ਸੀ.ਐਫ.ਆਈ.ਏ. ਵਲੋਂ ਦੇਸ਼ ਦੇ ਵੱਡੇ ਗ੍ਰੋਸਰੀ ਸਟੋਰਾਂ ਅਤੇ ਫੂਡ ਕੰਪਨੀਆਂ ਦੇ ਖਿਲਾਫ ਕਾਰਵਾਈ ਸ਼ੁਰੂ

ਕੈਨੇਡੀਅਨ ਫੂਡ ਇੰਸਪੈਕਸ਼ਨ ਏਜੰਸੀ ਨੇ ਦੇਸ਼ ਦੇ ਵੱਡੇ ਗ੍ਰੋਸਰੀ ਸਟੋਰਾਂ ਅਤੇ ਫੂਡ ਕੰਪਨੀਆਂ ਦੇ ਖਿਲਾਫ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਇਹ ਕਾਰਵਾਈ ਉਨ੍ਹਾਂ ਕੰਪਨੀਆਂ 'ਤੇ ਕੀਤੀ ਜਾ ਰਹੀ ਹੈ ਜੋ ਵਿਦੇਸ਼ੀ ਖਾਣ-ਪੀਣ ਦੀਆਂ ਚੀਜ਼ਾਂ ਨੂੰ 'ਕੈਨੇਡੀਅਨ' ਦੱਸ ਕੇ ਗਾਹਕਾਂ ਨੂੰ ਗੁਮਰਾਹ ਕਰ ਰਹੀਆਂ ਹਨ। ​ਇਹ ਕਦਮ ਸਰਕਾਰ ਦੀ ਬਾਇ ਕੈਨੇਡੀਅਨ ਮੁਹਿੰਮ ਦੇ ਇੱਕ ਸਾਲ ਪੂਰੇ ਹੋਣ ਤੋਂ ਬਾਅਦ ਚੁੱਕਿਆ ਗਿਆ ਹੈ।

ਸੀ.ਐਫ.ਆਈ.ਏ. ਨੇ ਲੋਬਲੋਅ ਦੇ ਅਧੀਨ ਓਨਟਾਰੀਓ ਵਿਚ ਚੱਲਣ ਵਾਲੇ ਰੀਅਲ ਕੈਨੇਡੀਅਨ ਸੁਪਰਸਟੋਰ ਅਤੇ ਫੋਰਟੀਨੋਸ ਨੂੰ ਅਕਤੂਬਰ 2025 ਦੀਆਂ ਘਟਨਾਵਾਂ ਲਈ $10,000 ਦਾ ਜੁਰਮਾਨਾ ਕੀਤਾ ਹੈ। ਇਹਨਾਂ ਸਟੋਰਾਂ ਵਲੋਂ ਇਪੋਰਟਡ ਫੂਡ ਨੂੰ ਕੈਨੇਡੀਅਨ ਦੱਸ ਕੇ ਪ੍ਰਮੋਟ ਕੀਤਾ ਗਿਆ ਸੀ। ਸੋਬੇਸ ਖਿਲਾਫ ਵੀ ਇਸ ਮਾਮਲੇ ਵਿਚ ਜਾਂਚ ਚੱਲ ਰਹੀ ਹੈ। ਸੀ.ਐਫ.ਆਈ.ਏ. ਮੁਤਾਬਕ,ਹੁਣ ਤੱਕ ਪੰਜ ਫੂਡ ਬਿਜ਼ਨਸ ਨੂੰ ਗਲਤ ਲੇਬਲਿੰਗ ਅਤੇ ਐਡਵਰਟਾਈਸਿੰਗ ਲਈ ਜੁਰਮਾਨਾ ਕੀਤਾ ਜਾ ਚੁੱਕਾ ਹੈ।

ਇਹ ਸਾਰੀਆਂ ਕਾਰਵਾਈਆਂ ਸੇਫ ਫੂਡ ਫੌਰ ਕੈਨੇਡੀਅਨ ਐਕਟ ਤਹਿਤ ਕੀਤੀਆਂ ਗਈਆਂ ਹਨ, ਜੋ ਕਿਸੇ ਵੀ ਫੂਡ ਪ੍ਰੋਡਕਟ ਦੇ ਮੂਲ ਸਥਾਨ ਬਾਰੇ ਗਲਤ ਕਲੇਮ ਜਾਂ ਇਸ਼ਤਿਹਾਰਬਾਜ਼ੀ 'ਤੇ ਰੋਕ ਲਗਾਉਂਦਾ ਹੈ। ਏਜੰਸੀ ਮੁਤਾਬਕ, ਇਪੋਰਟਡ ਘਿਓ ਦੀ ਕੈਨੇਡੀਅਨ ਲੇਬਲਿੰਗ ਕਰਨ ਦੇ ਮਾਮਲੇ ਵਿਚ ਉਸ ਨੇ ਮੀਟੈਕਸ ਫਾਰਮਜ਼ ਲਿਮਟਿਡ ਨੂੰ ਵੀ $10,000 ਜੁਰਮਾਨਾ ਲਗਾਇਆ ਹੈ।