14.32C Vancouver 14.32C VancouverMay 6, 2020 7:25 PM -
ਕੈਨੇਡਾ ਦੀ ਚੀਫ ਪਬਲਿਕ ਹੈਲਥ ਅਫਸਰ, ਡਾ. ਥੈਰੇਸਾ ਟੈਮ ਨੇ ਮੰਨਿਆ ਹੈ ਕਿ ਕੋਵਿਡ-19 ਕਾਰਨ ਕੈਨੇਡਾ 'ਚ 5 ਮਈ ਤੱਕ ਜਾਨ ਗਵਾਉਣ ਵਾਲੇ ਵਾਇਰਸ ਪੀੜਤਾਂ ਦੀ ਗਿਣਤੀ, ਪਹਿਲਾਂ ਪੇਸ਼ ਕੀਤੀਆਂ ਗਈਆਂ ਰਾਸ਼ਟਰੀ ਪ੍ਰੋਜੈਕਸ਼ਨਸ (ਰਾਸ਼ਟਰੀ ਭਵਿੱਖਵਾਣੀਆਂ) ਤੋਂ ਵੱਧ ਰਹੀਆਂ ਹਨ।
ਪਹਿਲਾਂ ਪੇਸ਼ ਕੀਤੀਆਂ ਗਈਆਂ ਰਾਸ਼ਟਰੀ ਪ੍ਰੋਜੈਕਸ਼ਨਸ ਅਨੁਸਾਰ 5 ਮਈ ਤੱਕ ਕੈਨੇਡਾ 'ਚ ਇਸ ਵਾਇਰਸ ਕਾਰਨ 3,883 ਲੋਕਾਂ ਦੀ ਜਾਨ ਜਾਣ ਦਾ ਅਨੁਮਾਨ ਪੇਸ਼ ਕੀਤਾ ਗਿਆ ਸੀ।
ਪਰ ਕੱਲ ਤਕ ਦੇ ਅਸਲ ਅੰਕੜਿਆਂ 'ਚ 4,043 ਲੋਕਾਂ ਦੀ ਜਾਨ ਜਾ ਚੁੱਕੀ ਹੈ।
ਡਾ. ਟੈਮ ਦਾ ਕਹਿਣਾ ਹੈ ਕਿ ਮੌਤਾਂ ਦੀ ਗਿਣਤੀ 'ਚ ਇਹ ਵਾਧਾ, ਇਸ ਦੁਖਦਾਈ ਵਜ੍ਹਾ ਕਾਰਨ ਦਰਜ ਕੀਤਾ ਜਾ ਰਿਹਾ ਹੈ ਕਿ ਕਈ ਹਫਤਿਆਂ ਤੋਂ ਬਿਮਾਰ ਕੁਝ ਪੀੜਤ, ਕੋਵਿਡ-19 ਦੀ ਆਖਰੀ ਸਟੇਜ ਤਕ ਪਹੁੰਚ ਗਏ ਹਨ ਅਤੇ ਹੁਣ ਦਮ ਤੋੜ ਰਹੇ ਹਨ।
ਉਨ੍ਹਾਂ ਕਿਹਾ ਕਿ ਇਸ ਵਿੱਚ ਵਧੇਰੇ ਮਾਮਲੇ ਲੌਂਗ ਟਰਮ ਕੇਅਰ ਹੋਮਸ ਨਾਲ ਸੰਬੰਧਤ ਹਨ।
ਹਾਲਾਂਕਿ ਡਾ. ਟੈਮ ਨੇ ਇੱਕ ਵਾਰ ਫੇਰ ਕਿਹਾ ਕਿ ਐਪੀਡੈਮਿਕ ਦੀ ਰਫਤਾਰ 'ਚ ਕਟੌਤੀ ਹੁੰਦੀ ਵੇਖੀ ਜਾ ਸਕਦੀ ਹੈ, ਅਤੇ ਵਾਇਰਸ ਸੰਬੰਧੀ ਮਾਮਲੇ ਹੁਣ ਕਰੀਬ 20 ਦਿਨ 'ਚ ਦੁੱਗਣੇ ਹੋ ਰਹੇ ਹਨ।
(ਕੈਨੇਡਾ 'ਚ ਕਰੀਬ 1 ਮਿਲੀਅਨ ਲੋਕਾਂ ਦੇ ਕੀਤੇ ਜਾ ਚੁੱਕੇ ਕੋਵਿਡ-19 ਟੈਸਟ)
ਡਾ. ਥੈਰੇਸਾ ਟੈਮ ਦਾ ਕਹਿਣਾ ਹੈ ਕਿ ਹੁਣ ਤਕ ਦੇਸ਼ ਦੇ 9,70,000 ਲੋਕਾਂ ਨੂੰ ਕੋਵਿਡ-19 ਲਈ ਟੈਸਟ ਕੀਤਾ ਜਾ ਚੁੱਕਿਆ ਹੈ।
ਡਾ. ਟੈਮ ਨੇ ਦੱਸਿਆ ਕਿ ਇਸ ਵਿੱਚ ਕਰੀਬ 6% ਮਾਮਲੇ ਪਾਜ਼ਿਟਿਵ ਪਾਏ ਗਏ ਹਨ।
ਕੈਨੇਡਾ 'ਚ ਕੀਤੇ ਜਾ ਰਹੇ ਟੈਸਟਸ ਦੀ ਗਿਣਤੀ ਇਸ ਕਾਰਨ ਵੀ ਅਹਿਮ ਹੋ ਜਾਂਦੀ ਹੈ ਕਿ ਦੇਸ਼ ਦੇ ਬਹੁਤੇ ਸੂਬੇ, ਇੱਕ ਵਾਰ ਫੇਰ ਇਕਾਨਮੀਆਂ ਨੂੰ ਖੋਲ੍ਹਣ ਦੀ ਤਿਆਰੀ 'ਚ ਜੁਟੇ ਹਨ, ਅਤੇ ਇਸਲਈ ਵਾਇਰਸ 'ਤੇ ਵਧੇਰੇ ਨਜਰ ਬਣਾ ਕੇ ਰੱਖਣੀ ਵੀ ਜਰੂਰੀ ਮੰਨੀ ਜਾ ਰਹੀ ਹੈ।
