ. ਨੂੰ ਤਜਵੀਜ਼ ਭੇਜੀ ਸੀ, ਜਿਸ ਨਾਲ ਉਸ ਨੂੰ ਭਾਰਤ ਲਿਆਉਣ ਦਾ ਰਾਹ ਪੱਧਰਾ ਹੋ ਸਕੇ।

ਸੀ. ਬੀ. ਆਈ. ਨੇ ਕਿਹਾ ਕਿ ਪੰਜਾਬ ਪੁਲਿਸ ਵੱਲੋਂ ਸਤਿੰਦਰਜੀਤ ਸਿੰਘ ਉਰਫ਼ ਗੋਲਡੀ ਖਿਲਾਫ਼ ਰੈੱਡ ਨੋਟਿਸ ਜਾਰੀ ਕਰਨ ਦਾ ਪ੍ਰਸਤਾਵ 30 ਮਈ ਨੂੰ ਦੁਪਹਿਰ 12:25 ਵਜੇ ਈ-ਮੇਲ ਰਾਹੀਂ ਮਿਲਿਆ। ਇਸੇ ਈ-ਮੇਲ ਵਿਚ 19 ਮਈ ਦੀ ਚਿੱਠੀ ਦੀ ਕਾਪੀ ਨੱਥੀ ਸੀ। 30 ਮਈ ਨੂੰ ਹੀ ਨਵੀਂ ਦਿੱਲੀ ਵਿਖੇ ਸੀ. ਬੀ. ਆਈ. ਆਈ. ਦੇ ਇੰਟਰਨੈਸ਼ਨਲ ਕੋ-ਓਪਰੇਸ਼ਨ ਯੂਨਿਟ ਨੂੰ ਪੰਜਾਬ ਪੁਲਿਸ ਤੋਂ ਉਸੇ ਪ੍ਰਸਤਾਵ ਦੀ ਹਾਰਡ ਕਾਪੀ ਮਿਲੀ। ਸੀ. ਬੀ. ਆਈ. ਨੇ ਕਿਹਾ ਕਿ ਕਾਰਵਾਈ ਪੂਰੀ ਕਰਨ ਮਗਰੋਂ 2 ਜੂਨ ਨੂੰ ਰੈੱਡ ਕਾਰਨਰ ਨੋਟਿਸ ਇੰਟਰਪੋਲ ਨੂੰ ਭੇਜ ਦਿੱਤਾ ਗਿਆ।