ਐਡਮਿੰਟਨ ਵਿਚ ਵੱਧਦਾ ਜਾ ਰਿਹਾ ਸੈੱਲ ਫੋਨ ਸਕੈਮ

ਐਡਮਿੰਟਨ ਵਿਚ ਸੈੱਲ ਫੋਨ ਸਕੈਮ ਵੱਧਦਾ ਜਾ ਰਿਹਾ ਹੈ, ਜਿਸ ਕਾਰਨ ਪੀੜਤ ਹੁਣ ਤੱਕ $600,000 ਤੋਂ ਵੱਧ ਦਾ ਧੋਖਾ ਖਾ ਚੁੱਕੇ ਹਨ। ਪੁਲਿਸ ਨੇ ਦੱਸਿਆ ਕਿ ਉਨ੍ਹਾਂ ਨੂੰ 18 ਦਸੰਬਰ ਤੱਕ ਇਸ ਤਰ੍ਹਾਂ ਦੇ ਸਕੈਮ ਦੀਆਂ 91 ਰਿਪੋਰਟਾਂ ਮਿਲ ਚੁੱਕੀਆਂ ਹਨ, ਜਿਸ ਵਿਚ ਲੋਕਾਂ ਨੂੰ ਫੋਨ ਦੇਣ ਦੇ ਝੂਠੇ ਔਫਰ ਦਿੱਤੇ ਜਾਂਦੇ ਹਨ।

ਪੀੜਤਾਂ ਮੁਤਾਬਕ ਉਨ੍ਹਾਂ ਨੂੰ ਟੇਲਸ ਦੇ ਨਾਮ 'ਤੇ ਫੋਨ ਆਏ ਕਿ ਉਹ ਘੱਟ ਰੇਟ ਵਿਚ ਸੈੱਲ ਫੋਨ ਖਰੀਦ ਸਕਦੇ ਹਨ। ਇਸ ਲਈ ਉਨ੍ਹਾਂ ਨੂੰ ਬੁਕਿੰਗ ਕਰਵਾਉਣ ਦੇ ਨਾਂ ਆਪਣਾ ਸਕਿਓਰਿਟੀ ਕੌਡ ਅਤੇ ਪਾਸਵਰ਼ਡ ਦੇਣ ਲਈ ਕਿਹਾ ਗਿਆ।

ਪੁਲਿਸ ਮੁਤਾਬਕ ਇਸ ਦੇ ਬਾਅਦ ਸਕੈਮਰਜ਼ ਪੀੜਤਾਂ ਦੇ ਅਕਾਊਂਟ 'ਤੇ ਲੌਗ ਇਨ ਕਰ ਕੇ ਨਵਾਂ ਫੋਨ ਆਰਡਰ ਕਰਕੇ ਉਨ੍ਹਾਂ ਦੇ ਘਰ ਫੋਨ ਭੇਜ ਦਿੰਦੇ ਹਨ। ਪੀੜਤਾਂ ਨੂੰ ਕਿਹਾ ਜਾਂਦਾ ਹੈ ਕਿ ਜਦ ਉਨ੍ਹਾਂ ਨੂੰ ਫੋਨ ਮਿਲੇ ਤਾਂ ਉਨ੍ਹਾਂ ਨੂੰ ਕੌਲ ਕਰਨ। ਜਦ ਪੀੜਤ ਫੋਨ ਐਕਟੀਵੇਟ ਕਰਦੇ ਹਨ ਤਾਂ ਉਹ ਦੱਸਦੇ ਹਨ ਕਿ ਫੋਨ ਵਿਚ ਖਰਾਬੀ ਹੈ ਅਤੇ ਇਸ ਨੂੰ ਸਕੈਮਰਜ਼ ਆਪਣੇ ਐਡਰੈੱਸ 'ਤੇ ਬਿੱਲ ਸਣੇ ਵਾਪਸ ਮੰਗਵਾ ਲੈਂਦੇ ਹਨ। ਇਸ ਤਰ੍ਹਾਂ ਲੋਕ ਪੈਸੇ ਅਤੇ ਸੈੱਲ ਫੋਨ ਗੁਆ ਲੈਂਦੇ ਹਨ।

ਔਫੀਸਰਜ਼ ਨੇ ਲੋਕਾਂ ਨੂੰ ਅਲਰਟ ਕਰਦਿਆਂ ਕਿਹਾ ਕਿ ਉਹ ਇਸ ਤਰ੍ਹਾਂ ਦੇ ਧੋਖੇ ਵਿਚ ਫਸਣ ਤੋਂ ਬਚਣ ਅਤੇ ਉਨ੍ਹਾਂ ਨਾਲ ਸੰਪਰਕ ਕਰਕੇ ਮਦਦ ਲੈਣ।