ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਸੰਗਰੂਰ ਤੋਂ ਚੋਣ ਲੜ ਰਹੇ ਸੁਖਪਾਲ ਖਹਿਰਾ ’ਤੇ ਸਾਧੇ ਤਿੱਖੇ ਨਿਸ਼ਾਨੇ

ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਸੰਗਰੂਰ ਤੋਂ ਚੋਣ ਲੜ ਰਹੇ ਸੁਖਪਾਲ ਖਹਿਰਾ ’ਤੇ ਤਿੱਖੇ ਨਿਸ਼ਾਨੇ ਸਾਧੇ ਹਨ। ਮੁੱਖ ਮੰਤਰੀ ਨੇ ਭਲੁੱਥ ਹਲਕੇ ਵਿਚ ਚੋਣ ਰੈਲੀ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਬਿਜਲੀ ਬੋਰਡ ਨੂੰ ਚਿੱਠੀ ਲਿਖ ਕੇ 10 ਮੋਟਰਾਂ ਦੀ ਸਬਸਿਡੀ ਛੱਡਣ ਦੀਆਂ ਗੱਲਾਂ ਕਰਨ ਵਾਲੇ ਸੁਖਪਾਲ ਖਹਿਰਾ ਨੇ ਪੈਸੇ ਭਰਨਾ ਤਾਂ ਦੂਰ ਮਹਿਕਮੇ ਦਾ ਫਾਰਮ ਤੱਕ ਨਹੀਂ ਭਰਿਆ, ਇਹ ਹੈ ਥਾਂ-ਥਾਂ ’ਤੇ ਪਾਰਟੀਆਂ ਬਦਲਣ ਵਾਲਿਆਂ ਦਾ ਕਿਰਦਾਰ।

ਭਗਵੰਤ ਮਾਨ ਨੇ ਕਿਹਾ ਕਿ ਡਰੱਗ ਕੇਸ ’ਚ ਜ਼ਮਾਨਤ ’ਤੇ ਬਾਹਰ ਆਏ ਸੁਖਪਾਲ ਖਹਿਰਾ ਕੋਲ ਬਿਨਾਂ ਕੰਮਕਾਰ ਦੇ ਇੰਨੀ ਜ਼ਮੀਨ ਜਾਇਦਾਦ ਕਿਵੇਂ ਹੈ ਲੋਕ ਇਹ ਚੰਗੀ ਤਰ੍ਹਾਂ ਜਾਣਦੇ ਨੇ। ਉਨ੍ਹਾਂ ਕਿਹਾ ਕਿ ਪਹਿਲਾਂ ਬਠਿੰਡੇ ਵਾਲਿਆਂ ਨੇ ਖਹਿਰੇ ਨੂੰ ਪੁੱਠੇ ਪੈਰੀਂ ਮੋੜਿਆ ਸੀ ਹੁਣ ਸੰਗਰੂਰ ਵਾਲੇ ਵੀ ਉਸ ਨੂੰ ਘਰ ਵਾਪਸ ਮੋੜਨਗੇ।