ਕਾਂਗਰਸ ਵੱਲੋਂ ਲਖਨਊ ਵਿੱਚ ਪ੍ਰਦਰਸ਼ਨ, ਆਖਿਆ ਯੂਪੀ ਸਰਕਾਰ ਲੋਕਾਂ ਦੇ ਮੁੱਦਿਆਂ 'ਤੇ ਬਣੀ ਘੇਸਲੀ

ਉੱਤਰ ਪ੍ਰਦੇਸ਼ ਦੀ ਵਿਧਾਨ ਸਭਾ ਦੇ ਮਾਨਸੂਨ ਇਜਲਾਸ ਦੇ ਦੂਜੇ ਦਿਨ, ਕਾਂਗਰਸ ਲੀਡਰਾਂ ਵੱਲੋਂ ਮਹਿੰਗਾਈ, ਕੋਵਿਡ-19 ਨਾਲ ਹੋਈਆਂ ਮੌਤਾਂ ਅਤੇ ਔਰਤਾਂ ਦੀ ਸੁਰੱਖਿਆ ਨਾਲ ਜੁੜੇ ਮੁੱਦਿਆਂ 'ਤੇ ਗਾਂਧੀ ਦੇ ਬੁੱਤ ਤੋਂ ਵਿਧਾਨ ਸਭਾ ਤੱਕ ਮਾਰਚ ਕੀਤਾ ਗਿਆ।

ਕਾਂਗਰਸ ਐੱਮਐੱਲਏ ਅਰਾਧਨਾ ਮਿਸ਼ਰਾ ਨੇ ਆਖਿਆ,"ਆਮ ਲੋਕਾਂ ਦੇ ਮੁੱਦਿਆਂ 'ਤੇ ਸੂਬਾ ਸਰਕਾਰ ਦੇ ਕੰਨਾਂ 'ਤੇ ਜੂੰ ਨਹੀਂ ਰੇਂਗਦੀ। ਜੇ ਲੋਕ ਮਹਿੰਗਾਈ, ਬੇਰੁਜ਼ਗਾਰੀ ਆਦਿ ਦੇ ਮੁੱਦਿਆਂ 'ਤੇ ਆਵਾਜ਼ ਚੁੱਕਦੇ ਹਨ, ਤਾਂ ਸਰਕਾਰ ਉਨ੍ਹਾਂ ਦੀ ਜਾਇਦਾਦ ਜ਼ਬਤ ਕਰ ਲੈਂਦੀ ਹੈ। ਅਸੀਂ ਇੱਥੇ ਆਮ ਲੋਕਾਂ ਦੇ ਸਮਰਥਨ ਵਿੱਚ ਖੜੇ ਹਾਂ।"

ਉੱਤਰ ਪ੍ਰਦੇਸ਼ ਕਾਂਗਰਸ ਕਮੇਟੀ ਦੇ ਪ੍ਰਧਾਨ ਅਜੈ ਕੁਮਾਰ ਲਾਲੂ ਨੇ ਆਖਿਆ,"ਮੁੱਖ ਮੰਤਰੀ ਆਮ ਲੋਕਾਂ ਨੂੰ ਆ ਰਹੀਆਂ ਮੁਸ਼ਕਲਾਂ ਪ੍ਰਤੀ ਅਸੰਵੇਦਨਸ਼ੀਲ ਹਨ" ਅਤੇ ਅੱਗੇ ਆਖਿਆ,"ਲੋਕ ਸੂਬਾ ਸਰਕਾਰ ਤੋਂ ਕਾਫੀ ਨਿਰਾਸ਼ ਹਨ।"

"ਅਸੀਂ ਇੱਥੇ ਬੇਰੁਜ਼ਗਾਰ ਨੌਜਵਾਨਾਂ, ਕਿਸਾਨਾਂ ਦੇ ਹੱਕ 'ਚ ਆਏ ਹਾਂ ਅਤੇ ਅਸੀਂ ਔਰਤਾਂ ਦੀ ਸੁਰੱਖਿਆ ਤੇ ਮਹਿੰਗਾਈ 'ਤੇ ਵੀ ਚਰਚਾ ਕਰਾਂਗੇ,"ਲਾਲੂ ਨੇ ਅੱਗੇ ਆਖਿਆ।

ਉਨ੍ਹਾਂ ਅੱਗੇ ਆਖਿਆ,"ਸਰਕਾਰ ਹਰ ਖੇਤਰ ਵਿੱਚ ਅਸਫ਼ਲ ਰਹੀ ਹੈ। ਜਨਤਾ ਨਿਰਾਸ਼ ਹੈ।"

ਜ਼ਿਕਰਯੋਗ ਹੈ ਕਿ ਉੱਤਰ ਪ੍ਰਦੇਸ਼ ਵਿੱਚ ਵਿਧਾਨ ਸਭਾ ਦਾ ਮਾਨਸੂਨ ਇਜਲਾਸ ਮੰਗਲਵਾਰ ਨੂੰ ਸ਼ੁਰੂ ਹੋਇਆ ਹੈ।