17.29C Vancouver 17.29C VancouverJan 31, 2025 7:22 PM - Connect Newsroom
ਬੀ.ਸੀ. ਵਿਚ ਟਰੰਪ ਦੇ ਟੈਰਿਫ ਦੇ ਖ਼ਦਸ਼ੇ ਕਾਰਨ ਕਈ ਲੋਕਾਂ ਵਿਚ ਨੌਕਰੀ ਜਾਣ ਦੀ ਚਿੰਤਾ ਵਧ ਗਈ ਹੈ। ਬੀ.ਸੀ. ਫੈਡਰੇਸ਼ਨ ਆਫ਼ ਲੇਬਰ ਦੀ ਪ੍ਰਧਾਨ ਸੁਜ਼ੈਨ ਸਕਿਡਮੋਰ ਨੇ ਕਿਹਾ ਕਿ ਅਸੀਂ ਬਹੁਤ ਚਿੰਤਤ ਹਾਂ, ਸਾਨੂੰ ਪਤਾ ਹੈ ਕਿ ਟੈਰਿਫ ਦੀ ਮਾਰ ਦੋਵੇਂ ਪਾਸੇ ਦੇ ਵਰਕਰਾਂ ਨੂੰ ਝੱਲਣੀ ਪਵੇਗੀ।
ਸਕਿਡਮੋਰ ਨੇ ਹਾਲਾਂਕਿ, ਬੀ.ਸੀ. ਵਿਚ ਕਿੰਨੇ ਲੋਕਾਂ ਦਾ ਰੁਜ਼ਗਾਰ ਜਾ ਸਕਦਾ ਹੈ ਇਸ ਦੀ ਸਟੀਕ ਗਿਣਤੀ ਨਹੀਂ ਦੱਸੀ ਪਰ ਕਿਹਾ ਕਿ ਜੇ 25 ਫੀਸਦੀ ਟੈਰਿਫ ਕੁਝ ਸਮੇਂ ਤੱਕ ਜਾਰੀ ਰਿਹਾ ਤਾਂ ਕੈਨੇਡਾ ਭਰ ਵਿਚ ਹਜ਼ਾਰਾਂ ਨੌਕਰੀਆਂ ਖਤਮ ਹੋ ਸਕਦੀਆਂ ਹਨ। ਬੀ.ਸੀ. ਫੈਡਰੇਸ਼ਨ ਆਫ਼ ਲੇਬਰ ਦੀ ਪ੍ਰਧਾਨ ਨੇ ਕਿਹਾ ਕਿ ਅਸੀਂ ਹਾਲਾਤ ’ਤੇ ਬੁਹਤ ਬਰੀਕੀ ਨਾਲ ਨਜ਼ਰ ਰੱਖ ਰਹੇ ਹਾਂ ਤਾਂ ਕਿ ਵਰਕਰਾਂ ਦੀਆਂ ਨੌਕਰੀਆਂ ਨੂੰ ਪ੍ਰੋਟੈਕਟ ਕੀਤਾ ਜਾ ਸਕੇ।
ਗੌਰਤਲਬ ਹੈ ਕਿ ਇਸ ਹਫ਼ਤੇ ਦੇ ਸ਼ੁਰੂ ਵਿਚ ਪ੍ਰੀਮੀਅਰ ਡੇਵਿਡ ਈਬੀ ਨੇ ਚਿਤਾਵਨੀ ਦਿੱਤੀ ਸੀ ਕਿ ਟੈਰਿਫ ਕਾਰਨ ਸੂਬੇ ਦੀ ਆਰਥਿਕ ਹਾਲਤ 2008 ਦੀ ਮੰਦੀ ਤੋਂ ਵੀ ਬਦਤਰ ਹੋ ਸਕਦੀ ਹੈ ਅਤੇ ਕਿਹਾ ਸੀ ਕਿ ਉਨ੍ਹਾਂ ਦੀ ਸਰਕਾਰ ਕੋਰੋਨਾ ਦੌਰਾਨ ਦਿੱਤੇ ਗਏ ਰਾਹਤ ਪੈਕੇਜ ਦੀ ਤਰਜ ’ਤੇ ਕਦਮ ਚੁੱਕਣ ਦਾ ਵਿਚਾਰ ਕਰੇਗੀ।
ਸਕਿਡਮੋਰ ਨੇ ਕਿਹਾ ਕਿ ਲੱਕੜ, ਸਮੁੰਦਰੀ ਭੋਜਨ, ਮਾਈਨਿੰਗ ਅਤੇ ਤਕਨੀਕੀ ਵਰਗੇ ਸੈਕਟਰ ਟੈਰਿਫ ਦੇ ਰਿਸਕ ’ਤੇ ਹਨ।
