ਏਅਰ ਕੈਨੇਡਾ ਦੇ ਪਾਇਲਟਾਂ ਦੀ ਹੜਤਾਲ ਦੀ ਡੈੱਡਲਾਈਨ ਨੇੜੇ ਹੋਣ ਕਾਰਨ ਉਡਾਣਾਂ ਰੱਦ ਹੋਣ ਦੀਆਂ ਸੰਭਾਵਨਾਵਾਂ ਵਧੀਆਂ

ਏਅਰ ਕੈਨੇਡਾ ਵਲੋਂ ਅੱਜ ਤੋਂ ਕੁਝ ਉਡਾਣਾਂ ਨੂੰ ਰੱਦ ਕਰਨਾ ਸ਼ੁਰੂ ਕੀਤਾ ਜਾਵੇਗਾ। ਉਥੇ ਹੀ, ਜੇ ਐਤਵਾਰ ਦੀ ਡੈੱਡਲਾਈਨ ਤੱਕ ਏਅਰਲਾਈਨ ਤੇ ਪਾਇਲਟਸ ਵਿਚਕਾਰ ਕੋਈ ਸਮਝੌਤਾ ਸਿਰੇ ਨਾ ਚੜ੍ਹਿਆ ਤਾਂ 18 ਸਤੰਬਰ ਤੱਕ ਏਅਰ ਕੈਨੇਡਾ ਦਾ ਕੰਮਕਾਜ ਪੂਰਨ ਤੌਰ 'ਤੇ ਖੜ੍ਹ ਸਕਦਾ ਹੈ।

ਏਅਰਲਾਈਨ ਨੇ ਕਿਹਾ ਕਿ ਕਾਰਗੋ ਅਤੇ ਕੁਝ ਸੇਵਾਵਾਂ ਸ਼ੁੱਕਰਵਾਰ ਤੋਂ ਪ੍ਰਭਾਵਿਤ ਹੋਣੀਆਂ ਸ਼ੁਰੂ ਹੋ ਜਾਣਗੀਆਂ। ਕੰਪਨੀ ਦੇ ਪ੍ਰਧਾਨ ਅਤੇ ਸੀ.ਈ.ਓ ਮਾਈਕਲ ਰੂਸੋ ਨੇ ਕਿਹਾ ਕਿ ਕੰਮਕਾਜ ਰੁਕਣ ਨਾਲ ਏਅਰਲਾਈਨ ਦੇ ਕਰੀਬ 80 ਫੀਸਦੀ ਯਾਤਰੀ ਪ੍ਰਭਾਵਿਤ ਹੋਣਗੇ।

ਹਾਲਾਂਕਿ, ਏਅਰ ਕੈਨੇਡਾ ਐਕਸਪ੍ਰੈਸ ਦੀਆਂ ਉਡਾਣਾਂ ਜਾਰੀ ਰਹਿਣਗੀਆਂ ਕਿਉਂਕਿ ਇਹ ਸੇਵਾਵਾਂ ਉਸ ਦੀਆਂ ਖੇਤਰੀ ਭਾਈਵਾਲ ਏਅਰਲਾਈਨਜ਼ ਪ੍ਰਦਾਨ ਕਰਦੀਆਂ ਹਨ ਪਰ ਇਨ੍ਹਾਂ ਵਿਚ ਏਅਰ ਕੈਨੇਡਾ ਦੇ ਰੋਜ਼ਾਨਾ ਗਾਹਕ ਦਾ ਲਗਭਗ 20 ਫੀਸਦੀ ਹਿੱਸਾ ਹੀ ਸਫਰ ਕਰਦਾ ਹੈ। ਏਅਰ ਕੈਨੇਡਾ ਨੇ ਕਿਹਾ ਕਿ ਜੇ ਸੇਵਾਵਾਂ ਪੂਰਨ ਤੌਰ 'ਤੇ ਬੰਦ ਹੋਈਆ ਤਾਂ ਆਮ ਓਪਰੇਸ਼ਨ ਵਾਪਸ ਬਹਾਲ ਹੋਣ ਵਿਚ 7 ਤੋਂ 10 ਦਿਨ ਦਾ ਸਮਾਂ ਲੱਗੇਗਾ।