8.17C Vancouver 8.17C VancouverFeb 12, 2020 6:58 PM -
ਚੀਨ ਵਿੱਚ ਕੋਵਿਡ-19 (COVID-19) ਦੇ ਨਵੇਂ ਅੰਕੜੇ ਇਸ ਗੱਲ ਵੱਲ ਇਸ਼ਾਰਾ ਕਰਦੇ ਹਨ ਕਿ ਇਸ ਵਾਇਰਸ ਤੋਂ ਪ੍ਰਭਾਵਿਤ ਵਿਅਕਤੀਆਂ ਦੀ ਗਿਣਤੀ ਵਿੱਚ ਲਗਾਤਾਰ ਦੂਸਰੇ ਦਿਨ ਕਟੌਤੀ ਆਈ ਹੈ ਜਿਸ ਨਾਲ ਇੱਕ ਵਾਰ ਫਿਰ ਇਸ ਸਿਹਤ ਸੰਕਟ ਉੱਤੇ ਕਾਬੂ ਪਾ ਸਕਣ ਦੀ ਉਮੀਦ ਜਾਗੀ ਹੈ।
ਚੀਨ ਦੇ ਸਿਹਤ ਅਧਿਕਾਰੀਆਂ ਮੁਤਾਬਕ ਹੁਣ ਤੱਕ ਇਸ ਵਾਇਰਸ ਨਾਲ 45,000 ਵਿਅਕਤੀ ਪ੍ਰਭਾਵਿਤ ਹੋ ਚੁੱਕੇ ਹਨ ਅਤੇ 1,100 ਤੋਂ ਵੱਧ ਜਾਨਾਂ ਜਾ ਚੁੱਕੀਆਂ ਹਨ।
ਜਪਾਨ ਦੇ ਤੱਟ ਤੇ ਕੁਆਰੰਟੀਨ ਕੀਤੇ ਗਏ ਡਾਇਮੰਡ ਪ੍ਰਿੰਸੈਸ ਸਮੁੰਦਰੀ ਜਹਾਜ਼ ਤੇ ਕੋਵਿਡ-19 ਦੇ 39 ਨਵੇਂ ਕੇਸ ਉੱਭਰ ਕੇ ਸਾਹਮਣੇ ਆਏ ਹਨ ਪਰ ਇਹ ਗੱਲ ਫਿਲਹਾਲ ਸਪੱਸ਼ਟ ਨਹੀਂ ਹੈ ਕਿ ਪੀੜਤ ਵਿਅਕਤੀਆਂ ਵਿੱਚੋਂ ਕੋਈ ਕਨੇਡੀਅਨ ਹੈ ਜਾਂ ਨਹੀਂ।
ਓਂਟੇਰੀਓ ਦੇ ਵਿੱਚ ਵਾਇਰਸ ਲਈ ਤੀਸਰੇ ਵਿਅਕਤੀ ਤੇ ਕੀਤੇ ਗਏ ਟੈਸਟ ਦੋ ਵਾਰ ਨੈਗੇਟਿਵ ਆਏ ਹਨ ਅਤੇ ਹੁਣ ਉਸ ਤੋਂ ਇਨਫੈਕਸ਼ਨ ਦਾ ਖ਼ਤਰਾ ਨਹੀਂ ਹੈ।
ਅਪਰੈਲ ਦੇ ਵਿੱਚ ਹੋਣ ਵਾਲੀ ਚਾਈਨੀਜ਼ ਗ੍ਰੈਂਡ ਪ੍ਰੀ (The Chinese Grand Prix) ਨੂੰ ਵੀ ਨਵੇਂ ਵਾਇਰਸ ਕਾਰਨ ਪੋਸਟਪੋਨ ਕਰ ਦਿੱਤਾ ਗਿਆ ਹੈ।
ਫਾਰਮੂਲਾ ਵਨ (Formula One) ਦਾ ਕਹਿਣਾ ਹੈ ਕਿ ਸਟਾਫ ਅਤੇ ਰੇਸ ਵਿਚ ਹਿੱਸਾ ਲੈਣ ਵਾਲੇ ਡਰਾਈਵਰਾਂ ਅਤੇ ਦਰਸ਼ਕਾਂ ਦੀ ਸਿਹਤ ਸੁਰੱਖਿਆ ਨੂੰ ਧਿਆਨ ਵਿੱਚ ਰੱਖ ਕੇ ਅਜਿਹਾ ਕੀਤਾ ਗਿਆ ਹੈ। ਵਾਇਰਸ ਕਾਰਨ ਰੱਦ ਕਰ ਦਿੱਤੇ ਗਏ ਹੋਰ ਸਮਾਗਮਾਂ ਵਿੱਚ ਓਲੰਪਿਕ ਦੇ ਕੁਆਲੀਫਾਇੰਗ ਇਵੈਂਟ ਅਤੇ ਗੋਲਫ ਟੂਰਨਾਮੈਂਟ ਸ਼ਾਮਲ ਹਨ।
ਪਰ ਟੋਕੀਓ ਵਿੱਚ ਹੋਣ ਜਾ ਰਹੀਆਂ ਓਲੰਪਿਕ ਖੇਡਾਂ ਦੇ ਆਯੋਜਕਾਂ ਦਾ ਕਹਿਣਾ ਹੈ ਕਿ ਖੇਡਾਂ 24 ਜੁਲਾਈ ਦੀ ਨਿਰਧਾਰਤ ਤਰੀਕ ਨੂੰ ਸ਼ੁਰੂ ਹੋਣਗੀਆਂ।
